കോടീശ്വര പുത്രന്റെ അഹങ്കാരം മൂന്ന് ജീവനുകളെടുത്തപ്പോള്‍ അധിക്ഷേപം മുഴുവന്‍ മുസ്ലീം യുവാവിനൊപ്പം പുറത്തുപോയ പെണ്‍കുട്ടികള്‍ക്ക്, എന്തൊരു നാടാണിത്
നെടുമ്പാശ്ശേരി എയര്‍പോര്‍ട്ട് റോഡില്‍ ഞായറാഴ്ച പുലര്‍ച്ചെ ഉണ്ടായ വാഹനാപകടത്തിന് പിന്നാലെ പെണ്‍കുട്ടികള്‍ക്ക് അധിക്ഷേപവുമായി സോഷ്യല്‍ മീഡിയ.
കൊച്ചി: നെടുമ്പാശ്ശേരി എയര്‍പോര്‍ട്ട് റോഡില്‍ ഞായറാഴ്ച പുലര്‍ച്ചെ ഉണ്ടായ വാഹനാപകടത്തിന് പിന്നാലെ പെണ്‍കുട്ടികള്‍ക്ക് അധിക്ഷേപവുമായി സോഷ്യല്‍ മീഡിയ. മിനി കൂപ്പര്‍ കാര്‍ അമിതവേഗത്തിലും മദ്യലഹരിയിലും ഓടിച്ചാണ് സ്‌കൂട്ടറിലുണ്ടായിരുന്ന രണ്ട് യുവതികളെ ഉള്‍പ്പെടെ മൂന്നുപേരെ ഇല്ലാതാക്കിയത്. പാലക്കാട് സ്വദേശി ഗോപിക, വയനാട് സ്വദേശി ദേവിക (21), കര്‍ണാടക സ്വദേശി ഇജാസ് (21) എന്നിവര്‍ ജോലി കഴിഞ്ഞ് ചായ കുടിച്ച് മടങ്ങുമ്പോഴായിരുന്നു സംഭവം. സിസിടിവി ദൃശ്യങ്ങളില്‍ കാര്‍ സ്‌കൂട്ടറിനെ ഇടിച്ച് തെറിപ്പിക്കുന്നതും മൂന്ന് പേരും റോഡില്‍ വീഴുന്നതും കാണാം.
പ്രതി സുഹൈല്‍ സജീവ് (19) രാജഗിരി കോളേജിലെ ബികോം വിദ്യാര്‍ത്ഥിയാണ്. ജന്മദിന സമ്മാനമായി ലഭിച്ച മിനി കൂപ്പര്‍ അതിവേഗത്തില്‍ ഓടിച്ചാണ് അപകടമുണ്ടാക്കിയത്. ഇയാള്‍ മുന്‍പും 218-220 കിലോമീറ്റര്‍ വേഗത്തില്‍ കാര്‍ ഓടിക്കുന്ന വീഡിയോകള്‍ സോഷ്യല്‍ മീഡിയയില്‍ പങ്കുവച്ചിരുന്നു. അപകടത്തിന് മുന്‍പ് മൂന്ന് ബാറുകളില്‍ കയറി മദ്യപിച്ചതായി പൊലീസ് പറയുന്നു. മദ്യപിക്കുന്ന ദൃശ്യങ്ങളും ഫോണില്‍ ഉണ്ടായിരുന്നു. അപകടത്തിന് ശേഷവും നാട്ടുകാരുമായി കയര്‍ത്തു. വാപ്പ നോക്കിക്കൊള്ളും എന്ന് വെല്ലുവിളിച്ചതായും റിപ്പോര്‍ട്ടുകളുണ്ട്. പ്രതിയെ നരഹത്യക്ക് കേസെടുത്ത് അറസ്റ്റ് ചെയ്തു. ലൈസന്‍സ് റദ്ദാക്കും.
വാഹനാപകട വാര്‍ത്ത പുറത്തുവന്നതിന് പിന്നാലെ സോഷ്യല്‍ മീഡിയയില്‍ ചിലരുടെ ശ്രദ്ധ പൂര്‍ണമായും മറ്റൊരു ദിശയിലേക്ക് മാറി. മരിച്ച പെണ്‍കുട്ടികളെ അധിക്ഷേപിക്കുകയാണ് ഒരുവിഭാഗം. മുസ്ലീം യുവാവിനൊപ്പം രാത്രി എന്തിന് പുറത്തുപോയി, വാഹനാപകടം സംഭവിച്ചില്ലെങ്കില്‍ ഇത് പുറത്തറിയില്ലായിരുന്നു. തുടങ്ങി ദ്വയാര്‍ത്ഥ പ്രയോഗങ്ങളോടെയാണ് സദാചാര വാദികള്‍ രംഗത്തെത്തിയത്.
ഇതൊരു പുതിയ കാര്യമല്ല. ഒരു പെണ്‍കുട്ടി ഒരു മുസ്ലീം യുവാവിനൊപ്പം കാണപ്പെട്ടാല്‍, അത് തന്നെ സദാചാരലംഘനം ആയി മാറ്റുന്ന ഒരു മാനസികാവസ്ഥ നമ്മുടെ സമൂഹത്തിലുണ്ട്. അവര്‍ എന്ത് ധരിച്ചു, ആരോടൊപ്പം പോയി, എപ്പോള്‍ പോയി, ഇതൊക്കെ ചര്‍ച്ചാവിഷയമാകും. എന്നാല്‍ അതേ സമയം, ഒരു ധനിക പുത്രന്‍ മദ്യപിച്ച് 200 കിലോമീറ്റര്‍ വേഗത്തില്‍ കാര്‍ ഓടിച്ച് മൂന്ന് പേരെ കൊന്നാല്‍, അത് ലളിതവത്കരിക്കപ്പെടും.
മരിച്ച ഇജാസ്, ദേവിക, ഗോപിക ഇവര്‍ സുഹൃത്തുക്കളായിരുന്നു. ഒരു ജോലിക്കിടയില്‍ ചായ കുടിക്കാനായി പോയവര്‍. ഇതിനെ ബന്ധിപ്പിച്ച് അധിക്ഷേപിക്കുന്നത് മനുഷ്യത്വമില്ലാത്തതാണ്. ഒരു പെണ്‍കുട്ടി ആരോടൊപ്പം പോയാലും, അത് അവളുടെ ജീവന്‍ നഷ്ടപ്പെടുത്താനുള്ള കാരണമല്ല.
ഇത്തരം സോഷ്യല്‍ മീഡിയ അധിക്ഷേപങ്ങള്‍ മരിച്ചവരുടെ കുടുംബങ്ങളെ വീണ്ടും മുറിവേല്‍പ്പിക്കുന്നു. അത് സമൂഹത്തിലെ സ്ത്രീവിരുദ്ധതയെയും മതവിദ്വേഷത്തെയും പ്രോത്സാഹിപ്പിക്കുന്നു. നിയമം ഇവര്‍ക്കെതിരെ കര്‍ശന നടപടിയെടുക്കണം. മദ്യം നല്‍കിയ ബാറുകള്‍ക്കെതിരെയും നടപടി വേണം. അതിവേഗ ഡ്രൈവിംഗ്, ലഹരി, എന്നിവയിലൊതുക്കാതെ പ്രതിക്ക് അര്‍ഹിക്കുന്ന ശിക്ഷയും വാങ്ങിക്കൊടുക്കണം.
മൂന്ന് യുവാക്കളുടേയും അവരുടെ പ്രിയപ്പെട്ടവരുടേയും സ്വപ്‌നങ്ങള്‍ ഇല്ലാതാക്കിയത് ഒരു കാറിന്റെ സ്റ്റിയറിങ് വീലില്‍ ഇരുന്ന അഹങ്കാരിയാണ്. അല്ലാതെ, ഒരു മുസ്ലീം യുവാവിനൊപ്പം പുറത്തുപോയ രണ്ട് പെണ്‍കുട്ടികളല്ല.