.jpg)
മലപ്പുറം ലഹരി കേസ് ; നടിമാര്ക്ക് നല്കാനെന്ന മൊഴിയിലും അന്വേഷണം നടത്തും
മലപ്പുറത്തെ ഒരു റിസോര്ട്ടില് താമസിക്കുന്ന സിനിമാ നടിമാര്ക്ക് കൈമാറാനാണ് മയക്കുമരുന്ന് കൊണ്ടുവന്നതെന്നാണ് അറസ്റ്റിലായ മുഹമ്മദ് ഷബീബ് പറയുന്നത്.
മലപ്പുറത്തെ 510 ഗ്രാം എംഡിഎംഎയുമായി കാളികാവ് സ്വദേശി പിടിയിലായ സംഭവത്തില് പൊലീസ് അന്വേഷണം ശക്തമാക്കി. മലപ്പുറത്തെ ഒരു റിസോര്ട്ടില് താമസിക്കുന്ന സിനിമാ നടിമാര്ക്ക് കൈമാറാനാണ് മയക്കുമരുന്ന് കൊണ്ടുവന്നതെന്നാണ് അറസ്റ്റിലായ മുഹമ്മദ് ഷബീബ് പറയുന്നത്. വിദേശ നിര്മ്മിത എംഡിഎംഎയ്ക്കായി കൊച്ചിയില് നിന്ന് രണ്ട് നടിമാര് എത്തുമെന്ന് അറിയിച്ചിരുന്നു. ഇവരെ കാത്താണ് റിസോര്ട്ടില് എത്തിയതെന്നും ഷബീബ് പൊലീസിന് മൊഴി നല്കി.
സംഭവത്തില് നടിമാര് ഉള്പ്പടെയുള്ളവരുടെ പങ്ക് പൊലീസ് അന്വേഷിച്ച് വരികയാണെന്ന് മലപ്പുറം എസ് പി ആര്. വിശ്വനാഥ് പറഞ്ഞു. ക്രിസ്തുമസ്, ന്യൂ ഇയര് പാര്ട്ടികള്ക്കായി എംഡിഎംഎ ഉള്പ്പെടെയുള്ള ലഹരി മരുന്നുകള് മലപ്പുറത്തേക്ക് എത്തുന്നതായി പൊലീസിന് രഹസ്യ വിവരം കിട്ടിയിരുന്നു. ഇതിന്റെ അടിസ്ഥാനത്തിലാണ് വാഴക്കാടിന് സമീപമുള്ള അഴിഞ്ഞില്ലത്തെ റിസോര്ട്ടില് പൊലീസും ഡാന്സാഫ് ടീമും സംയുക്ത പരിശോധന നടത്തിയത്.
ഇതിനിടെയാണ് റിസോര്ട്ടിന്റെ പാര്ക്കിങ് ഗ്രൗണ്ടില് നിര്ത്തിയിട്ടിരുന്ന വാഹനത്തില് നിന്ന് എംഡിഎംഎ കണ്ടെത്തിയത്. വിപണിയില് ലക്ഷക്കണക്കിന് രൂപ വിലവരുന്ന വീര്യം കൂടിയ 510 ഗ്രാം സെമി ക്രിസ്റ്റല് രൂപത്തിലുള്ള എംഡിഎംഎയാണ് പിടികൂടിയത്.
