കുവൈത്തിലെ അബ്ബാസിയയില്‍ നഴ്സുമാരുമായി പോയ ബസ് മറിഞ്ഞ് അപകടം. അപകടത്തില്‍ പരിക്കേറ്റ 10 പേര്‍ ഫര്‍വാനിയ ആശുപത്രിയില്‍ ചികിത്സയില്‍ തുടരുകയാണ്. ഇവരില്‍ കൈക്ക് ഗുരുതരമായി പരിക്കേറ്റ മലയാളി നഴ്സ് അപകടനില തരണം ചെയ്തുവരുന്നതായാണ് ആശുപത്രിയില്‍ നിന്ന് ലഭിക്കുന്ന വിവരം. മറ്റ് പത്ത് പേരുടെയും പരിക്കുകള്‍ ഗുരുതരമല്ലെന്നാണ് റിപ്പോര്‍ട്ട്.

അപകടത്തില്‍ പരിക്കേറ്റവരെല്ലാം ഫര്‍വാനിയ ആശുപത്രിയില്‍ ജോലി ചെയ്യുന്ന വനിതാ നഴ്സുമാരാണ്. ഇവരില്‍ ഭൂരിഭാഗവും മലയാളികളാണെന്നാണ് വിവരം. ചൊവ്വാഴ്ച രാത്രി 9.30ഓടെയാണ് അപകടമുണ്ടായത്. അബ്ബാസിയയില്‍നിന്ന് ഫര്‍വാനിയ ആശുപത്രിയിലേക്ക് നൈറ്റ് ഷിഫ്റ്റ് ജോലിക്കായി പോകുകയായിരുന്ന നഴ്സുമാര്‍ സഞ്ചരിച്ച ബസാണ് അപകടത്തില്‍പ്പെട്ടത്. അബ്ബാസിയ ഫയര്‍ സ്റ്റേഷന് സമീപമെത്തിയപ്പോള്‍ നിയന്ത്രണം നഷ്ടപ്പെട്ട ബസ് റോഡില്‍ മറിയുകയായിരുന്നു. മലയാളി ഉടമസ്ഥതയിലുള്ള സ്വകാര്യ ട്രാന്‍സ്‌പോര്‍ട്ടേഷന്‍ സ്ഥാപനത്തിന്റെ ബസാണ് അപകടത്തില്‍പ്പെട്ടതെന്നാണ് വിവരം. അപകടം നടന്നതിന് പിന്നാലെ ബസ് ഡ്രൈവര്‍ സ്ഥലത്തുനിന്ന് ഓടി രക്ഷപ്പെട്ടതായി ദൃക്‌സാക്ഷികള്‍ പറയുന്നു. എന്നാല്‍ ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല.

വിവരമറിഞ്ഞ് സ്ഥലത്തെത്തിയ പൊലീസ് പരിക്കേറ്റവരെ ആശുപത്രിയിലേക്ക് മാറ്റുന്നതിനുള്ള നടപടികള്‍ സ്വീകരിച്ചു. അപകടത്തില്‍പ്പെട്ട നഴ്സുമാര്‍ക്ക് ഫര്‍വാനിയ ആശുപത്രിയില്‍ ചികിത്സ ലഭ്യമാക്കിയിട്ടുണ്ട്. ബസ് നിയന്ത്രണം വിട്ട് മറിയാനുണ്ടായ സാഹചര്യം ഉള്‍പ്പെടെ അപകടത്തിന്റെ കാരണങ്ങള്‍ കണ്ടെത്താന്‍ പൊലീസ് അന്വേഷണം ആരംഭിച്ചു