കോഴിക്കോട്: കുറ്റ്യാടി തൊട്ടിൽപ്പാലം റോഡിൽ ബസും ബൈക്കും കൂട്ടിയിടിച്ച് യുവാവിന് ദാരുണാന്ത്യം.തളീക്കര കഞ്ഞിരോളിയിൽ ഇന്നലെ രാവിലെയോടെയായിരുന്നു അപകടം. പൂളക്കണ്ടി സ്വദേശിയായ അടുക്കത്ത് നബീൽ(43) ആണ് മരിച്ചത്. 

തൊട്ടിൽപ്പാലത്തേക്ക് പോകുകയായിരുന്ന നബീൽ സഞ്ചരിച്ച ബൈക്കിൽ അമിത വേഗതയിലെത്തിയ ബസ് ഇടിക്കുകയിരുന്നുവെന്ന് ദൃക്സാക്ഷികൾ പറഞ്ഞു. തലശ്ശേരി-തൊട്ടിൽപ്പാലം റൂട്ടിൽ സർവീസ് നടത്തുന്ന ദേവരാഗം ബസാണ് അപകടമുണ്ടാക്കിയത്. ഇടിയുടെ ആഘാതത്തിൽ റോഡിലേക്ക് തെറിച്ചുവീണ നബീൽ തൽക്ഷണം മരിച്ചുവെന്നാണ് ലഭിക്കുന്ന വിവരം. അതേസമയം, റോഡരികിൽ അപകടകരമാം വിധമുള്ള മരമാണ് അപകടത്തിനിടയാക്കിയതെന്നും ആരോപണമുണ്ട്. സംഭവത്തിൽ പ്രതിഷേധിച്ച് നാട്ടുകാർ കഞ്ഞിരോളി- കുറ്റ്യാടി റോഡ് ഉപരോധിച്ചു. പിന്നീട് പൊലീസ് സ്ഥലത്തെത്തിയാണ് രംഗം ശാന്തമാക്കിയത്.