തിരുവനന്തപുരം: തിരുവനന്തപുരം കോര്‍പ്പറേഷന്റെ വിജയത്തിനു പിന്നാലെ, വട്ടിയൂര്‍കാവ് മണ്ഡലത്തിലെ സിപിഎം എംഎല്‍എയായ വി.കെ. പ്രശാന്തിനെതിരെ സംഘപരിവാര്‍ വ്യാപകമായ വ്യാജ പ്രചാരണം നടത്തുന്നതായി ആരോപണം. ശ്രീലേഖ പ്രശാന്ത് ഓഫീസ് വിവാദം കേന്ദ്രീകരിച്ചാണ് ഈ പ്രചാരണം. ഇത് 2026-ലെ നിയമസഭാ തിരഞ്ഞെടുപ്പില്‍ വട്ടിയൂര്‍കാവ് മണ്ഡലം ലക്ഷ്യമിട്ടുള്ള ബിജെപിയുടെ തന്ത്രത്തിന്റെ ഭാഗമാണെന്ന് രാഷ്ട്രീയ നിരീക്ഷകര്‍ ചൂണ്ടിക്കാട്ടുന്നു.

ബിജെപി കൗണ്‍സിലറും മുന്‍ ഡിജിപിയുമായ ആര്‍. ശ്രീലേഖ, ശാസ്തമംഗലം വാര്‍ഡിലെ കോര്‍പ്പറേഷന്‍ കെട്ടിടത്തിലുള്ള പ്രശാന്തിന്റെ എംഎല്‍എ ഓഫീസ് ഒഴിപ്പിക്കണമെന്ന് ആവശ്യപ്പെട്ടതോടെയാണ് വിവാദം ആരംഭിച്ചത്. ശ്രീലേഖയുടെ ഓഫീസിന് ഇടമില്ലാത്തതിനാലാണെന്നാണ് വാദം. എന്നാല്‍, ഇത് രാഷ്ട്രീയ പ്രേരിതമാണെന്നും ഓഫീസിന് വാടക നല്‍കുന്നുണ്ടെന്നും മാര്‍ച്ച് വരെ കരാര്‍ ഉണ്ടെന്നും പ്രശാന്ത് വ്യക്തമാക്കി. കോണ്‍ഗ്രസ് കൗണ്‍സിലര്‍ കെ.എസ്. ശബരിനാഥനും പ്രശാന്തിനെതിരെ രംഗത്തെത്തി, ഓഫീസിന് കുറഞ്ഞ വാടകയാണെന്ന് ആരോപിച്ചു.

ഓഫീസ് ഒഴിയില്ലെന്ന് പ്രശാന്ത് വ്യക്തമാക്കിയതോടെ സോഷ്യല്‍ മീഡിയയിലൂടെ ബിജെപി അനുകൂല ഹാന്‍ഡിലുകള്‍ വ്യാപകമായ വ്യാജ പ്രചരണം നടത്തുകയാണെന്ന് സിപിഎം ആരോപിക്കുന്നു. പ്രശാന്ത് 25,000 രൂപ വാടക അലവന്‍സ് വാങ്ങിയിട്ട് കോര്‍പ്പറേഷന് 872 രൂപ മാത്രം നല്‍കുന്നു എന്നാണ് പ്രധാന ആരോപണം. എന്നാല്‍, എംഎല്‍എമാര്‍ക്ക് ഓഫീസ് വാടക അലവന്‍സ് ഇല്ലെന്ന് പ്രശാന്ത് വ്യക്തമാക്കി. മാത്രമല്ല, കേരളത്തിലെ 140 എംഎല്‍എമാരുടെ വാടക വിവരം പുറത്തുവിടണമെന്നും ആവശ്യപ്പെട്ടു.

2025-ലെ തദ്ദേശ തിരഞ്ഞെടുപ്പില്‍ തിരുവനന്തപുരം കോര്‍പ്പറേഷന്‍ ഭരണം പിടിച്ച ബിജെപി, ഇപ്പോള്‍ 2026 നിയമസഭാ തിരഞ്ഞെടുപ്പിനായി വട്ടിയൂര്‍കാവ് മണ്ഡലം ലക്ഷ്യമിടുകയാണ്. പ്രധാനമന്ത്രി നരേന്ദ്ര മോഡി ജനുവരിയില്‍ തിരുവനന്തപുരത്ത് എത്തി 'മിഷന്‍ 2026' പ്രഖ്യാപിക്കുമെന്നാണ് റിപ്പോര്‍ട്ടുകള്‍. ബിജെപി മേയര്‍ വി.വി. രാജേഷിന്റെ നേതൃത്വത്തില്‍ കോര്‍പ്പറേഷന്‍ ഭരണം ഏറ്റെടുത്തതോടെ, സിപിഎം സീറ്റുകള്‍ പിടിച്ചെടുക്കാനുള്ള ശ്രമമാണ് നടക്കുന്നതെന്നാണ് വിലയിരുത്തപ്പെടുന്നത്.

2024 ലോക്സഭാ തിരഞ്ഞെടുപ്പില്‍ തിരുവനന്തപുരം മണ്ഡലത്തിനു കീഴിലുള്ള വട്ടിയൂര്‍കാവ് അസംബ്ലി സെഗ്മെന്റില്‍ ബിജെപി ശക്തമായ പ്രകടനം കാഴ്ചവച്ചു. ബിജെപി സ്ഥാനാര്‍ഥി രാജീവ് ചന്ദ്രശേഖര്‍ 8,000-ത്തിലധികം വോട്ടുകള്‍ക്ക് മുന്നിലെത്തി. ഇത് വട്ടിയൂര്‍കാവില്‍ ബിജെപിക്ക് ആത്മവിശ്വാസം നല്‍കുന്നു. ബിജെപി നേരത്തെതന്നെ മണ്ഡലത്തില്‍ പ്രചരണം ആരംഭിച്ചതോടെ നിയമസഭാ തിരഞ്ഞെടുപ്പ് വട്ടിയൂര്‍കാവില്‍ മൂന്നു മുന്നണികളും തമ്മിലുള്ള കടുത്ത പോരാട്ടമാകുമെന്നാണ് പ്രതീക്ഷിക്കപ്പെടുന്നത്.