ന്യൂഡല്‍ഹി: നാഷണല്‍ കമ്പനി ലോ ട്രിബ്യൂണല്‍ (NCLT) സീ ഗ്രൂപ്പ് സ്ഥാപകന്‍ സുഭാഷ് ചന്ദ്രയുടെ വ്യക്തിഗത പാപ്പരത്വ കേസില്‍ പുറപ്പെടുവിച്ച തീരുമാനം ഇന്ത്യയിലെ സാമ്പത്തിക നീതിയുടെ യഥാര്‍ത്ഥ മുഖം വെളിപ്പെടുത്തുന്നു. ക്രെഡിറ്റര്‍മാര്‍ സമര്‍പ്പിച്ച ഏകദേശം 22,006.57 കോടി രൂപയുടെ അഡ്മിറ്റഡ് ക്ലെയിമുകളില്‍ ചന്ദ്ര അടയ്‌ക്കേണ്ടത് വെറും 6.5 കോടി രൂപ മാത്രം. ഏകദേശം 99.97 ശതമാനം അടക്കേണ്ടതില്ല. അതായത് ഓരോ 100 രൂപയ്ക്കും തിരിച്ചുകിട്ടുന്നത് മൂന്ന് പൈസയോളം മാത്രം.

കമ്പനികള്‍ എടുത്ത വായ്പകള്‍ക്ക് ചന്ദ്ര പേഴ്‌സണല്‍ ഗ്യാരന്റര്‍ ആയിരുന്നു. പ്രിന്‍സിപ്പല്‍ ബോറോവേഴ്‌സില്‍ നിന്ന് അധികമായി ഏതാനും തുക വസൂലാക്കാനുള്ള പദ്ധതിയും ഉണ്ടെന്ന് റിപ്പോര്‍ട്ടുകളുണ്ട്. എന്നാല്‍, അഡ്മിറ്റഡ് ക്ലെയിമുകളുടെ തോത് കണക്കിലെടുക്കുമ്പോള്‍, പൊതുജന പണം കൈകാര്യം ചെയ്യുന്ന ബാങ്കുകളും ധനകാര്യ സ്ഥാപനങ്ങളും നേരിടുന്ന നഷ്ടം വളരെ വലുതാണ്.

എല്‍ഐസി ഹൗസിങ് ഫിനാന്‍സിന് 1,322 കോടി രൂപ ലഭിക്കേണ്ടിടത്ത് കിട്ടുക 38 ലക്ഷം രൂപ മാത്രം. എച്ച്ഡിഎഫ്‌സി ബാങ്ക് ഉള്‍പ്പെടെയുള്ളവര്‍ അപ്പീലിന് തയ്യാറെടുക്കുകയാണ്.

ഒരു സാധാരണ പൗരനാണെങ്കില്‍ ഈ രീതിയിലുള്ള സഹായം ലഭിക്കില്ല. കേവലം 10,000 രൂപയുടെ ചെറിയ വായ്പ അടവ് മുടങ്ങിയാല്‍ പോലും ബാങ്ക് ഏജന്റുമാരുടെ ഭീഷണി, ഫോണ്‍ കോളുകളിലൂടെയുള്ള പീഡനം, വീട് ജപ്തി ചെയ്യല്‍, ജോലി നഷ്ടപ്പെടുത്തല്‍ ഇതൊക്കെ പതിവാണ്. കര്‍ഷകന്‍ 50,000 രൂപയുടെ കടം തിരിച്ചടയ്ക്കാന്‍ കഴിയാത്തപ്പോള്‍ ഭൂമി ലേലത്തിന് വയ്ക്കുന്നു. ശമ്പളക്കാരന്‍ ഒരു ഇഎംഐ മുടക്കിയാല്‍ വീട്ടില്‍ റിക്കവറി ടീം എത്തുന്നു. വിദ്യാര്‍ത്ഥികള്‍ക്ക് വിദ്യാഭ്യാസ വായ്പ പോലും ലഭിക്കാന്‍ ബുദ്ധിമുട്ട്. രണ്ടുതരം നീതി വ്യവസ്ഥയാണ് ഇന്ത്യയിലുള്ളതെന്നതിന്റെ തെളിവാണിത്.

ലോക്സഭാ പ്രതിപക്ഷ നേതാവ് രാഹുല്‍ ഗാന്ധി ഇതിനെ നേരിട്ട് വിമര്‍ശിച്ചു. NCLT-യെ ലീഡര്‍-കമ്പനി ലൂട്ട് ട്രിബ്യൂണല്‍ എന്നാണ് രാഹുല്‍ വിശേഷിപ്പിച്ചത്. മോദി സര്‍ക്കാര്‍ രാജ്യത്ത് രണ്ട് സിസ്റ്റങ്ങള്‍ സൃഷ്ടിച്ചു  ഒന്ന് ഒരു കൂട്ടം ബില്യണയര്‍മാര്‍ക്ക്, മറ്റൊന്ന് ബാക്കിയുള്ള എല്ലാവര്‍ക്കും. കര്‍ഷകന് 50,000 രൂപയുടെ കടത്തിന് ഭൂമി നഷ്ടപ്പെടും. ശമ്പളക്കാരന് ഇഎംഐ മുടങ്ങിയാല്‍ ബാങ്ക് ഗുണ്ടകള്‍ വീട്ടില്‍ എത്തും. പാവപ്പെട്ട വിദ്യാര്‍ത്ഥികള്‍ക്ക് വിദ്യാഭ്യാസ വായ്പ പോലും ലഭിക്കില്ല. എന്നാല്‍, തിരഞ്ഞെടുത്ത സുഹൃത്തുക്കള്‍ക്ക് ബാങ്ക് പണം സ്വന്തം സ്വത്തുപോലെയാണ്. എത്ര വേണമെങ്കിലും എടുക്കാം, ഇഷ്ടമുള്ളത്ര മാത്രം തിരിച്ചടയ്ക്കാം.

ഈ വിമര്‍ശനം വെറും രാഷ്ട്രീയ ആക്രമണമല്ല. ഇത് വര്‍ഷങ്ങളായി ആവര്‍ത്തിക്കുന്ന ഒരു പാറ്റേണിന്റെ തുടര്‍ച്ചയാണ്. കോര്‍പ്പറേറ്റ് വായ്പകള്‍ ലക്ഷക്കണക്കിന് കോടി രൂപ എഴുതിത്തള്ളപ്പെടുമ്പോള്‍, കര്‍ഷക കടമോചനം പോലും വലിയ വിവാദമായി മാറുന്നു. പൊതുമേഖലാ ബാങ്കുകളുടെ നഷ്ടം ആത്യന്തികമായി നികുതിദായകരുടെ ചുമലിലാണ് വീഴുന്നത്. സാധാരണക്കാരുടെ നിക്ഷേപങ്ങളും, പെന്‍ഷന്‍ ഫണ്ടുകളും, ഇന്‍ഷുറന്‍സ് പണവും ഇതില്‍ ഉള്‍പ്പെടുന്നു.

ഭരണകൂടത്തിന്റെ നിലപാട് എന്താണ്? നിയമപരമായ പ്രക്രിയയാണെന്നും, ഐബിസിയുടെ കീഴിലുള്ള തീരുമാനമാണെന്നും, ക്രെഡിറ്റര്‍മാരുടെ ഭൂരിപക്ഷ അംഗീകാരമുണ്ടെന്നും പറയാം. എന്നാല്‍, നീതിയുടെ അളവുകോല്‍ ഒരു വശത്ത് ചെറിയ കടക്കാര്‍ക്ക് കര്‍ശനവും, മറുവശത്ത് വലിയ ഗ്യാരന്റര്‍മാര്‍ക്ക് അത്യന്തം ഉദാരവുമാകുമ്പോള്‍, പൊതുജന വിശ്വാസം തകരുന്നു.

ഇന്ത്യയില്‍ ആര്‍ക്കുവേണ്ടിയുള്ള ഭരണമാണ് നടക്കുന്നത്? പാവപ്പെട്ടവന്റെ 10,000 രൂപയ്ക്ക് ഗുണ്ടാഭീഷണിയും ജപ്തിയും നല്‍കി, കോടീശ്വരന്റെ ആയിരക്കണക്കിന് കോടി എഴുതിത്തള്ളുമ്പോള്‍, ഉത്തരം വ്യക്തമാണ്. സാധാരണക്കാരുടെ പണം സംരക്ഷിക്കുകയും, വലിയ ഡിഫോള്‍ട്ടര്‍മാരില്‍ നിന്ന് പരമാവധി വസൂലാക്കുകയും ചെയ്യുക എന്നത് ഭരണകൂടത്തിന്റെ ഉത്തരവാദിത്തമാണ്. അല്ലാത്തപക്ഷം, സമൂഹത്തിലെ അസമത്വം കൂടുതല്‍ ആഴത്തിലാകും.