കൊല്ലം :  പഞ്ചായത്ത് ഉൾപ്പെടെയുള്ള തദ്ദേശസ്ഥാപനങ്ങൾ നിർമിച്ച 504 പുതിയ ഗ്രാമീണ റോഡുകളിൽ മിനി ബസ് സർവീസ് ഉടൻ ആരംഭിക്കുമെന്ന് ഗതാഗത വകുപ്പ് മന്ത്രി കെ ബി ഗണേഷ്‌കുമാർ. പട്ടാഴി വടക്കേക്കര ഗ്രാമപഞ്ചായത്തിന്റെ വികസനസദസ് കടുവത്തോട് പട്ടാഴി വടക്കേക്കര മുസ്ലിം ജമാഅത്ത് മദ്രസ ഹാളിൽ  ഉദ്ഘാടനം ചെയ്യുകയായിരുന്നു അദേഹം. പത്തനാപുരം ബ്ലോക്ക് പഞ്ചായത്ത് പ്രസിഡന്റ് എ. ആനന്ദവല്ലി മുഖ്യപ്രഭാഷണം നടത്തി. പഞ്ചായത്ത് സെക്രട്ടറി എ. ശിഹാബുദ്ദീൻ റിപ്പോർട്ട് അവതരിപ്പിച്ചു.

കഴിഞ്ഞ അഞ്ചുവർഷത്തിനുള്ളിൽ  പഞ്ചായത്ത് വിവിധ മേഖലകളിലായി 200,712,799 രൂപ വികസനപദ്ധതികൾക്കും സബ്‌സിഡി ആനുകൂല്യങ്ങൾക്കുമായി ചിലവഴിച്ചു. ദേശീയ ഗ്രാമീണതൊഴിലുറപ്പ്പദ്ധതി പ്രകാരം 20.28 കോടി  രൂപ ചിലവഴിച്ചു. ഭവനനിർമ്മാണ പദ്ധതികൾ, വയോജനങ്ങൾ, ഭിന്നശേഷിവിഭാഗങ്ങൾ എന്നിവരുടെ സാമൂഹ്യസുരക്ഷയ്ക്ക്  ഊന്നൽനൽകുന്ന പദ്ധതികൾ നടപ്പാക്കി.
വികസന സദസിനോടനുബന്ധിച്ച് തൊഴിൽമേളയും വിപണനമേളയും നടത്തി. കോവിഡ് സമയത്ത് മികച്ചപ്രവർത്തനം കാഴ്ചവെച്ച പ്രാഥമിക ആരോഗ്യകേന്ദ്രം, മികച്ച അംഗൻവാടിക്കുള്ള അവാർഡ് നേടിയ ഏറനാട് അംഗൻവാടി, ഹരിതകർമ്മ സേനാംഗങ്ങൾ, സാമൂഹികസേവന പ്രവർത്തനങ്ങൾക്ക് പിന്തുണ നൽകിയവർ എന്നിവരെ ആദരിച്ചു.

 ഗ്രാമപഞ്ചായത്ത് പ്രസിഡന്റ് വി.പി. രമാദേവി അധ്യക്ഷയായി, വൈസ് പ്രസിഡന്റ് എസ്. മസൂദ്ഖാൻ, ജില്ലാ പഞ്ചായത്ത് മെമ്പർ സുനിത രാജേഷ്, ബ്ലോക്ക് പഞ്ചായത്ത് അംഗം രതി ബി, സ്ഥിരംസമിതി അധ്യക്ഷരായ  അശ്വതി എം.ജി, ശോഭന ശശിധരൻ, പട്ടാഴി വടക്കേക്കര എസ്.സി.ബി. പ്രസിഡന്റ് ബി. സുനിൽ, കുടുംബശ്രീ ചെയർപേഴ്‌സൺ ഒ ഉഷാകുമാരി തുടങ്ങിയവർ പങ്കെടുത്തു.