‘വിസ്’ നെ 32 ശതകോടി ഡോളറിന് സ്വന്തമാക്കി ഗൂഗിൾ 

 സൈബർ സുരക്ഷാ രംഗത്തെ പ്രമുഖ സ്റ്റാർട്ടപ്പായ ‘വിസ്’ നെ 32 ശതകോടി ഡോളറിന് (ഏകദേശം 2.97 ലക്ഷം കോടി രൂപ) സ്വന്തമാക്കി ഗൂഗിൾ പുതിയ ചരിത്രം കുറിച്ചു. ഗൂഗിളിന്റെ ചരിത്രത്തിലെ തന്നെ ഏറ്റവും വലിയ ഏറ്റെടുക്കലാണിത്. ആമസോൺ വെബ് സർവീസസ്, മൈക്രോസോഫ്റ്റ് അഷ്വർ തുടങ്ങിയ വമ്പൻമാരുമായി ക്ലൗഡ് വിപണിയിൽ മത്സരിക്കുന്ന ഗൂഗിളിന്, ഈ നീക്കം തങ്ങളുടെ ക്ലൗഡ് സുരക്ഷാ സേവനങ്ങളെ കൂടുതൽ കരുത്തുറ്റതാക്കാൻ സഹായിക്കും. വെഞ്ചർ പിന്തുണയോടെ പ്രവർത്തിക്കുന്ന ഒരു സ്റ്റാർട്ടപ്പിനായി ലോകത്ത് നടന്നിട്ടുള്ളതിൽ വെച്ച് ഏറ്റവും വലിയ ഇടപാട് കൂടിയാണിത്.

ക്ലൗഡ് ഇൻഫ്രാസ്ട്രക്ചറും പ്രൊഡക്ഷൻ കോഡും സുരക്ഷിതമാക്കുന്നതിൽ സമാനതകളില്ലാത്ത പ്രകടനമാണ് ‘വിസ്’ കാഴ്ചവെക്കുന്നത്. ആർട്ടിഫിഷ്യൽ ഇന്റലിജൻസും ക്ലൗഡ് കംപ്യൂട്ടിങ്ങും തൊഴിൽ മേഖലകളെ മാറ്റിമറിക്കുമ്പോൾ, സൈബർ സുരക്ഷ ഉറപ്പാക്കുക എന്നത് അതീവ പ്രാധാന്യമുള്ള കാര്യമാണ്. മുമ്പ് ഗൂഗിളിന്റെ വാഗ്ദാനങ്ങൾ നിരസിച്ചിട്ടുള്ള വിസ്, അസഫ് റപ്പപ്പോർട്ട്, അമി ലുത്വക്, റോയ് റെസ്നിക് എന്നിവരുടെ നേതൃത്വത്തിലാണ് പ്രവർത്തിക്കുന്നത്. ഗൂഗിളിന്റെ ആധുനിക സാങ്കേതിക വിദ്യകളും വിസ്സിന്റെ സുരക്ഷാ സംവിധാനങ്ങളും ഒന്നിക്കുന്നത് ഡിജിറ്റൽ ലോകത്തിന് വലിയ മാറ്റങ്ങൾ സമ്മാനിക്കും.