കൊയിലാണ്ടിയിൽ കാണാതായ വയോധികനെ കിണറ്റിൽ മരിച്ച നിലയിൽ കണ്ടെത്തി

കോഴിക്കോട്: കൊയിലാണ്ടിയിൽ ഇന്ന് പുലർച്ചെ മുതൽ കാണാതായ 80 കാരൻ കിണറ്റിൽ മരിച്ച നിലയിൽ. മുത്താമ്പി കണിയാണി ചന്തുവിനെയാണ് മരിച്ച നിലയിൽ കണ്ടെത്തിയത്. കാണാതായ സമയം മുതൽ വീട്ടുകാർ നടത്തിയ തിരച്ചിലിലാണ് ചന്തുവിനെ വീട്ടിനടുത്തുള്ള കിണറ്റിൽ മരിച്ച നിലയിൽ കണ്ടെത്തിയത്.

വീട്ടുകാര്‍ അറിയിച്ചതിനെ തുടര്‍ന്ന് ഫയർ ഫോഴ്സും പൊലീസും സ്ഥലത്തെത്തി തുടർനടപടികൾ സ്വീകരിച്ചു. മൃതദേഹം കിണറ്റിൽ നിന്നും ഫയര്‍ഫോഴ്സ് സംഘം പുറത്തെടുത്തു. ഇന്‍ക്വസ്റ്റ് നടപടികള്‍ക്കുശേഷം മൃതദേഹം പോസ്റ്റ്‍മോര്‍ട്ടത്തിനായി കൊണ്ടുപോയി.