തിരുവനന്തപുരം: ബംഗാളിനെതിരായ രഞ്ജി ട്രോഫി മത്സരത്തിൽ ഒന്നാം ഇന്നിങ്സിൽ കേരളം 141 റൺസിന് പുറത്തായി. ഇതോടെ ബംഗാളിന് 209 റൺസിന്റെ ഒന്നാം ഇന്നിങ്സ് ലീഡായി. 47 പന്തിൽ 41 റൺസ് നേടിയ ക്യാപ്റ്റൻ വിഷ്ണു വിനോദാണ് കേരളത്തിന്റെ ടോപ് സ്കോറർ. 30 റൺസെടുത്ത മുഹമ്മദ് അസറുദ്ദീൻ മാത്രമാണ് വിഷ്ണുവിന് പുറമെ ബാറ്റിങ്ങിൽ അല്പമെങ്കിലും പൊരുതിയത്. സൽമാൻ നിസാർ (11), സച്ചിൻ ബേബി (23) അടക്കമുള്ള മുൻനിര താരങ്ങൾ നിരാശപ്പെടുത്തി.

മൂന്നാം ദിനം 6 വിക്കറ്റിന് 101 റൺസ് എന്ന നിലയിൽ ബാറ്റിങ് ആരംഭിച്ച കേരളത്തിന് തുടക്കത്തിൽ തന്നെ തിരിച്ചടിയേറ്റു. ജലജ് സക്സേനയും (20) തൊട്ടുപിന്നാലെ വൈശാഖ് ചന്ദ്രനും പ്രദീപ്ത പ്രമാണിക്കിന്റെ പന്തിൽ പുറത്തായി. എം.ഡി. നിധീഷ് റണ്ണൊന്നുമെടുക്കാതെ മടങ്ങുകയും നെടുമാൻകുഴി ബേസിൽ റണ്ണൗട്ടാകുകയും ചെയ്തതോടെ കേരളത്തിന്റെ ഇന്നിങ്സ് 141 റൺസിൽ അവസാനിക്കുകയായിരുന്നു. ബംഗാളിനായി പ്രദീപ്ത പ്രമാണിക് നാലും ഷഹബാസ് അഹമ്മദ് രണ്ടും വിക്കറ്റ് വീഴ്ത്തി.

അതേസമയം, ഇന്ത്യൻ വെറ്ററൻ പേസർ മുഹമ്മദ് ഷമിയുടെ തകർപ്പൻ ബൗളിങ് പ്രകടനമാണ് മത്സരത്തിൽ ശ്രദ്ധേയമായത്. 11 ഓവറിൽ 35 റൺസ് മാത്രം വഴങ്ങി ഷമി മൂന്ന് വിക്കറ്റുകൾ വീഴ്ത്തി. ഓപ്പണർ അഭിഷേക് നായരെയും ക്യാപ്റ്റൻ വിഷ്ണു വിനോദിനെയും ബോൾഡാക്കിയാണ് ഷമി കേരളത്തെ പ്രതിരോധത്തിലാക്കിയത്.നേരത്തെ, ഒന്നാം ഇന്നിങ്സിൽ ഷഹബാസ് അഹമ്മദിന്റെ (100+) സെഞ്ചുറിയുടെയും അങ്കുർ പോൾ (66), സുമന്ത ഗുപ്ത (49) എന്നിവരുടെ മികച്ച പ്രകടനത്തിന്റെയും ബലത്തിൽ ബംഗാൾ 350 റൺസ് നേടിയിരുന്നു. കേരളത്തിനായി ആദിത്യ സർവാതെ നാല് വിക്കറ്റും നെടുമാൻകുഴി ബേസിൽ മൂന്ന് വിക്കറ്റും വീഴ്ത്തി.