കൊച്ചി: നിലമ്പൂര്‍ മുന്‍ എംഎല്‍എയും തൃണമൂല്‍ കോണ്‍ഗ്രസ് (ടിഎംസി) കേരള കോഓഡിനേറ്ററുമായ പിവി അന്‍വറിന്റെ ആസ്തികളില്‍ ഉണ്ടായ വന്‍ വര്‍ദ്ധനവില്‍ ഇഡി അന്വേഷണം തുടരുന്നു. അഞ്ച് വര്‍ഷംകൊണ്ട് 14.38 കോടി രൂപയില്‍നിന്നും 64.14 കോടി രൂപയിലെത്തിയത് ദുരൂഹമാണ്. ഇക്കാര്യം വിശദീകരിക്കാന്‍ പര്യാപ്തമായ മറുപടി അന്‍വര്‍ നല്‍കിയിട്ടില്ല.

ബിനാമി അക്കൗണ്ടുകളിലൂടെയുള്ള ദുരൂഹ ഇടപാടുകളും, കേരള ഫിനാന്‍ഷ്യല്‍ കോര്‍പ്പറേഷന്‍ (കെഎഫ്സി)യില്‍ നിന്ന് എടുത്ത വായ്പകളുടെ ദുരുപയോഗവും, റിയല്‍ എസ്റ്റേറ്റ് പദ്ധതികളിലേക്കുള്ള ഫണ്ട് ഡൈവേഴ്ഷനും അന്വേഷണത്തിന്റെ ഏറ്റവും പ്രധാനപ്പെട്ട കണ്ടെത്തലുകളാണ്.

കൊച്ചിയില്‍ നിന്നുള്ള ഇഡി ടീമുകളാണ് അന്‍വറിന്റെ മലപ്പുറം ഒതയിലെ വീട് പരിശോധിച്ചത്. മലപ്പുറം, കൊച്ചി, തിരുവനന്തപുരം തുടങ്ങിയ സ്ഥലങ്ങളിലെ അന്‍വറിന്റെ വീടുകളും ബന്ധപ്പെട്ടവരുടെ സ്ഥാപനങ്ങളും റെയ്ഡിന് വിധേയമായി. ഏകദേശം 22 കോടി രൂപയുടെ ബാങ്ക് ലോണ്‍ തട്ടിപ്പ് കേസുമായി ബന്ധപ്പെട്ടാണ് ഈ നടപടി.

റെയ്ഡുകളിലൂടെ പിടിച്ചെടുത്ത രേഖകള്‍ പ്രകാരം, 15 ബാങ്ക് അക്കൗണ്ടുകള്‍ വിവിധ വ്യക്തികളുടെ പേരിലുള്ളവയാണെന്നും ഇവ ബിനാമി ഇടപാടുകള്‍ക്ക് ഉപയോഗിച്ചതാണെന്നും ഇഡി സംശയിക്കുന്നു. ഈ അക്കൗണ്ടുകളിലൂടെ നടന്ന സെയില്‍ ഡീഡുകളും മറ്റ് ട്രാന്‍സാക്ഷനുകളും പിടിച്ചെടുത്തിട്ടുണ്ട്.

എംഎല്‍എ ആകുന്നതിന് മുമ്പ് കെഎഫ്സിയില്‍ നിന്ന് എടുത്ത 9.5 കോടി രൂപയുടെ വായ്പയില്‍ അന്‍വര്‍ 6 കോടി രൂപ മാത്രം തിരിച്ചടച്ചുവെന്നും, ബാക്കി തുക മറ്റ് ആവശ്യങ്ങള്‍ക്ക് ഉപയോഗിച്ചുവെന്നും അന്വേഷണത്തില്‍ കണ്ടെത്തി.

അന്‍വറിന്റെ ആസ്തികളില്‍ സ്ഥാവര-ജംഗമ ആസ്തികള്‍ ചേര്‍ത്ത് 2021-ല്‍ 18.57 കോടി രൂപയായിരുന്നത് 2025 ജൂണില്‍ നിലമ്പൂര്‍ ഉപതെരഞ്ഞെടുപ്പിന് മുമ്പ് 52.21 കോടി രൂപയായി ഉയര്‍ന്നു. എന്നാല്‍ ഇപ്പോഴത്തെ കണക്കുകള്‍ പ്രകാരം 64.14 കോടി രൂപ വരെ എത്തിയ ആസ്തി വളര്‍ച്ചയ്ക്ക് അന്‍വര്‍ യുക്തിസഹമായ വിശദീകരണം നല്‍കിയിട്ടില്ല.

ഇഡി പിടിച്ചെടുത്ത രേഖകളില്‍ 15 ബാങ്ക് അക്കൗണ്ടുകള്‍ പ്രധാനമാണ്. ഈ അക്കൗണ്ടുകള്‍ അന്‍വറിന്റെ ബന്ധുക്കളുടെയോ മറ്റ് വ്യക്തികളുടെയോ പേരിലാണെങ്കിലും, ട്രാന്‍സാക്ഷനുകള്‍ അന്‍വറിന്റെ നിയന്ത്രണത്തിലാണെന്ന് സംശയിക്കപ്പെടുന്നു. റിയല്‍ എസ്റ്റേറ്റ് പദ്ധതികളിലൂടെ നടന്ന ദുരൂഹ ഇടപാടുകള്‍, ഭൂമി വാങ്ങല്‍ വില്‍ക്കലുകള്‍ എന്നിവയും അന്വേഷണത്തിന്റെ ഭാഗമാണ്.

ഇഡി അന്വേഷണം കടുപ്പിച്ചതോടെ ബിജെപിയുമായി അടുക്കുകയാകും ഇനി അന്‍വറിന് മുന്നിലുള്ള വഴി. 2016-ല്‍ എല്‍ഡിഎഫിന്റെ പിന്തുണയോടെ നിലമ്പൂര്‍ എംഎല്‍എ ആയ അന്‍വര്‍, 2024 സെപ്റ്റംബറില്‍ രാജിവെച്ചിരുന്നു. പിന്നീട് യുഡിഎഫുമായി അടുക്കാനുള്ള ശ്രമം പരാജയപ്പെട്ടതോടെയാണ് ടിഎംസിയില്‍ ചേരുന്നത്. 

ഇഡിയുടെ അന്വേഷണം പുരോഗമിക്കുന്നതോടെ കൂടുതല്‍ വെളിപ്പെടുത്തലുകള്‍ പ്രതീക്ഷിക്കപ്പെടുന്നു. അനുപാതരഹിത ആസ്തികളും ബിനാമി ഇടപാടുകളും തെളിയിക്കപ്പെട്ടാല്‍, അന്‍വറിന്റെ രാഷ്ട്രീയ ഭാവി വലിയ ചലനത്തിന് വിധേയമാകും.