ഫേസ്ബുക്ക്, ഇൻസ്റ്റാഗ്രാം, വാട്ട്‌സ്ആപ്പ് തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളെ ഏകോപിപ്പിക്കുന്നതിന്റെ ഭാഗമായി പുതിയ സബ്‌സ്‌ക്രിപ്ഷൻ പദ്ധതികൾ പരീക്ഷിക്കാൻ ഒരുങ്ങുകയാണ് മെറ്റ. ‘മെറ്റാ വൺ’ എന്ന ഏകീകൃത പ്ലാറ്റ്‌ഫോമിന് കീഴിൽ ഈ സേവനങ്ങൾ കൊണ്ടുവരാനാണ് കമ്പനിയുടെ നീക്കം. വാട്ട്‌സ്ആപ്പിന്റെ ആൻഡ്രോയിഡ് പതിപ്പിൽ മെറ്റാ വൺ സബ്‌സ്‌ക്രിപ്ഷൻ ഉൾപ്പെടുത്താനുള്ള പ്രവർത്തനങ്ങൾ ഇതിനകം ആരംഭിച്ചതായാണ് റിപ്പോർട്ടുകൾ.

വാബീറ്റ ഇൻഫോയുടെ റിപ്പോർട്ടുകൾ പ്രകാരം, വാട്ട്‌സ്ആപ്പ് ബീറ്റാ ഫോർ ആൻഡ്രോയിഡ് പതിപ്പിൽ ‘മെറ്റാ വൺ പ്ലസ്’, ‘മെറ്റാ വൺ പ്രീമിയം’ എന്നീ രണ്ട് പ്ലാനുകളുടെ സൂചനകൾ കണ്ടെത്തിയിട്ടുണ്ട്. ഭാവിയിൽ ഉപയോക്താക്കൾക്ക് വാട്ട്‌സ്ആപ്പിൽ നിന്നുതന്നെ ഈ സബ്‌സ്‌ക്രിപ്ഷൻ പ്ലാനുകൾ തിരഞ്ഞെടുക്കാനും നിയന്ത്രിക്കാനും സാധിക്കും.

പദ്ധതികളുടെ വിവരങ്ങൾ ഇങ്ങനെ

മെറ്റാ വൺ പ്ലസ്: പ്രതിമാസം ഏകദേശം 6.99 യൂറോ (ഏകദേശം 700 രൂപ) ആയിരിക്കും ഈ പ്ലാനിന്റെ നിരക്ക്. വാട്ട്‌സ്ആപ്പ് പ്ലസ് ആനുകൂല്യങ്ങൾക്ക് പുറമെ മെറ്റയുടെ എഐ അധിഷ്ഠിത ചിത്ര-വീഡിയോ സൃഷ്ടി ടൂളുകളിലേക്ക് കൂടുതൽ പ്രവേശനം ഇതിലൂടെ ലഭിക്കും.

മെറ്റാ വൺ പ്രീമിയം: പ്രതിമാസം 20.99 യൂറോ (ഏകദേശം 2,200 രൂപ) നിരക്കിലുള്ള ഈ പ്ലാനിൽ ഒരു മാസത്തെ സൗജന്യ ട്രയൽ ലഭ്യമാകാൻ സാധ്യതയുണ്ട്. പ്ലസ് പ്ലാനിലെ ഫീച്ചറുകൾക്ക് പുറമെ കൂടുതൽ ശക്തമായ എഐ ശേഷികൾ, സങ്കീർണ്ണമായ ചോദ്യങ്ങൾക്ക് മെച്ചപ്പെട്ട പ്രതികരണങ്ങൾ, കൂടുതൽ ഇമേജ്-വീഡിയോ ജനറേഷൻ പരിധി തുടങ്ങിയവയും ഇതിൽ ഉൾപ്പെടും.

രണ്ട് പ്ലാനുകളിലും വാട്ട്‌സ്ആപ്പ് പ്ലസ് സൗകര്യങ്ങൾ ലഭ്യമാകുമെന്നാണ് പ്രതീക്ഷിക്കുന്നത്. പുതിയ തീമുകൾ, കസ്റ്റം റിങ്ടോണുകൾ, കൂടുതൽ പിൻ ചെയ്ത ചാറ്റുകൾ, ലിസ്റ്റ് കസ്റ്റമൈസേഷൻ, പ്രീമിയം സ്റ്റിക്കറുകൾ തുടങ്ങി ഉപയോക്തൃ അനുഭവം മെച്ചപ്പെടുത്തുന്ന ഫീച്ചറുകൾ ഇതിന്റെ ഭാഗമായി വരും.

എങ്കിലും, ഈ വിവരങ്ങൾ മെറ്റയുടെ ഔദ്യോഗിക പ്രഖ്യാപനമല്ല. ബീറ്റാ പതിപ്പിൽ കണ്ടെത്തിയ സൂചനകളുടെ അടിസ്ഥാനത്തിൽ മാത്രമുള്ള റിപ്പോർട്ടുകളാണിത്. അതിനാൽ, പ്ലാനുകളുടെ വിലയിലോ സവിശേഷതകളിലോ ഭാവിയിൽ മാറ്റങ്ങൾ വരാൻ സാധ്യതയുണ്ട്. മെറ്റാ വൺ സേവനം നിലവിൽ വന്നാൽ കമ്പനിയുടെ വിവിധ പ്ലാറ്റ്‌ഫോമുകളിലെ പ്രീമിയം സേവനങ്ങൾ ഒരൊറ്റ സബ്‌സ്‌ക്രിപ്ഷനിലൂടെ ഉപയോക്താക്കൾക്ക് ആസ്വദിക്കാൻ സാധിക്കും.