കണ്ണൂര്‍: നഗോയയിലെ ട്രാക്കില്‍ 42 വര്‍ഷം പഴക്കമുള്ള പിടി ഉഷയുടെ റെക്കോര്‍ഡ് തകര്‍ത്ത വിത്യ രാമരാജ് നന്ദി പറയുന്നത് പറശ്ശിനി മുത്തപ്പനോട്. അമ്മവഴി കണ്ണൂര്‍ സ്വദേശിയായ വിത്യയുടെ പിതാവ് തമിഴ്‌നാട്ടുകാരനാണ്.

വനിതകളുടെ 400 മീറ്റര്‍ ഹര്‍ഡില്‍സില്‍ പി.ടി. ഉഷ 1984 ലോസ് ഏഞ്ചലസ് ഒളിമ്പിക്‌സില്‍ സ്ഥാപിച്ച 55.42 സെക്കന്‍ഡിന്റെ ദേശീയ റെക്കോര്‍ഡ് 42 വര്‍ഷത്തിനു ശേഷം വിത്യയിലൂടെ തകര്‍ന്നു. 55 സെക്കന്‍ഡിനു താഴെ ഓടുന്ന ആദ്യ ഇന്ത്യന്‍ വനിതയായി വിത്യ രാംരാജ്. ഗാലറിയില്‍ പിടി ഉഷയെ സാക്ഷിയാക്കിയായിരുന്നു വിത്യയുടെ കുതിപ്പ്.

കോയമ്പത്തൂര്‍ മീനാക്ഷിപുരം സ്വദേശിയായ രാംരാജിന്റെയും കണ്ണൂര്‍ സ്വദേശിയായ മായയുടേയും മകളാണ് വിത്യ. എല്ലാ വര്‍ഷവും പറശ്ശിനിക്കടവ് മുത്തപ്പന്റെ അടുത്ത് പ്രാര്‍ഥിക്കാന്‍ എത്താറുണ്ട്. മത്സരം തുടങ്ങും മുന്‍പ് ഈ തവണയും പ്രാര്‍ഥിച്ചു.

യുഎഇയുടെ മറിയം കരീം ഗെയിംസ് റെക്കോര്‍ഡോടെ (54.31) സ്വര്‍ണം നേടി. കസാഖ്സ്ഥാന്റെ അഡെലിന സെംസിനാണ് സില്‍വര്‍ (54.58). ഫിനിഷിങ്ങിന്റെ അവസാന നിമിഷങ്ങളില്‍ ചൈനയുടെ യിങ്യിങ് കോങ്ങിനെ പിന്തള്ളിയാണ് മെഡല്‍ ഉറപ്പിച്ചത്.

ഈ ഏഷ്യന്‍ ഗെയിംസില്‍ വിത്യ മൂന്ന് മെഡലുകള്‍ നേടി. നേരത്തെ 4x400 മീറ്റര്‍ മിക്‌സഡ് റിലേയില്‍ സില്‍വര്‍ നേടിയ ടീമിന്റെ ഭാഗമായിരുന്നു. റിലേയിലും വിത്യയുടെ സംഭാവന നിര്‍ണായകമായിരുന്നു. വനിതകളുടെ 4x400 റിലേയില്‍ അതിശയിപ്പിക്കുന്ന കുതിപ്പോടെയാണ് വിത്യയും സംഘവും സ്വര്‍ണം നേടിയത്. മൂന്ന് നിറവും കഴുത്തിലണിഞ്ഞ് മടങ്ങാനുള്ള അപൂര്‍വ അവസരമാണ് ഇതിലൂടെ വിത്യയെ തേടിയെത്തിയത്.

ഈ സന്തോഷ നിമിഷത്തിലും ഇരട്ട സഹോദരി നിത്യയെ മിസ് ചെയ്യുന്നുണ്ട്. കഴിഞ്ഞ തവണ ഒന്നിച്ച് ഓടിയവര്‍. ഇത്തവണ പരിക്ക് നിത്യയെ തടഞ്ഞു. മെഡല്‍ അവള്‍ക്ക് മാത്രമായാണ് വിത്യ സമര്‍പ്പിച്ചത്.

കഴിഞ്ഞ ഏഷ്യന്‍ ഗെയിംസില്‍ ഉഷയുടെ റെക്കോര്‍ഡിന് ഒപ്പമെത്തിയ വിത്യ, ഇന്ന് അത് ഭേദിച്ചു. അതും ഉഷയുടെ സാന്നിധ്യത്തില്‍. ഇന്ത്യന്‍ അത്ലറ്റിക്‌സിലെ അപൂര്‍വ നിമിഷങ്ങളിലൊന്നായി അത്. നാട്ടിലെത്തിയശേഷം മുത്തപ്പന്റെ അനുഗ്രഹം തേടി കണ്ണൂരിലെത്താന്‍ കാത്തിരിക്കുകയാണ് വിത്യ.