നെതന്യാഹുവിന് തിരിച്ചടി; ഇസ്രായേൽ പാർലമെന്റ് സ്പീക്കറായി പ്രതിപക്ഷത്തെ മാറ്റൻ കഹാനയെ തെരഞ്ഞെടുത്തു

 

ജറുസലേം: ഇസ്രായേൽ പാർലമെന്റിന്റെ (നെസെറ്റ്) പുതിയ സ്പീക്കറായി പ്രതിപക്ഷ സഖ്യത്തിലെ മാറ്റൻ കഹാനയെ തെരഞ്ഞെടുത്തു. പ്രധാനമന്ത്രി ബെഞ്ചമിൻ നെതന്യാഹുവിന്റെ നേതൃത്വത്തിലുള്ള മുൻ സർക്കാരിന്റെ നയങ്ങൾ തിരുത്താനും, പുതിയ സഖ്യസർക്കാർ രൂപീകരിക്കാനുമുള്ള പ്രതിപക്ഷത്തിന്റെ നിർണായക നീക്കങ്ങളിലെ വലിയ മുന്നേറ്റമായാണ് ഈ വിജയം വിലയിരുത്തപ്പെടുന്നത്. നെതന്യാഹുവിനെതിരെ പുതിയ സർക്കാർ രൂപീകരിക്കാൻ ശ്രമിക്കുന്ന 'യഷാർ' (Yashar) പാർട്ടി നേതാവ് ഗാഡി ഐസൻകോട്ടിന്റെ അടുത്ത സഖ്യകക്ഷിയാണ് മാറ്റൻ കഹാന.

120 അംഗ പാർലമെന്റിൽ 66 വോട്ടുകൾ നേടിയാണ് കഹാന സ്പീക്കർ പദവിയിലേക്ക് തെരഞ്ഞെടുക്കപ്പെട്ടത്. ജൂത വിഭാഗത്തിൽപ്പെട്ട പ്രതിപക്ഷ കക്ഷികളും അറബ് നേതൃത്വത്തിലുള്ള പാർട്ടികളും അദ്ദേഹത്തിന് പിന്തുണ നൽകി. ഏഴ് മണിക്കൂർ നീണ്ട വാദപ്രതിവാദങ്ങൾക്കൊടുവിൽ നടന്ന വോട്ടെടുപ്പിൽ നെതന്യാഹു പക്ഷത്തെ സ്ഥാനാർത്ഥിയായ ഒഫിർ കാറ്റ്സിന് 52 വോട്ടുകൾ മാത്രമാണ് ലഭിച്ചത്. നെതന്യാഹുവിന്റെ വിശ്വസ്തനായ അമീർ ഒഹാനയുടെ പിൻഗാമിയായാണ് കഹാന എത്തുന്നത്. ഒക്ടോബർ 27-ന് നടന്ന പാർലമെന്റ് തെരഞ്ഞെടുപ്പിൽ നെതന്യാഹുവിനും സഖ്യകക്ഷികൾക്കും ഭൂരിപക്ഷം നഷ്ടപ്പെട്ടതിനെത്തുടർന്ന്, പുതിയ സർക്കാർ രൂപീകരിക്കാൻ ഇസ്രായേൽ പ്രസിഡന്റ് ഗാഡി ഐസൻകോട്ടിനെ ചുമതലപ്പെടുത്തുകയായിരുന്നു.

സഖ്യസർക്കാർ രൂപീകരിക്കുന്നതിനായി ഐസൻകോട്ടിന് അഞ്ച് ആഴ്ച കൂടി സമയമുണ്ട്. അതുവരെ പാർലമെന്റിലെ തങ്ങളുടെ ഭൂരിപക്ഷം ഉപയോഗിച്ച് നിർണായകമായ നിയമനിർമ്മാണങ്ങളുമായി മുന്നോട്ട് പോകാനാണ് നെതന്യാഹു വിരുദ്ധ ചേരിയുടെ തീരുമാനം. പ്രധാനമന്ത്രി പദവിക്ക് കാലാവധി പരിധി ഏർപ്പെടുത്തുക, 2023 ഒക്ടോബർ 7-ലെ ഹമാസ് ആക്രമണത്തെക്കുറിച്ച് സ്വതന്ത്ര അന്വേഷണം നടത്തുക, ജുഡീഷ്യറിയുടെ അധികാരങ്ങൾ വെട്ടിക്കുറച്ച നിയമങ്ങൾ പിൻവലിക്കുക തുടങ്ങിയ പ്രധാന ബില്ലുകൾ അവതരിപ്പിച്ച് സഭയുടെ അംഗീകാരം നേടിയെടുക്കുകയാണ് പ്രതിപക്ഷത്തിന്റെ ലക്ഷ്യം. സ്പീക്കർ പദവി സ്വന്തമാക്കിയതിലൂടെ സഭയുടെ നിയമനിർമ്മാണ നടപടികളിൽ നിർണായക മേധാവിത്വം നേടാൻ ഐസൻകോട്ട് സഖ്യത്തിന് കഴിഞ്ഞിരിക്കുകയാണ്.