വൈദ്യുതിയും കുടിവെള്ളവും നിലച്ചു; യുക്രൈനിൽ റഷ്യൻ ഡ്രോൺ ആക്രമണത്തിൽ തലസ്ഥാനത്തും പ്രതിസന്ധി

 യുക്രൈനിൽ റഷ്യ നടത്തിയ രാത്രികാല ഡ്രോൺ ആക്രമണങ്ങൾക്കു പിന്നാലെ തലസ്ഥാനമായ കീവിലും സമീപപ്രദേശങ്ങളിലും വൈദ്യുതിയും കുടിവെള്ള വിതരണവും മണിക്കൂറുകളോളം തടസ്സപ്പെട്ടതായി റിപ്പോർട്ട്. യുക്രൈൻ വ്യോമസേനയുടെ കണക്കനുസരിച്ച് 310 ഡ്രോണുകളാണ് റഷ്യ ആക്രമണത്തിനായി അയച്ചത്. ഇതിൽ 272 എണ്ണത്തെ തടയുകയോ പ്രവർത്തനരഹിതമാക്കുകയോ ചെയ്തതായി അധികൃതർ അറിയിച്ചു.

തെക്കൻ യുക്രൈനിലെ കോമിഷുവാഖ ഗ്രാമത്തിൽ നേരത്തെ നടന്ന ആക്രമണത്തിൽ മരിച്ചവരുടെ എണ്ണം 40 ആയി ഉയർന്നതായി പ്രസിഡന്റ് വൊളൊദിമിർ സെലൻസ്കി അറിയിച്ചു. മുൻ സ്കൂൾ കെട്ടിടത്തിലും സമീപത്തെ അഭയകേന്ദ്രത്തിലുമാണ് റഷ്യൻ ഗൈഡഡ് ബോംബുകൾ പതിച്ചത്. മുപ്പതോളം പേർ കൂടി അവശിഷ്ടങ്ങൾക്കിടയിൽ കുടുങ്ങിയിരിക്കാമെന്നാണ് ആശങ്ക.

രക്ഷാപ്രവർത്തനത്തിനിടെ വീണ്ടും ഡ്രോൺ ആക്രമണ ഭീഷണി നേരിടുന്നതായി അധികൃതർ അറിയിച്ചു. യുക്രൈനിന്റെ പുനർനിർമാണവും സമാധാന ചർച്ചകളും സംബന്ധിച്ച് അമേരിക്ക, യൂറോപ്യൻ രാജ്യങ്ങൾ, നാറ്റോ, ലോകബാങ്ക്, യൂറോപ്യൻ യൂണിയൻ പ്രതിനിധികൾ ബ്രസൽസിൽ ചർച്ച നടത്തി.