സ്കൂളില് കുട്ടികളുടെ ആര്ത്തവ അവധി ദുരുപയോഗം ചെയ്യുമോ? പിരീഡ് സഹപാഠികളറിഞ്ഞാല് കളിയാക്കുമെന്ന ഭയം കുട്ടികള്ക്ക്, നടപ്പാക്കിയ രാജ്യങ്ങളുടെ അവസ്ഥ ഇങ്ങനെ
കേരളത്തിലെ സ്കൂളുകളിലെ കുട്ടികള്ക്ക് എല്ലാ മാസവും ആര്ത്തവ മൂന്നുദിവസം ആര്ത്തവ അവധി നല്കുമെന്ന നയപ്രഖ്യാപനത്തിന് സമ്മിശ്ര പ്രതികരണമാണ് ഉയര്ന്നുവരുന്നത്.
ഒരുവിഭാഗം പുരോഗമനപരമായ ചുവടുവെയ്പെന്ന് പറയുമ്പോള് വേര്തിരിവിന് കാരണമാകുമെന്നും ദുരുപയോഗത്തിന് ഇടയാക്കുമെന്നും മറ്റൊരുകൂട്ടര് പറയുന്നു.
തിരുവനന്തപുരം: കേരളത്തിലെ സ്കൂളുകളിലെ കുട്ടികള്ക്ക് എല്ലാ മാസവും മൂന്നുദിവസം ആര്ത്തവ അവധി നല്കുമെന്ന നയപ്രഖ്യാപനത്തിന് സമ്മിശ്ര പ്രതികരണമാണ് ഉയര്ന്നുവരുന്നത്. ഒരുവിഭാഗം പുരോഗമനപരമായ ചുവടുവെയ്പെന്ന് പറയുമ്പോള് വേര്തിരിവിന് കാരണമാകുമെന്നും ദുരുപയോഗത്തിന് ഇടയാക്കുമെന്നും മറ്റൊരുകൂട്ടര് പറയുന്നു.
നിയമസഭയില് ഗവര്ണറുടെ നയപ്രഖ്യാപനത്തിലാണ് യു.ഡി.എഫ്. സര്ക്കാര് ഈ പദ്ധതി പ്രഖ്യാപിച്ചത്. സ്കൂള് വിദ്യാര്ത്ഥിനികള്ക്ക് മാസം ഏറ്റവും കൂടിയത് മൂന്ന് ദിവസം അവധി ലഭിക്കും. ഈ ദിവസങ്ങളിലെ പഠനനഷ്ടം തടയാന് വീക്കെന്ഡ് ക്ലാസുകള് ഏര്പ്പെടുത്തും. നേരത്തെ എല്ഡിഎഫ് സര്ക്കാര് യൂണിവേഴ്സിറ്റി തലത്തില് ഇത് നടപ്പാക്കിയിരുന്നു.
പോസിറ്റീവ് വശങ്ങള്
പല കുട്ടികള്ക്കും ആദ്യ ആര്ത്തവകാലത്ത് കടുത്ത വേദന, ക്ഷീണം, മാനസിക അസ്വസ്ഥത എന്നിവ ഉണ്ടാകാറുണ്ട്. ഇത് സ്കൂളില് എത്തുന്നതിന് ബുദ്ധിമുട്ടുണ്ടാക്കും. അറ്റന്ഡന്സ് നഷ്ടമാകുമെന്ന ഭയത്തില് കുട്ടികള് സ്കൂളില് പോകാന് നിര്ബന്ധിതമാകുകയാണ്. എന്നാല്, പുതിയ പ്രഖ്യാപനം കുട്ടികള്ക്ക് അറ്റന്ഡന്സ് നഷ്ടമാകാതെ അവധിയെടുക്കാമെന്നതാണ് ആശ്വാസം.
അവധി എടുക്കാതെ സ്കൂളില് വരുന്നത് ആരോഗ്യത്തിന് ഹാനികരമാകാം. മെന്സ്ട്രല് ഹൈജീന്, സാനിറ്ററി ഫെസിലിറ്റികള് മെച്ചപ്പെടുത്താന് അവധി സഹായിക്കും. വീക്കെന്ഡ് ക്ലാസുകള് ഉണ്ടെങ്കില് പഠനനഷ്ടം കുറയ്ക്കാം.
നെഗറ്റീവ് വശങ്ങള്
അവധി എടുക്കുന്ന കുട്ടികള് കളിയാക്കലുകള്ക്ക് വിധേയരായേക്കും. പിരീഡ് പരസ്യമാക്കേണ്ടി വരുന്നത് മറ്റ് കുട്ടികളില് നിന്നോ അധ്യാപകരില് നിന്നോ വിവേചനത്തിന് കാരണമാകാം. പഠന തുടര്ച്ചയില്ലാതാകാം. മൂന്ന് ദിവസം മാസംതോറും കുറയുന്നത് ദീര്ഘകാലത്തില് ബാധിക്കാം, പ്രത്യേകിച്ച് ഹയര് സെക്കന്ഡറി, മത്സരപരീക്ഷകള്ക്ക് തയ്യാറെടുക്കുന്നവര്ക്ക്. എല്ലാ വിഷയങ്ങളും പഠിപ്പിക്കാന് വീക്കെന്റില് അധ്യാപകര് എത്തുമോ എന്നും ചോദ്യമുയരുന്നുണ്ട്.
സ്കൂളില് പോകാന് മടിച്ച് കുട്ടികള് ദുരുപയോഗ സാധ്യതയും കൂടുതലാണ്. കൂടാതെ ലിംഗവിവേചനം വര്ധിപ്പിച്ചേക്കാം. പെണ്കുട്ടികള് കുറഞ്ഞ ക്ഷമതയുള്ളവര് എന്ന ധാരണ ഉണ്ടാക്കും.
ആഗോളതലത്തില് പരിശോധിച്ചാല്, മുതിര്ന്ന ജീവനക്കാര്ക്ക് ജോലിസ്ഥലങ്ങളില് ആര്ത്തവ അവധി നല്കുന്ന രാജ്യങ്ങള് ഉണ്ടെങ്കിലും, സ്കൂള് കുട്ടികള്ക്ക് മാത്രമായി പ്രത്യേകമായി ആര്ത്തവ അവധി നിയമപരമായി പ്രഖ്യാപിച്ച രാജ്യങ്ങള് വിരളമാണ്. എന്നാല്, ചില ഏഷ്യന് രാജ്യങ്ങളില് നിലവിലുള്ള പൊതുവായ ആര്ത്തവ അവധി നിയമങ്ങളുടെ പരിധിയില് സ്കൂള് കോളേജ് വിദ്യാര്ത്ഥിനികളെക്കൂടി ഉള്പ്പെടുത്തിയിട്ടുണ്ട്.
1. ദക്ഷിണ കൊറിയ
ദക്ഷിണ കൊറിയയില് ജോലി ചെയ്യുന്ന സ്ത്രീകള്ക്ക് മാത്രമല്ല, സ്കൂള് വിദ്യാര്ത്ഥിനികള്ക്കും ആര്ത്തവ അവധിക്ക് നിയമപരമായ അവകാശമുണ്ട്. കുട്ടികള്ക്ക് കഠിനമായ ആര്ത്തവവേദനയോ അസ്വസ്ഥതയോ ഉണ്ടെങ്കില് മാസത്തില് ഒരു ദിവസം അറ്റന്ഡന്സ് അംഗീകരിച്ചുകൊണ്ടുള്ള അവധിക്ക് അപേക്ഷിക്കാം.
തുടക്കത്തില് വലിയ പിന്തുണ ലഭിച്ചെങ്കിലും, പ്രായോഗികതലത്തില് സമ്മിശ്ര പ്രതികരണമാണ്. സ്കൂളുകളിലെ കടുത്ത മത്സരപരീക്ഷാ അന്തരീക്ഷം കാരണം പല പെണ്കുട്ടികളും ക്ലാസുകള് നഷ്ടപ്പെടുത്താന് ആഗ്രഹിക്കുന്നില്ല. കൂടാതെ, അവധി എടുക്കുമ്പോള് സഹപാഠികള്ക്കിടയില് ഉണ്ടാകുന്ന അനാവശ്യ ചര്ച്ചകളും കളിയാക്കലുകളും ഭയന്ന് ഭൂരിഭാഗം കുട്ടികളും ഇത് ഉപയോഗിക്കാറില്ല.
2. തായ്വാന്
തായ്വാനിലെ ലിംഗസമത്വ നിയമപ്രകാരം സ്കൂള് വിദ്യാര്ത്ഥിനികള്ക്കും ആര്ത്തവ അവധി അനുവദിച്ചിട്ടുണ്ട്. ഒരു വര്ഷത്തില് പരമാവധി 3 ദിവസത്തെ ആര്ത്തവ അവധി വിദ്യാര്ത്ഥിനികള്ക്ക് എടുക്കാം. ഇത് അവരുടെ സാധാരണ സിക്ക് ലീവുകളെ ബാധിക്കില്ല. വിദ്യാര്ത്ഥി സംഘടനകള് ഇതിനെ സ്വാഗതം ചെയ്തു. എന്നാല്, അവധി ലഭിക്കാന് ഡോക്ടറുടെ സര്ട്ടിഫിക്കറ്റ് വേണോ വേണ്ടയോ എന്നതിനെച്ചൊല്ലി സ്കൂള് അധികൃതരും രക്ഷിതാക്കളും തമ്മില് ഇപ്പോഴും തര്ക്കങ്ങള് നിലനില്ക്കുന്നുണ്ട്.
3. ജപ്പാന്
ജപ്പാനില് 1947 മുതല് തൊഴില് നിയമത്തില് ആര്ത്തവ അവധിയുണ്ടെങ്കിലും, സ്കൂള് തലത്തില് ഇത് നിര്ബന്ധിത നിയമമല്ല. എങ്കിലും പല പ്രവിശ്യകളിലെയും ഹൈസ്കൂളുകളും സര്വ്വകലാശാലകളും സ്വന്തം നിലയില് വിദ്യാര്ത്ഥിനികള്ക്ക് ഈ അവധി നല്കാറുണ്ട്. ജപ്പാനിലെ കടുത്ത 'വര്ക്ക് കള്ച്ചര്' കാരണം മുതിര്ന്നവര് പോലും ഈ അവധി എടുക്കാറില്ല. ഇതേ ചിന്താഗതി സ്കൂള് കുട്ടികളിലുമുണ്ട്. അവധിയെടുത്താല് തങ്ങള് പഠനത്തില് പിന്നിലായിപ്പോകുമെന്ന ഭയം കുട്ടികള്ക്കുണ്ട്.
യൂറോപ്യന് രാജ്യങ്ങളിലോ (സ്പെയിന് ഒഴികെ), അമേരിക്കയിലോ സ്കൂള് കുട്ടികള്ക്ക് ഇത്തരമൊരു അവധി നിലവിലില്ല. ആഗോളതലത്തില് ഈ വിഷയത്തില് ഉയരുന്ന പ്രധാന പ്രതികരണങ്ങള് ഇവയാണ്.
അനുകൂലിക്കുന്നവരുടെ വാദം
കൗമാരപ്രായത്തില് ആദ്യമായി ആര്ത്തവം അനുഭവിക്കുന്ന കുട്ടികള്ക്ക് വലിയ ശാരീരിക മാനസിക പിന്തുണ നല്കാന് ഇത്തരം നിയമങ്ങള്ക്ക് കഴിയും. ആര്ത്തവ ശുചിത്വത്തെക്കുറിച്ചും ആരോഗ്യത്തെക്കുറിച്ചും തുറന്നു സംസാരിക്കാന് സ്കൂളുകളെ ഇത് പ്രേരിപ്പിക്കും.
എതിര്ക്കുന്നവരുടെ വാദം
സ്കൂള് പ്രായത്തിലുള്ള കുട്ടികള്ക്ക് അവധി നല്കുന്നത് ദുരുപയോഗം ചെയ്യപ്പെടാന് സാധ്യതയുണ്ടെന്നാണ് പ്രധാന വിമര്ശനം. പരീക്ഷാ ദിവസങ്ങളിലോ ക്ലാസ് ടെസ്റ്റ് ദിവസങ്ങളിലോ കുട്ടികള് ഇത് ഒരു കാരണമാക്കിയെടുത്തേക്കാം.
പാശ്ചാത്യ രാജ്യങ്ങളിലെ പല വിദഗ്ദ്ധരും ചൂണ്ടിക്കാണിക്കുന്നത്, കുട്ടികള് തങ്ങളുടെ ആര്ത്തവവിവരം സ്കൂള് രജിസ്റ്ററുകളില് രേഖപ്പെടുത്താന് നിര്ബന്ധിതരാകുന്നത് അവരുടെ സ്വകാര്യതയിലേക്കുള്ള കടന്നുകയറ്റമാണെന്നാണ്.
ആത്യന്തികമായി, ആര്ത്തവം ഒരു സാധാരണ ജീവശാസ്ത്രപ്രക്രിയയാണ്. അതിനെ രോഗമാക്കാതെ, സൗകര്യങ്ങള് ഒരുക്കി, സമത്വപൂര്വം കൈകാര്യം ചെയ്യുകയാണ് വേണ്ടത്. കേരളം ഈ ദിശയില് മുന്നോട്ടുപോകുന്നത് നല്ല സൂചനയാണ്.