ഗാലക്സി ഫോൾഡബിൾ ഫോണുകൾക്ക് കരുത്തേകാൻ വീണ്ടും ക്വാൽകോം എത്തുന്നു
സ്മാർട്ട്ഫോൺ ലോകം ഏറെ ആകാംഷയോടെ കാത്തിരിക്കുന്ന സാംസങ്ങിന്റെ അടുത്ത തലമുറ ഗാലക്സി ഫോൾഡബിൾ ഫോണുകൾക്ക് കരുത്തേകാൻ വീണ്ടും ക്വാൽകോം എത്തുന്നു. കൂടുതൽ വേഗതയും മികച്ച എഐ ശേഷിയുമുള്ള ക്വാൽകോമിന്റെ
സ്മാർട്ട്ഫോൺ ലോകം ഏറെ ആകാംഷയോടെ കാത്തിരിക്കുന്ന സാംസങ്ങിന്റെ അടുത്ത തലമുറ ഗാലക്സി ഫോൾഡബിൾ ഫോണുകൾക്ക് കരുത്തേകാൻ വീണ്ടും ക്വാൽകോം എത്തുന്നു. കൂടുതൽ വേഗതയും മികച്ച എഐ ശേഷിയുമുള്ള ക്വാൽകോമിന്റെ പ്രത്യേക ‘സ്നാപ്ഡ്രാഗൺ ഫോർ ഗാലക്സി’ ചിപ്സെറ്റാകും ഈ ഫോണുകളിൽ ഉപയോഗിക്കുക എന്ന സൂചനകൾ ശക്തമായി. ക്വാൽകോം കൊറിയയുടെ പ്രസിഡന്റ് സ്പെൻസർ കിം പങ്കുവെച്ച ഔദ്യോഗിക ടീസർ വീഡിയോയാണ് ഈ അഭ്യൂഹങ്ങൾക്ക് അടിവരയിടുന്നത്.
ലിങ്ക്ഡ്ഇനിൽ പങ്കുവെച്ച പുതിയ വീഡിയോയിലൂടെയാണ് ഈ വിവരങ്ങൾ പുറത്തുവന്നത്. ‘സ്നാപ്ഡ്രാഗൺ 8 എലൈറ്റ് ഫോർ ഗാലക്സി’ എന്ന് വ്യക്തമായി ബ്രാൻഡിങ് ചെയ്ത ചിപ് ഒരു സർക്യൂട്ട് ബോർഡിൽ സ്ഥാപിക്കുന്ന ദൃശ്യങ്ങളാണ് വീഡിയോയുടെ തുടക്കത്തിലുള്ളത്. ഇതിന് തൊട്ടുപിന്നാലെ സാംസങ്ങിന്റെ ലോഗോയും ‘പവർ അപ്പ് വിത്ത് സ്നാപ്ഡ്രാഗൺ’ എന്ന സന്ദേശവും പ്രത്യക്ഷപ്പെടുന്നു. വരാനിരിക്കുന്ന പുതിയ ഫോൾഡബിൾ ഫോണിന്റെ പേരോ മറ്റ് സാങ്കേതിക വിവരങ്ങളോ കമ്പനി ഔദ്യോഗികമായി വെളിപ്പെടുത്തിയിട്ടില്ലെങ്കിലും സാംസങ്-ക്വാൽകോം കൂട്ടുകെട്ട് പുതിയ തലത്തിലേക്ക് ഉയരുകയാണെന്ന് ഈ ടീസർ വ്യക്തമാക്കുന്നു.
ഫ്ലാഗ്ഷിപ്പ് സ്മാർട്ട്ഫോൺ വിപണിയിൽ കഴിഞ്ഞ ഏതാനും വർഷങ്ങളായി സാംസങ്ങും ക്വാൽകോമും തമ്മിൽ ശക്തമായ പങ്കാളിത്തമുണ്ട്. ആഗോള വിപണിയിലെ തങ്ങളുടെ പ്രീമിയം ഗാലക്സി മോഡലുകൾക്കായി ക്വാൽകോമിന്റെ കസ്റ്റമൈസ്ഡ് പ്രോസസറുകളാണ് സാംസങ് തിരഞ്ഞെടുക്കാറുള്ളത്. സാധാരണ ചിപ്പുകളെ അപേക്ഷിച്ച് ഉയർന്ന പ്രകടനം, മികച്ച ആർട്ടിഫിഷ്യൽ ഇന്റലിജൻസ് സവിശേഷതകൾ, അഡ്വാൻസ്ഡ് ക്യാമറ പ്രോസസിങ്, കുറഞ്ഞ അളവിൽ മാത്രം ബാറ്ററി ഉപയോഗിക്കുന്ന കാര്യക്ഷമത എന്നിവയാണ് ഇരു കമ്പനികളും സംയുക്തമായി വികസിപ്പിക്കുന്ന ഈ ചിപ്സെറ്റുകളുടെ പ്രത്യേകത.
ഇതിനിടെ ക്വാൽകോമിന്റെ അടുത്ത തലമുറ ഫ്ലാഗ്ഷിപ്പ് പ്രോസസറുകളെക്കുറിച്ചുള്ള ചില ചോർച്ചകളും ടെക് ലോകത്ത് സജീവമാണ്. ‘സ്നാപ്ഡ്രാഗൺ 8 എലൈറ്റ് ജെൻ 6’, ‘സ്നാപ്ഡ്രാഗൺ 8 എലൈറ്റ് ജെൻ 6 പ്രോ’ എന്നീ രണ്ട് പതിപ്പുകൾ കമ്പനി അണിയറയിൽ ഒരുക്കുന്നുണ്ടെന്നാണ് റിപ്പോർട്ടുകൾ. ഇതിൽ ‘പ്രോ’ പതിപ്പിൽ കൂടുതൽ കരുത്തുറ്റ അഡ്രിനോ ജിപിയു, മെച്ചപ്പെട്ട മെമ്മറി പിന്തുണ എന്നിവ ഉണ്ടാകുമെന്നാണ് സൂചന. എന്നാൽ ക്വാൽകോം ഇക്കാര്യം ഇതുവരെ ഔദ്യോഗികമായി സ്ഥിരീകരിച്ചിട്ടില്ല. പുതിയ ഗാലക്സി ഫോൾഡബിൾ സ്മാർട്ട്ഫോണുകളുടെ അവതരണ തീയതി സാംസങ് ഇതുവരെ പ്രഖ്യാപിച്ചിട്ടില്ലാത്തതിനാൽ, ഈ പുത്തൻ സാങ്കേതികവിദ്യകളുടെ പൂർണ്ണമായ വിവരങ്ങൾ അറിയാൻ ഔദ്യോഗിക ലോഞ്ച് ഇവന്റ് വരെ കാത്തിരിക്കേണ്ടി വരും.