തിരുവനന്തപുരം: ലോകോത്തര നിലവാരത്തിലുണ്ടായിരുന്ന കേരളത്തിലെ പൊതുജനാരോഗ്യ മേഖല ഇന്ന് കനത്ത പ്രതിസന്ധിയിലാണ്. കോണ്‍ഗ്രസ് നേതൃത്വത്തിലുള്ള യുഡിഎഫ് സര്‍ക്കാര്‍ അധികാരത്തിലെത്തിയതോടെ സര്‍ക്കാര്‍ ആശുപത്രികളിലും ഫാര്‍മസികളിലും അവശ്യമരുന്നുകളുടെ ക്ഷാമം രൂക്ഷമായി. പാവപ്പെട്ടവര്‍ക്ക് സൗജന്യമായി ലഭിച്ചിരുന്ന ഷുഗര്‍, പ്രഷര്‍ മരുന്നുകള്‍ പോലും ഇന്ന് കിട്ടാനില്ല. പാരസെറ്റമോള്‍, ഐവി ഫ്‌ലൂയിഡ്, ആന്റിബയോട്ടിക്കുകള്‍, ഹൃദ്രോഗ മരുന്നുകള്‍ എന്നിവയുടെ അഭാവം രോഗികളെ സ്വകാര്യ മെഡിക്കല്‍ സ്റ്റോറുകളിലേക്ക് തള്ളിവിടുന്നു.

ആരോഗ്യ വകുപ്പ് ഡയറക്ടര്‍ ഡോ. വി. മീനാക്ഷിയുടെ ശബ്ദസന്ദേശം ഈ പ്രതിസന്ധിയുടെ ഔദ്യോഗിക സമ്മതപത്രമാണ്. ഡിഎംഒമാരുടെയും ഡിപിഎംമാരുടെയും ഗ്രൂപ്പിലേക്ക് അയച്ച സന്ദേശത്തില്‍ മരുന്ന് ക്ഷാമം രൂക്ഷമാണെന്ന് തുറന്നുപറയുകയും ആശുപത്രി സൂപ്രണ്ടുമാര്‍ എച്ച്എംസി ഫണ്ട് ഉപയോഗിച്ച് ലാക്കല്‍ പര്‍ച്ചേസ് നടത്തണമെന്ന് നിര്‍ദേശിക്കുകയും ചെയ്യുന്നുണ്ട്. മാധ്യമങ്ങളോട് സംസാരിക്കരുതെന്നും അന്വേഷണങ്ങള്‍ ഡിഎംഒയിലേക്ക് തിരിച്ചുവിടണമെന്നും ഉപദേശിച്ചു. സന്ദേശം പുറത്തുവന്നതോടെ മരുന്ന് ക്ഷാമമില്ലെന്ന സര്‍ക്കാരിന്റെ വാദം തകര്‍ന്നു.

ആരോഗ്യമന്ത്രി കെ. മുരളീധരന്‍ 18 മരുന്നുകളുടെ കുറവുണ്ടെന്നും ഒരാഴ്ചയ്ക്കുള്ളില്‍ പരിഹരിക്കുമെന്നും പ്രഖ്യാപിച്ചിരുന്നു. എന്നാല്‍, യാഥാര്‍ത്ഥ്യം വ്യത്യസ്തമാണ്. മെറ്റ്‌ഫോര്‍മിന്‍ പോലുള്ള ഷുഗര്‍ മരുന്നുകള്‍, ഹൃദ്രോഗ മരുന്നുകള്‍, ഡോക്‌സിസൈക്ലിന്‍, ആസ്പിരിന്‍ തുടങ്ങിയവ കെഎംഎസ്സിഎല്‍ ഗോഡൗണുകളിലും പല ആശുപത്രികളിലും ലഭ്യമല്ല. ടെന്‍ഡര്‍ നടപടികളിലെ വൈകല്യം, ഉദ്യോഗസ്ഥ മാറ്റങ്ങള്‍, പര്‍ച്ചേസ് ഓര്‍ഡറുകളിലെ കാലതാമസം എന്നിവയാണ് കാരണമായി ചൂണ്ടിക്കാണിക്കപ്പെടുന്നത്.

ഇതൊരു സാധാരണ ഭരണപരമായ പരാജയമാണോ അതോ കൂടുതല്‍ ഗൂഢാലോചനയുടെ ഭാഗമാണോയെന്നും സംശയിക്കുന്നു. സ്വകാര്യ ആശുപത്രി ശൃംഖലകള്‍ക്കും മരുന്ന് കമ്പനികള്‍ക്കും സഹായകമായി പൊതുജനാരോഗ്യ സംവിധാനത്തെ ദുര്‍ബലപ്പെടുത്തുന്ന നയമാണ് പിന്നിലെന്ന് പ്രതിപക്ഷം ആരോപിക്കുന്നു.

ഇലക്ടറല്‍ ബോണ്ട് ഡാറ്റ ഈ സംശയങ്ങള്‍ക്ക് കൂടുതല്‍ ശക്തി പകരുന്നു. ഫാര്‍മസ്യൂട്ടിക്കല്‍, ഹെല്‍ത്ത്കെയര്‍ മേഖലയില്‍ നിന്ന് കോണ്‍ഗ്രസിന് നൂറുകണക്കിന് കോടി രൂപയുടെ സംഭാവന ലഭിച്ചിട്ടുണ്ട്. യശോദ സൂപ്പര്‍ സ്‌പെഷ്യാലിറ്റി ഹോസ്പിറ്റല്‍ ഏകദേശം 64 കോടി, ഡോ. റെഡ്ഡീസ് ലബോറട്ടറീസ് 11-14 കോടി, നാറ്റ്‌കോ ഫാര്‍മ 12 കോടിയിലധികം, ടോറന്റ് ഫാര്‍മ 5 കോടി, ഡിവീസ് ലാബുകള്‍ 5 കോടി എന്നിങ്ങനെ ഒട്ടേറെ കമ്പനികള്‍ കോണ്‍ഗ്രസിന് ബോണ്ടുകള്‍ നല്‍കിയതായി തിരഞ്ഞെടുപ്പ് കമ്മീഷന്‍ ഡാറ്റ വെളിപ്പെടുത്തുന്നു. മൊത്തത്തില്‍ ഈ മേഖലയില്‍ നിന്ന് കോണ്‍ഗ്രസിന് ഏകദേശം 123 കോടി രൂപയോളം ലഭിച്ചതായി റിപ്പോര്‍ട്ടുകളുണ്ട്.

ഈ സംഭാവനകള്‍ക്ക് പകരമായി പൊതുജനാരോഗ്യ സംവിധാനത്തെ തകര്‍ത്ത് സ്വകാര്യ മേഖലയ്ക്ക് കൂടുതല്‍ രോഗികളെ തള്ളിവിടുന്ന സമ്മാനമാണോ ഇപ്പോഴത്തെ മരുന്ന് ക്ഷാമം എന്ന് ന്യായമായും സംശയിക്കാം. പാവപ്പെട്ടവരുടെ ജീവന്‍ പണയപ്പെടുത്തി സ്വകാര്യ ലോബികളെ സന്തോഷിപ്പിക്കുന്ന നയം അംഗീകാരയോഗ്യമല്ല. മുന്‍ സര്‍ക്കാരിന്റെ കടം ചൂണ്ടിക്കാട്ടി ഉത്തരവാദിത്തം ഒഴിവാക്കാനുള്ള ശ്രമങ്ങള്‍ ജനങ്ങളെ ബോധ്യപ്പെടുത്തില്ല. ആരോഗ്യം മനുഷ്യാവകാശമാണ്. പാവപ്പെട്ടവര്‍ക്ക് അവശ്യമരുന്നുകള്‍ ലഭ്യമാക്കാത്ത ഏതൊരു സര്‍ക്കാരും ജനവിരുദ്ധമാണ്.

കേരളത്തിന്റെ പൊതുജനാരോഗ്യ മാതൃകയെ സംരക്ഷിക്കാന്‍ ഉടന്‍ നടപടി വേണം. ടെന്‍ഡര്‍ നടപടികള്‍ ത്വരിതപ്പെടുത്തുക, സ്റ്റോക്ക് ഉറപ്പാക്കുക, ഉദ്യോഗസ്ഥ തലത്തിലെ അനാസ്ഥ അവസാനിപ്പിക്കുക. അല്ലാത്തപക്ഷം ഈ ക്ഷാമം കേരളത്തിന്റെ ആരോഗ്യ മേഖലയിലെ കറുത്ത അധ്യായമായി ചരിത്രത്തില്‍ രേഖപ്പെടുത്തപ്പെടും.