ഹൈദരാബാദ്: രാജീവ് ഗാന്ധി അന്താരാഷ്ട്ര സ്റ്റേഡിയത്തില്‍ നടന്ന ഇന്ത്യ-വെസ്റ്റ് ഇന്‍ഡീസ് അഞ്ച് മത്സര ടി20 സീരീസിലെ നാലാം മത്സരത്തില്‍ ഇന്ത്യന്‍ ബൗളിങ് യൂണിറ്റ് വീണ്ടും പരാജയപ്പെട്ടു. ടോസ് നേടി ഫീല്‍ഡിങ് തിരഞ്ഞെടുത്ത ഇന്ത്യയുടെ ബൗളര്‍മാര്‍ ലൈനും ലെങ്തും നിലനിര്‍ത്താന്‍ പരാജയപ്പെട്ടതോടെ വെസ്റ്റ് ഇന്‍ഡീസിനെ 247/3 എന്ന ഭീമന്‍ സ്‌കോറിലെത്തി.

ഷായ് ഹോപ്പിന്റെ സെഞ്ചുറിയും (102), ഷെര്‍ഫേന്‍ റൂതര്‍ഫോര്‍ഡിന്റെ (49)യും ഷിംറോണ്‍ ഹെറ്റ്മയറിന്റെ (33)യും സംഭാവനകളുമാണ് വെസ്റ്റിന്‍ഡീസിന് തുണയായത്. ബാറ്റിങ്ങിനിറങ്ങിയ ഇന്ത്യയെ 223 റണ്‍സിലൊതുക്കി 24 റണ്‍സിന്റെ വിജയം ആഘോഷിച്ച വിന്‍ഡീസ് സീരീസ് 2-2 എന്ന നിലയില്‍ ഒപ്പമെത്തി.

പവര്‍പ്ലേയില്‍ത്തന്നെ 79/1 എത്തിയ വെസ്റ്റ് ഇന്‍ഡീസ് ബാറ്റര്‍മാര്‍ ഇന്ത്യന്‍ ബൗളര്‍മാരെ നിഷ്പ്രഭരാക്കി. പ്രിന്‍സ് യാദവ് മാത്രമാണ് നാല് ഓവറില്‍ 36 റണ്‍സ് (1 വിക്കറ്റ്) മാത്രം വിട്ടുകൊടുത്ത് മെച്ചപ്പെട്ട ബൗളിങ് കാഴ്ചവെച്ചത്. ആര്‍ഷ്ദീപ് സിങ്, മായങ്ക് യാദവ്, നിതീഷ് റെഡ്ഡി എന്നിവര്‍ക്കൊന്നും മികവുകാട്ടാനായില്ല. അക്ഷര്‍ പട്ടേല്‍ 45 റണ്‍സ് വിട്ടുകൊടുത്തു.

സോഷ്യല്‍ മീഡിയയില്‍ ആരാധകര്‍ ഇന്ത്യന്‍ ബൗളിങ്ങിനെ അത്യന്തം മോശവും ലജ്ജാകരവുമെന്നാണ് വിശേഷിപ്പിച്ചത്. ഈ ബൗളിങ് ലൈനപ്പുമായി ഇന്ത്യ അടുത്ത കുറച്ച് വര്‍ഷങ്ങളെങ്കിലും ഒന്നും നേടില്ല, 80 ശതമാനം ഡെലിവറികളും അവറേജിന് താഴെ, ജസ്പ്രീത് ബുംറയുടെ അഭാവത്തില്‍ ഇന്ത്യന്‍ ബൗളിങ്ങ് ഒന്നുമല്ല, തുടങ്ങിയ വിമര്‍ശനങ്ങള്‍ നിറഞ്ഞു.

മുന്‍ ഇന്ത്യന്‍ ബാറ്റര്‍ മുഹമ്മദ് കൈഫ് ബൗളര്‍മാര്‍ക്കെതിരെ കടുത്ത വിമര്‍ശനം ഉന്നയിച്ചു. ഇന്ത്യന്‍ ബൗളിങ് യൂണിറ്റിന് അടിസ്ഥാന കാര്യങ്ങള്‍ പോലും ശരിയായി ചെയ്യാന്‍ കഴിയുന്നില്ല. ഓവറുകള്‍ സമയത്തിന് പൂര്‍ത്തിയാക്കാന്‍ പോലും ബുദ്ധിമുട്ടുന്നു. ഫീല്‍ഡിങ് സഹായിക്കുന്നില്ല. ഹൈദരാബാദില്‍ സ്ലോ ബൗണ്‍സര്‍ ഏറ്റവും ഫലപ്രദമായിരുന്നു, അത് ഉപയോഗിച്ചില്ല. നമ്പര്‍ 8 വരെ ബാറ്റിങ് ഉണ്ടാക്കുന്നതല്ല ധൈര്യം, നല്ല ബാറ്റിങ് വിക്കറ്റില്‍ അഞ്ച് സ്‌പെഷ്യലിസ്റ്റ് ബൗളര്‍മാരെ ഉള്‍പ്പെടുത്തുകയാണ് യഥാര്‍ത്ഥ ധൈര്യമെന്ന് കൈഫ് പറഞ്ഞു. കുല്‍ദീപ് യാദവിനെ ഉള്‍പ്പെടുത്താമായിരുന്നുവെന്നും അദ്ദേഹം അഭിപ്രായപ്പെട്ടു.

സുനില്‍ ഗവാസ്‌കര്‍ പിച്ചിനെ കുറ്റപ്പെടുത്തുന്നവരോട് പ്രതികരിച്ചു. ഫുള്‍ ടോസുകള്‍ ബൗള്‍ ചെയ്തിട്ട് പിച്ചിനെ കുറ്റപ്പെടുത്തരുത്. ശരിയായ ലെങ്ത് കണ്ടെത്തുമ്പോള്‍ മാത്രമേ വിജയം ലഭിക്കൂ. വെസ്റ്റ് ഇന്‍ഡീസ് ബൗളര്‍മാര്‍ പോലും തുടക്കത്തില്‍ ഫുള്‍ ടോസുകള്‍ ബൗള്‍ ചെയ്‌തെങ്കിലും പിന്നീട് ശരിയായ ലെങ്തിലും യോര്‍ക്കറുകളിലും വിജയിച്ചെന്ന് ഗവാസ്‌കര്‍ പറഞ്ഞു.

മുന്‍ പേസര്‍ വരുണ്‍ ആരോണ്‍ ബൗളിങ് പ്ലാനുകളെയും ടീം കോമ്പിനേഷനെയും ചോദ്യം ചെയ്തു. കുല്‍ദീപ് യാദവിനെ കളിപ്പിക്കാത്തത് തെറ്റ്. ഈ വിക്കറ്റില്‍ അധിക സ്പിന്നര്‍ വ്യത്യാസം ഉണ്ടാക്കുമായിരുന്നു. മോശം ബൗളിങ് പ്ലാനുകളും ബാറ്റിങ് അവെയര്‍നസ് ഇല്ലായ്മയും കാരണമാണ് തോല്‍വി, ആരോണ്‍ പറഞ്ഞു.

കാപ്റ്റന്‍ ശ്രേയസ് അയ്യരും ബൗളിങ്ങിലെ പരാജയം സമ്മതിച്ചു. ലൈനും ലെങ്തും ശരിയായില്ല. 250 റണ്‍സ് ചേസ് ചെയ്യുമ്പോള്‍ ഒരു പ്രത്യേക പാറ്റേണില്‍ മുന്നോട്ട് പോകണം. ബാറ്റിങ് അപ്രോച്ച് ഇഷ്ടപ്പെട്ടു. പക്ഷേ ബൗളിങ് പ്ലാനുകള്‍ നടപ്പാക്കാന്‍ കഴിയാത്തതാണ് തോല്‍വിയുടെ കാരണമെന്ന് അയ്യര്‍ പറഞ്ഞു.

സീരീസിലുടനീളം ഇന്ത്യന്‍ ബൗളിങ് പരാജയമായിരുന്നു. രണ്ടാം മത്സരത്തില്‍ 250 ഡിഫന്‍ഡ് ചെയ്യാനാകാതെ തോറ്റത് നാണക്കേടായി. ബുംറയുടെ അഭാവം, അനുഭവസമ്പന്നരായ ബൗളര്‍മാരുടെ ക്ഷാമം, ഫ്‌ലാറ്റ് പിച്ചുകളില്‍ വ്യത്യസ്ത പ്ലാനുകളുടെ അഭാവം എന്നിവ ചര്‍ച്ചാവിഷയമാകുകയാണ്.