ഡൽഹി : ഇന്ത്യൻ ഒളിംപിക് അസോസിയേഷൻ (ഐഒഎ) തെരഞ്ഞെടുപ്പില്‍ നിലവിലെ പ്രസിഡന്റ് പി ടി ഉഷയ്ക്ക് തിരിച്ചടി.സ്പോർട്സ് പേഴ്സണ്‍ ഔട്ട്സ്റ്റാൻഡിങ് വിഭാഗത്തിലേക്കുള്ള തെരഞ്ഞെടുപ്പില്‍ ഉഷ പരാജയപ്പെട്ടു.

ഒഴിവുള്ള നാല് വനിതാ സ്ഥാനങ്ങളിലേക്ക് നടന്ന മത്സരത്തില്‍ ഒളിംപിക് മെഡല്‍ ജേതാവ് സൈന നെഹ്‌വാള്‍, മുൻ ലോങ് ജംപ് താരം അഞ്ജു ബോബി ജോർജ്, മുൻ അമ്പെയ്ത്ത് താരം ഡോള ബാനർജി, മുൻ ഇന്ത്യൻ വനിതാ ഹോക്കി ക്യാപ്റ്റൻ റാണി റാംപാല്‍ എന്നിവർ വിജയിച്ചു. പി.ടി. ഉഷയും മുൻ ബാസ്കറ്റ്ബോള്‍ താരം അനിത പോള്‍ ദുരൈയും പരാജയപ്പെട്ടു.തെരഞ്ഞെടുപ്പ് ഫലം നിർണായകമാണ്.

വിജയിക്കുന്ന നാല് പുരുഷന്മാരും നാല് വനിതകളും ഉള്‍പ്പെടുന്ന എട്ട് എസ്‌ഒഎം പ്രതിനിധികള്‍ ഐഒഎ ജനറല്‍ അസംബ്ലിയില്‍ അംഗങ്ങളാകും. ഇവർക്കാണ് ഡിസംബർ അഞ്ചിന് നടക്കുന്ന പുതിയ എക്സിക്യൂട്ടീവ് കൗണ്‍സില്‍ തെരഞ്ഞെടുപ്പില്‍ മത്സരിക്കാനും വോട്ട് ചെയ്യാനും യോഗ്യത ലഭിക്കുക.

2022 ഡിസംബറില്‍ ഐഒഎ അധ്യക്ഷയായി തെരഞ്ഞെടുക്കപ്പെടുന്നതിന് മുമ്പ് പി ടി ഉഷയും ഇതേ വഴിയിലൂടെയാണ് ജനറല്‍ അസംബ്ലിയില്‍ അംഗത്വം നേടിയത്. വനിതാ വിഭാഗത്തിലെ നാല് സ്ഥാനങ്ങളിലേക്ക് ആറുപേർ രംഗത്തെത്തിയതോടെയാണ് തെരഞ്ഞെടുപ്പ് വേണ്ടിവന്നത്. എന്നാല്‍ പുരുഷ വിഭാഗത്തില്‍ നാല് സ്ഥാനങ്ങളിലേക്ക് നാല് സ്ഥാനാർഥികള്‍ മാത്രമുണ്ടായിരുന്നതിനാല്‍ എതിരില്ലാതെയാണ് വിജയികളെ തീരുമാനിച്ചത്.