ചുവന്നുള്ളി ചേർത്താൽ പല വിഭവത്തിനും രുചിയും മണവും കൂടുതൽ സമൃദ്ധമാകും. പല കറികളിലും ഇത് ചേർക്കുന്നത് സ്വാദിൽ വലിയ മാറ്റം കൊണ്ടുവരും. എന്നാൽ ഇത് വൃത്തിയാക്കുകയും തൊലി കളയുകയും ചെയ്യുന്നത് കുറച്ച് ബുദ്ധിമുട്ടുള്ള കാര്യമാണ്. ചെറുതായ വലിപ്പവും നേർത്ത തോലും കാരണം പലരും ചുവന്നുള്ളി ഒഴിവാക്കാറുണ്ട്. എന്നാൽ ചെറിയ ചില ട്രിക്കുകൾ ഉപയോഗിച്ചാൽ ഉള്ളിയുടെ തൊലി എളുപ്പത്തിൽ നീക്കാൻ കഴിയും.

ചുവന്നുള്ളിയുടെ മുകൾഭാഗവും കീഴ്ഭാഗവും (വേരുള്ള ഭാഗം) ചെറുതായി മുറിച്ചുമാറ്റുക. ഇനി ഇത് ചൂടുവെള്ളത്തിൽ 15-20 മിനിറ്റ് മുക്കിവെയ്ക്കാം. വെള്ളത്തിൽ നിന്ന് എടുത്ത ശേഷം തൊലി മാറ്റാൻ ശ്രമിക്കുക. ഉള്ളി കുതിരുന്നതുകൊണ്ട് തൊലി വളരെ വേഗത്തിൽ ഇളകിപ്പോരും. ഉള്ളിയിൽ ഈർപ്പമുള്ളതിനാൽ കണ്ണിൽ എരിച്ചിൽ ഉണ്ടാകുന്നതും കുറയും.

ഉള്ളി തൊലിയോടെ ഒരു സിപ് ലോക്ക് ബാഗിലോ അല്ലെങ്കിൽ അടപ്പുള്ള പാത്രത്തിലോ ഇടുക. ഇത് 10-15 മിനിറ്റ് നേരം ഫ്രീസറിൽ വെക്കുക. തണുത്തതിനു ശേഷം പുറത്തെടുത്ത് തൊലി കളയാൻ ശ്രമിക്കുക. തണുപ്പ് കാരണം തൊലി എളുപ്പത്തിൽ അടർന്നു വരും. കൂടാതെ, ഉള്ളിയിൽ അടങ്ങിയിട്ടുള്ള, കണ്ണെരിച്ചിലുണ്ടാക്കുന്ന സംയുക്തങ്ങളുടെ പ്രവർത്തനക്ഷമത കുറയുന്നത് കാരണം കണ്ണിൽ നിന്ന് വെള്ളം വരുന്ന ബുദ്ധിമുട്ടും ഒഴിവാക്കാം.