ന്യൂഡല്‍ഹി: ഇന്ത്യന്‍ ക്രിക്കറ്റ് ടീമിന്റെ പ്രധാന പേസ് ബൗളര്‍ ജസ്പ്രീത് ബുംറ ടെസ്റ്റ് ക്രിക്കറ്റില്‍ നിന്ന് വിരമിച്ചേക്കുമെന്ന് മുന്‍ ഇന്ത്യന്‍ താരം മുഹമ്മദ് കൈഫ്. ഇംഗ്ലണ്ടിനെതിരായ നാലാം ടെസ്റ്റ് മത്സരത്തില്‍ ബുംറയുടെ പ്രകടനം മങ്ങിയതിനെ തുടര്‍ന്നാണ് കൈഫിന്റെ ഈ അഭിപ്രായം.

മാഞ്ചസ്റ്ററില്‍ നടക്കുന്ന ടെസ്റ്റ് മത്സരത്തില്‍ ബുംറയുടെ പന്തിന്റെ വേഗത 130-135 കിലോമീറ്റര്‍/മണിക്കൂര്‍ എന്ന നിലയില്‍ കുറഞ്ഞതായി കൈഫ് ചൂണ്ടിക്കാട്ടി. ഹെഡിംഗ്ലിയിലും ലോര്‍ഡ്‌സിലും 140 കിലോമീറ്റര്‍ വേഗതയില്‍ പന്തെറിഞ്ഞ ബുംറ, മാഞ്ചസ്റ്ററില്‍ ശാരീരിക അസ്വസ്ഥതകള്‍ നേരിട്ടതായും കൈഫ് പറഞ്ഞു. ബുംറയുടെ മനസ്സ് മൂര്‍ച്ചയുള്ളതാണ്, പക്ഷേ ശരീരം അതിനൊപ്പമില്ല. ഈ ടെസ്റ്റ് മത്സരത്തില്‍ ബുംറയുടെ പ്രകടനം കാണുമ്പോള്‍, ഭാവിയില്‍ ടെസ്റ്റ് കളിക്കാന്‍ ബുദ്ധിമുട്ടുണ്ടാകുമെന്ന് തോന്നുന്നെന്ന് കൈഫ് പറഞ്ഞു.

28 ഓവറുകളില്‍ 1 വിക്കറ്റ് മാത്രം നേടിയ ബുംറ, 95 റണ്‍സ് വഴങ്ങിയിരുന്നു. ഇംഗ്ലണ്ടിന്റെ ജാമി സ്മിത്തിന്റെ വിക്കറ്റാണ് നേടിയത്. ആവേശവും പ്രതിബദ്ധതയും ഇപ്പോഴും ഉണ്ട്, പക്ഷേ ശരീരം തോല്‍പ്പിച്ചിരിക്കുന്നു. വിക്കറ്റ് എടുക്കുന്നതിനപ്പുറം, വേഗത കുറഞ്ഞത് ശ്രദ്ധിക്കണമെന്നും കൈഫ് വ്യക്തമാക്കി.

ബുംറയുടെ ശാരീരിക പ്രശ്‌നങ്ങള്‍ക്ക് കാരണം അസാധാരണമായ ബൗളിംഗ് ആക്ഷന്‍ ആണെന്നും, ഇത് ശരീരത്തില്‍ വലിയ സമ്മര്‍ദ്ദം ചെലുത്തുന്നുണ്ടെന്നും കൈഫ് അഭിപ്രായപ്പെട്ടു. ബുംറ ആത്മാര്‍ത്ഥതയുള്ള കളിക്കാരനാണ്. തനിക്ക് 100 ശതമാനം നല്‍കാന്‍ കഴിയില്ലെങ്കില്‍, സ്വയം പിന്മാറുമെന്നാണ് വിശ്വാസമെന്ന് കൈഫ് പറഞ്ഞു.

വിരാട് കോലി, രോഹിത് ശര്‍മ, ആര്‍. അശ്വിന്‍ എന്നിവര്‍ ടെസ്റ്റ് ക്രിക്കറ്റില്‍ നിന്ന് വിടവാങ്ങിയ പശ്ചാത്തലത്തില്‍, ബുംറയുടെ വിരമിക്കല്‍ ഇന്ത്യന്‍ ടെസ്റ്റ് ടീമിന് വലിയ തിരിച്ചടിയാകും. ഇന്ത്യന്‍ ആരാധകര്‍ ബുംറയില്ലാതെ ടെസ്റ്റ് മത്സരങ്ങള്‍ കാണാന്‍ ശീലിക്കേണ്ടി വരും. പ്രവചനം തെറ്റാകണമെന്ന് ആഗ്രഹിക്കുന്നു, പക്ഷേ, വിരമിക്കലിന് സാധ്യതയുണ്ടെന്നാണ് കൈഫിന്റെ വിലയിരുത്തല്‍.

ഇംഗ്ലണ്ടിനെതിരായ ടെസ്റ്റ് സീരീസില്‍ ബുംറ ഇതുവരെ 13 വിക്കറ്റുകള്‍ നേടിയിട്ടുണ്ട്. പക്ഷേ മാഞ്ചസ്റ്റര്‍ ടെസ്റ്റില്‍ താരത്തിന്റെ പ്രകടനം മങ്ങി. എന്നാല്‍, ബാറ്റിങ്ങിന് സഹായിക്കുന്ന പിച്ച് ആയതുകൊണ്ടാകാം ബുംറ തിളങ്ങാതെ പോയതെന്നും വിലയിരുത്തലുകളുണ്ട്.