ലോകത്തിലെ ഏറ്റവും വലിയ പുഷ്‌പോദ്യാനങ്ങളിലൊന്നായ ദുബായ് മിറാക്കിള്‍ ഗാര്‍ഡന്‍ 15-ാം സീസണ്‍ ഒക്ടോബര്‍ 8 മുതല്‍ സന്ദര്‍ശകര്‍ക്കായി വീണ്ടും തുറക്കും. ശൈത്യകാലത്ത് ദുബായിലെ പ്രധാന വിനോദസഞ്ചാര ആകര്‍ഷണങ്ങളിലൊന്നായ മിറാക്കിള്‍ ഗാര്‍ഡന്‍ വര്‍ണാഭമായ പുഷ്പാലങ്കാരങ്ങളും കുടുംബസൗഹൃദ ആകര്‍ഷണങ്ങളുമായി ഇത്തവണയും സന്ദര്‍ശകരെ വരവേല്‍ക്കും.

15-ാം സീസണിലേക്കുള്ള ടിക്കറ്റുകള്‍ ഇപ്പോള്‍ ലഭ്യമാണ്. സാധുവായ എമിറേറ്റ്‌സ് ഐഡി ഹാജരാക്കുന്ന യുഎഇ സ്വദേശികള്‍ക്കും താമസക്കാര്‍ക്കും പ്രത്യേക ഇളവോടെയാണ് പ്രവേശനം അനുവദിക്കുന്നത്. യുഎഇ സ്വദേശികള്‍ക്കും താമസക്കാര്‍ക്കും മുതിര്‍ന്നവര്‍ക്കുള്ള ടിക്കറ്റ് നിരക്ക് 70 ദിര്‍ഹവും കുട്ടികള്‍ക്കുള്ളത് 50 ദിര്‍ഹവുമാണ്. മൂന്ന് വയസില്‍ താഴെയുള്ള കുട്ടികള്‍ക്ക് സൗജന്യ പ്രവേശനമുണ്ട് എന്ന് അധികൃതര്‍ വ്യക്തമാക്കി. പൊതുജനങ്ങള്‍ക്ക് മുതിര്‍ന്നവരുടെ ടിക്കറ്റ് 100 ദിര്‍ഹവും കുട്ടികളുടെ ടിക്കറ്റ് 80 ദിര്‍ഹവുമാണ്. മൂന്ന് വയസില്‍ താഴെയുള്ള കുട്ടികള്‍ക്ക് പ്രവേശനം സൗജന്യമായിരിക്കും. ദുബായ് മിറാക്കിള്‍ ഗാര്‍ഡനും ദുബായ് ബട്ടര്‍ഫ്‌ലൈ ഗാര്‍ഡനും ഒരുമിച്ച് സന്ദര്‍ശിക്കാനാകുന്ന കോമ്പോ ടിക്കറ്റിന് 140 ദിര്‍ഹമാണ്. ഈ എല്ലാ നിരക്കുകളും വാറ്റ് ഉള്‍പ്പെടാത്തതാണ്. ടിക്കറ്റുകള്‍ ദുബായ് മിറാക്കിള്‍ ഗാര്‍ഡന്റെ ഔദ്യോഗിക വെബ്‌സൈറ്റിലൂടെ ലഭ്യമാണ്.

150 മില്യനിലധികം പൂക്കള്‍ കൊണ്ട് അലങ്കരിച്ച വിസ്മയകരമായ പുഷ്പശില്പങ്ങളും പ്രമേയപരമായ പ്രദര്‍ശനങ്ങളുമാണ് ദുബായ് മിറാക്കിള്‍ ഗാര്‍ഡന്റെ പ്രധാന ആകര്‍ഷണം. ഓരോ വര്‍ഷവും ലക്ഷക്കണക്കിന് വിനോദസഞ്ചാരികളെയും താമസക്കാരെയും ആകര്‍ഷിക്കുന്ന ഈ ഗാര്‍ഡന്‍ ദുബായിലെ ഏറ്റവും കൂടുതല്‍ ആളുകള്‍ ഫോട്ടോകള്‍ എടുക്കുന്ന വിനോദസഞ്ചാര കേന്ദ്രങ്ങളിലൊന്നാണ്.