സൂര്യപ്രകാശത്തിൽ മിന്നിതിളങ്ങുന്ന കുതിര; വൈറലായി വീഡിയോ
കണ്ടാൽ ഒരു മെഴുകു പ്രതിമ പോലെ തോന്നുന്ന സുന്ദരൻ കുതിര. സമൂഹ മാധ്യമങ്ങളിൽ വൈറലായി മാറിയിരിക്കുകയാണ് ഇപ്പോൾ ഈ സുന്ദരൻ കുതിര. അഖല്‍-ടെകെ ഇനത്തില്‍പെടുന്ന കുതിരയാണിത്. മധ്യേഷ്യന്‍ രാജ്യമായ തുര്‍ക്ക്‌മെനിസ്ഥാനിലാണ് ഈ കുതിരകളെ പ്രധാനമായും കാണപ്പെടുന്നത്.
ഗബ്രിയേല്‍ കോര്‍ണോ എന്ന ഉപയോക്താവ് എക്‌സില്‍ പങ്കുവച്ചതാണ് അഖല്‍-ടെകെ ഇനത്തില്‍പെട്ട കുതിരയുടെ ദൃശ്യങ്ങള്‍. ഈ കുതിരയുടെ തിളക്കമുള്ള രോമങ്ങളാണ് ഏവരെയും ആകര്‍ഷിക്കുന്നത്. ‘ഇത് അപൂര്‍വ അഖല്‍-ടെകെ തുര്‍ക്ക്‌മെന്‍ കുതിര ഇനമാണ്. അതിന്റെ തിളക്കമുള്ള രോമങ്ങള്‍ കാരണമാണ് അതിന് സ്വര്‍ണ്ണക്കുതിര എന്ന വിളിപ്പേര് കിട്ടിയത്’ എന്ന കുറിപ്പും വിഡിയോയുടെ താഴെ നല്‍കിയിട്ടുണ്ട്.
സ്വര്‍ണ്ണക്കുതിരകള്‍ എന്നറിയപ്പെടുന്ന അഖല്‍-ടെകെ കുതിരകള്‍ക്ക് വലിയ വിലയുണ്ട്. 30 ലക്ഷം രൂപ വരെയാണ് ഇന്ത്യയില്‍ ഇതിന്റെ വില. അതുപോലെ, വിശ്വസ്തതയ്ക്ക് പേരുകേട്ട ഈ കുതിരകള്‍ അവയുടെ ഉടമകളെ മാത്രമേ സവാരി ചെയ്യാന്‍ അനുവദിക്കൂ എന്നും പറയപ്പെടുന്നു. നിലവിലെ കണക്കനുസരിച്ച് 7,000 ത്തില്‍ താഴെ കുതിരകള്‍ മാത്രമാണ് ഉള്ളത്. തുര്‍ക്ക്‌മെനിസ്ഥാന്റെ ദേശീയ മൃഗം കൂടിയാണ് അഖല്‍-ടെകെ കുതിരകള്‍.