.jpg)
പല്ലിന്‍റെ ആരോഗ്യം ഉറപ്പുവരുത്താം ഈ കാര്യങ്ങളിലൂടെ...
ദന്താരോഗ്യം എന്നത് വളരെ പ്രധാനപ്പെട്ട ഒന്നാണെന്ന് പലരും മറന്നു പോകുന്നു. ശരീരത്തിന്‍റെ മൊത്തം ആരോഗ്യം കാത്തുസൂക്ഷിക്കുന്നതിന് കൃത്യമായ ദന്തസംരക്ഷണവും അത്യന്താപേക്ഷിതമാണ്. പല്ല് പലരുടെയും ആത്മവിശ്വാസത്തിന്റെ ഒരു സുപ്രധാന ഭാഗം കൂടിയാണ്.
പല്ലിന്‍റെ ആരോഗ്യവുമായി ബന്ധപ്പെട്ട പല പ്രശ്നങ്ങളും നാം നേരിട്ടേക്കാം. ഇവയില്‍ മിക്കതും ശരിയായ രീതിയില്‍ പല്ലുകളെ സംരക്ഷിക്കാത്തതിനാല്‍ തന്നെ നേരിടുന്ന പ്രശ്നങ്ങളാണെന്ന് ഡെന്‍റിസ്റ്റുകള്‍ ചൂണ്ടിക്കാണിക്കുന്നു.പലപ്പോഴും പല്ലിന് കാര്യമായ പ്രശ്നങ്ങളുണ്ടാകുന്നതിന് ശേഷമാണ് അധികപേരും ഡെന്‍റിസ്റ്റുകളെ സമീപിക്കുന്നത്. എന്നാല്‍ നേരത്തെ തന്നെ ദിവസവും ചില കാര്യങ്ങള്‍ ശ്രദ്ധിച്ചാല്‍ ഈ പ്രയാസം ഒഴിവാക്കാവുന്നതേയുള്ളൂ. അത്തരത്തില്‍ പല്ലുകളുടെ ആരോഗ്യം ഉറപ്പുവരുത്തുന്നതിനായി നിത്യവും ചെയ്യാവുന്ന കാര്യങ്ങളെ കുറിച്ച് ഒന്നറിയാം.
tRootC1469263">. ദിവസവും രാവിലെ ഉറക്കമുണര്‍ന്നയുടൻ നാം ബ്രഷ് ചെയ്ത് വായയും പല്ലുകളും വൃത്തിയാക്കാറുണ്ട്, അല്ലേ? എന്നാല്‍ ഇത് വെറുതെ ചെയ്താല്‍ പോര.വൃത്തിയായി തന്നെ ചെയ്തില്ലെങ്കില്‍ ഇതിന് ഫലം ലഭിക്കില്ല. അതിനാല്‍ പല്ലുകളും വായയും നല്ലതുപോലെ ശുചിയാകുംവിധം ബ്രഷ് ചെയ്ത് ശീലിക്കുക.
. രാവിലെ മാത്രമല്ല, രാത്രിയും ബ്രഷ് ചെയ്യല്‍ നിര്‍ബന്ധമാക്കണം. അത്താഴം കഴിഞ്ഞ് ഉറങ്ങാൻ പോകുന്നതിന് മുമ്പായി നല്ലതുപോലെ ബ്രഷ് ചെയ്ത് വായയും പല്ലുകളും വൃത്തിയാക്കിയ ശേഷം മാത്രം കിടക്കുക. മിക്കവരും ഇത് ചെയ്യാറില്ലെന്നതാണ് സത്യം.
. പല്ലുകള്‍ വൃത്തിയാക്കുമ്പോള്‍ രണ്ട് പല്ലുകള്‍ക്കിടയിലുള്ള ഇടം എപ്പോഴും വൃത്തിയാക്കാൻ ആളുകള്‍ മറന്നുപോകുകയോ അല്ലെങ്കില്‍ മടിക്കുകയോ ചെയ്യാറുണ്ട്. ഈ ശീലമില്ലെങ്കിലും ക്രമേണ പല്ലിന്‍റെ ആരോഗ്യം പ്രശ്നത്തിലാകാം. അതിനാല്‍ ഫ്ലോസിംഗ് നിര്‍ബന്ധമായും ചെയ്ത് ശീലിക്കുക.
. ആകെ ആരോഗ്യത്തെ തന്നെ ദോഷകരമായി ബാധിക്കുന്നൊരു ശീലമാണ് പുകവലി. ഇത് വായുടെ ആരോഗ്യത്തെയും പല്ലിന്‍റെ ആരോഗ്യത്തെയുമെല്ലാം ഒരുപോലെ പ്രതികൂലമായി ബാധിക്കുന്നു. അതിനാല്‍ കഴിയുന്നതും പുകവലി ഒഴിവാക്കുക.
. ചായയോ, അല്ലെങ്കില്‍ മധുരമുള്ള സ്നാക്സോ എന്ത് മധുരമുള്ളത് കഴിച്ചാലും അതിന് ശേഷം വായ വെള്ളമൊഴിച്ച് കഴുകി വൃത്തിയാക്കുന്നത് പതിവാക്കണം. ഇല്ലെങ്കില്‍ വായ്ക്കകത്ത് പെട്ടെന്ന് സൂക്ഷ്മാണുക്കള്‍ വന്ന് നിറഞ്ഞ് അത് പല്ലുകളെ ക്രമേണ ബാധിക്കാം.
. ദിവസവും ചില കാര്യങ്ങള്‍ പല്ലുകളുടെ ആരോഗ്യത്തിനായി നിര്‍ബന്ധമായും ചെയ്യുന്നതിനെ കുറിച്ചാണല്ലോ ചര്‍ച്ച. ഇക്കൂട്ടത്തില്‍ മൗത്ത്‍വാഷിന്‍റെ ഉപയോഗവും ഉറപ്പുവരുത്തുക. ഇത് ഡെന്‍റിസ്റ്റിന്‍റെ നിര്‍ദേശപ്രകാരം തന്നെ വാങ്ങിക്കാവുന്നതാണ്.
. പല്ലിന്‍റെ ആരോഗ്യം സംരക്ഷിച്ചുനിര്‍ത്തുന്നതില്‍ ഏറ്റവും പ്രധാനപ്പെട്ടതും എന്നാല്‍ ഭൂരിപക്ഷം പേരും ചെയ്യാത്തതുമായ ഒരു കാര്യമുണ്ട്. കൃത്യമായ ഇടവേളകളില്‍ ഡെന്‍റിസ്റ്റിനെ കണ്ട് പരിശോധിപ്പിക്കുകയോ ക്ലീൻ ചെയ്യിക്കുകയോ എല്ലാം ചെയ്യുന്നതിനെ പറ്റിയാണ് പറയുന്നത്. പലരും ആദ്യമേ സൂചിപ്പിച്ചത് പോലെ എന്തെങ്കിലും പ്രയാസങ്ങള്‍ വരുമ്പോള്‍ മാത്രമാണ് ഡെന്‍റിസ്റ്റിനെ കാണുക. ഈ ശീലം മാറ്റുക. ആറ് മാസത്തിലൊരിക്കലെങ്കിലും ഡെന്‍റിസ്റ്റിനെ കാണാൻ ശ്രമിക്കുന്നത് ഏറെ നല്ലതാണ്.
