ദേശീയ പാത 66 പണി നിലച്ചു, സര്ക്കാരിന്റെ ഏകോപനമോ മേല്നോട്ടമോ ഇല്ല, തീരാന് ഇനിയും വര്ഷങ്ങളെടുക്കും, ജനത്തിന്റെ ദുരിതം തുടരും
കാസര്കോട് തലപ്പാടി മുതല് തിരുവനന്തപുരം കാരോട് വരെയുള്ള ദേശീയപാത 66-ന്റെ ആറുവരി വികസനം കേരളത്തിന്റെ സ്വപ്ന പദ്ധതിയായിരുന്നു.
പണി പല റീച്ചുകളിലും തീര്ത്തും നിലയ്ക്കുകയോ ഇഴഞ്ഞുനീങ്ങുകയോ ചെയ്യുന്നു. കേന്ദ്ര സര്ക്കാര്, സംസ്ഥാന സര്ക്കാര്, എന്എച്ച്എഐ, കരാറുകാര് ആരും ഉത്തരവാദിത്വം ഏറ്റെടുക്കുന്നില്ല.
കൊച്ചി: കാസര്കോട് തലപ്പാടി മുതല് തിരുവനന്തപുരം കാരോട് വരെയുള്ള ദേശീയപാത 66-ന്റെ ആറുവരി വികസനം കേരളത്തിന്റെ സ്വപ്ന പദ്ധതിയായിരുന്നു. എന്നാല്, ഇന്ന് അത് ജനങ്ങളുടെ നിത്യ ദുരിതമായി മാറിയിരിക്കുന്നു.
പണി പല റീച്ചുകളിലും തീര്ത്തും നിലയ്ക്കുകയോ ഇഴഞ്ഞുനീങ്ങുകയോ ചെയ്യുന്നു. കേന്ദ്ര സര്ക്കാര്, സംസ്ഥാന സര്ക്കാര്, എന്എച്ച്എഐ, കരാറുകാര് ആരും ഉത്തരവാദിത്വം ഏറ്റെടുക്കുന്നില്ല. ഏകോപനവും മേല്നോട്ടവുമില്ല.
സംസ്ഥാനത്ത് ക്വാറി സ്റ്റോണും മണ്ണും ലഭ്യമല്ലെന്നാണ് കരാറുകാരുടെ ന്യായീകരണം. നിര്മാണ സാമഗ്രികള് തമിഴ്നാട് അതിര്ത്തി കടത്തുന്നതിന് നിയന്ത്രണം ഏര്പ്പെടുത്തിയതോടെ പല റീച്ചുകളിലും പണി നിലച്ചു. സംസ്ഥാന സര്ക്കാര് ഇതില് ഫലപ്രദമായി ഇടപെട്ടില്ല.
ഘടനാപരമായ തകര്ച്ചകളും ഡിസൈന് മാറ്റങ്ങളും പല റീച്ചുകളുടേയും താളം തെറ്റിച്ചു. മൈലക്കാട്, കൂരിയാട് തുടങ്ങിയ സ്ഥലങ്ങളില് റീഇന്ഫോഴ്സ്ഡ് എര്ത്ത് വാളുകള് തകര്ന്നു. പലയിടത്തും വയഡക്ടുകളിലേക്ക് മാറ്റി. ഇതോടെ ഇവിടെ പൂര്ത്തിയാകാന് വര്ഷങ്ങളെടുക്കും.
ഫണ്ടിങ് പ്രശ്നങ്ങള്, സബ്-കോണ്ട്രാക്ടര് തര്ക്കങ്ങള്, തൊഴിലാളി ക്ഷാമം എന്നിവയും സ്തംഭനത്തിന് കാരണമായി. ശരിയായ ആസൂത്രണമില്ലാത്തതിനാല് വര്ഷങ്ങള് നീണ്ടു നില്ക്കുമെന്നാണ് റിപ്പോര്ട്ട്.
കേന്ദ്ര മന്ത്രി നിതിന് ഗഡ്കരി ലോക്സഭയില് പറഞ്ഞത് അനുസരിച്ച് 645 കിലോമീറ്റര് കേരള ഭാഗം 2028 മെയ് വരെ പൂര്ത്തിയാകില്ലെന്നാണ്. പ്രധാന റോഡ് വര്ക്കുകള് 2027 ഏപ്രില് വരെയും, എലിവേറ്റഡ് ഭാഗങ്ങള് അതിനുശേഷവും മാത്രമേ പൂര്ത്തിയാകൂ. ഇത് കേന്ദ്ര സര്ക്കാരിന്റെയും എന്എച്ച്എഐയുടെയും പരാജയത്തിന്റെ തെളിവാണ്.
പല റീച്ചുകളിലും സര്വീസ് റോഡുകള്, ബ്രിഡ്ജുകള്, അണ്ടര്പാസുകള് അപൂര്ണ്ണമാണ്. ടോള് പ്ലാസകള് സ്ഥാപിക്കാന് തുടങ്ങിയിട്ടും പാത തയ്യാറല്ലാത്തത് ജനദുരിതം ഇരട്ടിയാക്കുന്നു.
നിര്മാണ മേഖലകളില് അപകടങ്ങളും വര്ധിച്ചു. തൃശൂര് കൈപ്പമംഗലത്ത് എട്ട് വിദ്യാര്ത്ഥികള് മരിച്ച അപകടം ഉള്പ്പെടെ ഒട്ടേറെ സംഭവങ്ങള് അടുത്തിടെയുണ്ടായി. സൈന്ബോര്ഡുകള് ഇല്ല, ബാരിയറുകള് മോശം, അനധികൃത പാര്ക്കിങ്, തടസ്സമുള്ള ഡൈവര്ഷനുകള് ഇവയെല്ലാം സുരക്ഷാ ഓഡിറ്റുകളില് കണ്ടെത്തിയിരുന്നു.
പദ്ധതി കേരളത്തിന്റെ സാമ്പത്തിക വളര്ച്ചയ്ക്കും സുഗമമായ യാത്രയ്ക്കും അനിവാര്യമാണ്. എന്നാല്, ഇപ്പോഴത്തെ ഗതിയില് 2028-നും അപ്പുറത്തേക്ക് നീളും. ജനങ്ങള്ക്ക് ഇനിയും വര്ഷങ്ങള് ദുരിതം സഹിക്കേണ്ടിവരും. കേന്ദ്രവും സംസ്ഥാനവും കരാറുകാരും ഉടന് ഏകോപനത്തോടെ ഇടപെടുകയും കര്ശന മേല്നോട്ടം ഉറപ്പാക്കുകയും ചെയ്തില്ലെങ്കില് ഈ പദ്ധതി പിന്നേയും നീളാനാണ് സാധ്യത.