ന്യൂഡൽഹി: മോട്ടോറോളയുടെ മോട്ടോ പാഡ് 70 ഇന്ത്യയിൽ വിൽപ്പനയ്ക്ക് എത്തി. ഓഗസ്റ്റ് 15ന് ഉച്ചയ്ക്ക് 12 മണി മുതൽ വിൽപ്പന ആരംഭിച്ച ടാബ്‌ലെറ്റിൻ്റെ 8 ജിബി റാം, 256 ജിബി സംഭരണ ശേഷിയുള്ള പതിപ്പിന് 33,999 രൂപയാണ് വില. ബാങ്ക് ഓഫറിലൂടെ 4,000 രൂപയുടെ തൽക്ഷണ ഇളവോടെ 29,999 രൂപയാണ് ഫലപ്രദമായ വില.

6.29 മില്ലിമീറ്റർ കനവും 530 ഗ്രാം ഭാരവുമുള്ള മോട്ടോ പാഡ് 70-ൽ 12.1 ഇഞ്ച് 2.5കെ ഡിസ്‌പ്ലേ, മീഡിയടെക് ഡൈമെൻസിറ്റി 6400 പ്രോസസർ, 8 ജിബി റാം, 256 ജിബി സംഭരണം എന്നിവയുണ്ട്. മൈക്രോ എസ്‌ഡി കാർഡ് വഴി സംഭരണം 2 ടിബി വരെ വർധിപ്പിക്കാം. 10,200 എംഎഎച്ച് ബാറ്ററി, 68 വാട്ട് അതിവേഗ ചാർജിംഗ്, 5ജി കണക്റ്റിവിറ്റി, ഡോൾബി അറ്റ്‌മോസ് പിന്തുണയുള്ള നാല് സ്‌പീക്കറുകൾ എന്നിവയാണ് മറ്റ് സവിശേഷതകൾ. മോട്ടോ പെൻ ഉൾപ്പെടെയാണ് ടാബ്‌ലെറ്റ് ലഭിക്കുന്നത്. കൃത്രിമബുദ്ധി അധിഷ്ഠിത എഴുത്ത് സംവിധാനങ്ങൾ, എഐ നോട്ട്സ്, ഗൂഗിൾ ജെമിനി, ഗൂഗിൾ സർക്കിൾ ടു സെർച്ച് തുടങ്ങിയ സൗകര്യങ്ങളും ഉൾപ്പെടുത്തിയിട്ടുണ്ട്.

ഫ്ലിപ്കാർട്ട്, മോട്ടോറോളയുടെ വെബ്സൈറ്റ്, രാജ്യത്തെ പ്രമുഖ റീട്ടെയിൽ ശൃംഖലകൾ എന്നിവിടങ്ങളിൽ പാന്റോൺ സീ ഏഞ്ചൽ നിറത്തിൽ മോട്ടോ പാഡ് 70 ലഭ്യമാണ്.