.jpg)
ആലപ്പുഴയിൽ ടിപ്പറിടിച്ച് വയോധികൻ മരിച്ച സംഭവം ; ഡ്രൈവർ അറസ്റ്റിൽ
മാന്നാർ: ആലപ്പുഴയിൽ ടിപ്പറിടിച്ച് വയോധികൻ മരിച്ച സംഭവത്തിൽ ടിപ്പർ ഡ്രൈവർ അറസ്റ്റിൽ. സ്കൂട്ടറിനെ മറികടന്ന ടിപ്പറിന്റെ അടിയിൽപ്പെട്ട് മാന്നാർ ചെന്നിത്തല സന്തോഷ് ഭവനിൽ സുരേന്ദ്രൻ (68) ആണ് മരിച്ചത്. ടിപ്പർ ഡ്രൈവറായ തിരുവല്ല ചൂരപ്പറമ്പിൽ രമേശ് കുമാറി (45)നെയാണ് പുളിക്കീഴ് പൊലീസ് കസ്റ്റഡിയിലെടുത്തത്.
പൊടിയാടി ഐസിഐസിഐ ബാങ്കിന് വടക്കുവശം വലിയ വളവ് കഴിഞ്ഞ് അതേ ദിശയിൽ പോയ്ക്കൊണ്ടിരുന്ന സ്കൂട്ടറിനെ അമിതവേഗതയിലെത്തിയ ടിപ്പർ ഓവർടേക്ക് ചെയ്തതും ടിപ്പറിന്റെ പിൻ ചക്രം സ്കൂട്ടറിൽ ഇടിക്കുകയായിരുന്നു. സുരേന്ദ്രൻ വാഹനവുമായി റോഡിൽ തെറിച്ച് വീണു. ടിപ്പറിന്റെ പിന്നിലെ ഇടതുവശത്തെ ചക്രം സുരേന്ദ്രൻറെ തലയിലൂടെ കയറിയിറങ്ങിയാണ് മരണം സംഭവിച്ചത്.
ഡ്രൈവർക്കെതിരെ പുളിക്കീഴ് പൊലീസ് കേസെടുത്തു. സുരേന്ദ്രൻറെ മൃതദേഹം തിരുവല്ല താലൂക്ക് ആശുപത്രിയിലേക്ക് മാറ്റി. കുറ്റം സമ്മതിച്ച പ്രതിയുടെ അറസ്റ്റ് കഴിഞ്ഞ ദിവസം വൈകിട്ട് ഏഴ് മണിയോടെ പൊലീസ് രേഖപ്പെടുത്തി. തുടർനടപടികൾക്ക് ശേഷം ഇയാളെ കോടതിയിൽ ഹാജരാക്കി.
