ഇറാനില്‍ നിന്നുണ്ടായ പുതിയ മിസൈല്‍, ഡ്രോണ്‍ ആക്രമണ ശ്രമങ്ങളെ ബഹ്‌റൈന്റെ വ്യോമ പ്രതിരോധ സംവിധാനം തകര്‍ത്തു. ബുധനാഴ്ച അതിരാവിലെയാണ് ബഹ്‌റൈനെ ലക്ഷ്യമിട്ട് ഇറാന്റെ ഭാഗത്തുനിന്ന് ആകാശ ഭീഷണിയുണ്ടായത്. ആക്രമണ ഭീഷണിയെത്തുടര്‍ന്ന് രാജ്യത്തുടനീളം വ്യോമാക്രമണ മുന്നറിയിപ്പ് നല്‍കുന്ന എയര്‍ റൈഡ് സൈറണുകള്‍ മുഴങ്ങി.

ഇറാനിലെ വിവിധ സൈനിക താവളങ്ങള്‍ക്ക് നേരെ യുഎസ് വ്യോമാക്രമണം നടത്തിയതിന് തൊട്ടുപിന്നാലെയാണ് ബഹ്‌റൈനിലെ യുഎസ് സൈനിക കേന്ദ്രങ്ങളെ ലക്ഷ്യമിട്ട് ഇറാന്റെ റെവല്യൂഷണറി ഗാര്‍ഡ്‌സ് മിസൈലുകളും ഡ്രോണുകളും തൊടുത്തുവിട്ടത്. എന്നാല്‍ ബഹ്‌റൈന്റെയും സഖ്യസേനയുടെയും കരുത്തുറ്റ വ്യോമ പ്രതിരോധ സംവിധാനങ്ങള്‍ ഈ ആക്രമണശ്രമങ്ങളെ ആകാശത്തുവെച്ചുതന്നെ വെടിവെച്ചിടുകയായിരുന്നു.