വാട്സ്ആപ്പ് വെബില് ഇനി വോയിസും ,വിഡിയോ കോളും; പുത്തൻ ഫീച്ചറുകളുമായി വാട്സ്ആപ്പ്
വോയ്സ്, വിഡിയോ കോളിങ് ഫീച്ചറുകളാണ് പുതുതായി വാട്സ്ആപ്പ് അവതരിപ്പിച്ചത്.
ന്യൂഡല്ഹി:വോയ്സ്, വിഡിയോ കോളിങ് ഫീച്ചറുകളാണ് പുതുതായി വാട്സ്ആപ്പ് അവതരിപ്പിച്ചത്. ബീറ്റ ഉപയോക്താക്കള്ക്ക് മാത്രമേ നിലവിൽ ലഭ്യമാകുകയുള്ളു. വാട്സ്ആപ്പ് വെബില് എന്ഡ്-ടു-എന്ഡ് എന്ക്രിപ്റ്റ് ചെയ്ത കോളുകളും സ്ക്രീന്-ഷെയറിങ്ങും ചേര്ക്കുന്നതായും റിപ്പോര്ട്ടുണ്ട്. ഈ ഫീച്ചറുകള് ഇതിനകം തന്നെ വിന്ഡോസ്, മാക് ഡെസ്ക്ടോപ്പ് ആപ്പുകളില് ലഭ്യമായിരുന്നു. ഇതുവരെ, വാട്സ്ആപ്പ് വെബ് ഉപയോക്താക്കള്ക്ക് ടെക്സ്റ്റ് സന്ദേശങ്ങള് അയയ്ക്കാനും മീഡിയ ഫയലുകള് പങ്കിടാനും സാധിക്കുമായിരുന്നു, എന്നാല് വോയ്സ്, വിഡിയോ കോളിങ് എന്നിവ ഡെസ്ക്ടോപ്പ് ആപ്പുകള്ക്ക് മാത്രമായിരുന്നു ലഭ്യമായിരുന്നത്.
ഉപയോക്താക്കള്ക്ക് ബ്രൗസറില് നിന്ന് തന്നെ നേരിട്ട് കോള് ചെയ്യാന് സാധിക്കുന്ന വോയ്സ്, വിഡിയോ കോള് ഫീച്ചറുകള് ലഭ്യമായി തുടങ്ങിയതായാണ് വാബീറ്റ ഇന്ഫോ റിപ്പോര്ട്ട് ചെയ്യുന്നത്.ഫീച്ചര് ഏകദേശം ഒരു വര്ഷമായി പരീക്ഷണ ഘട്ടത്തിലായിരുന്നുവെന്നും നിലവില് വണ്-ടു-വണ് ചാറ്റുകളില് മാത്രമായി പരിമിതപ്പെടുത്തിയിട്ടുണ്ടെന്നും റിപ്പോര്ട്ടുണ്ട്. ഡെസ്ക്ടോപ്പ് ആപ്പ് ഇന്സ്റ്റാള് ചെയ്യാതെ തന്നെ ബ്രൗസറില് നിന്ന് കോളുകള് വിളിക്കാന് ഈ ഫീച്ചര് ഉപയോക്താക്കളെ അനുവദിക്കുന്നു.