കണ്ണൂർ: സംസ്ഥാനത്ത് പുതിയ സർക്കാർ പരിഗണനയിലുള്ള അതിവേഗ തീവണ്ടി പാതയുടെ ആദ്യഘട്ടം കണ്ണൂർ മുണ്ടയാട് വരെ നിർമ്മിക്കാനാണ് നിലവിലെ ശുപാർശ. എന്നാൽ, രണ്ട് സ്റ്റേഷനുകൾ തമ്മിലുള്ള ശരാശരി ദൂരം 21.5 കിലോമീറ്റർ ആയി നിശ്ചയിച്ചിരിക്കുന്ന സാഹചര്യത്തിൽ, ഈ പാത ആദ്യഘട്ടത്തിൽ തന്നെ കണ്ണൂരിന്റെ വടക്കൻ മേഖലയായ തളിപ്പറമ്പ് വരെ നീട്ടണമെന്ന ആവശ്യം ശക്തമാകുന്നു.

മുണ്ടയാട് നിന്നും ഏകദേശം 21 കിലോമീറ്റർ മാത്രം ദൂരമുള്ള തളിപ്പറമ്പിലേക്ക് പാത നീട്ടുന്നത് വടക്കൻ മലബാറിന്റെ വികസനത്തിൽ വലിയൊരു വിപ്ലവത്തിന് വഴിവെക്കുമെന്നാണ് ചൂണ്ടിക്കാണിക്കപ്പെടുന്നത്.

പ്രശസ്തമായ തീർത്ഥാടന-ടൂറിസം കേന്ദ്രങ്ങളായ തളിപ്പറമ്പ് ശ്രീ രാജരാജേശ്വരം ക്ഷേത്രം, തൃച്ചംബരം ക്ഷേത്രം, പറശ്ശിനിക്കടവ് മുത്തപ്പൻ മടപ്പുര തുടങ്ങിയ സ്ഥലങ്ങളിലേക്ക് പ്രതിദിനം ആയിരക്കണക്കിന് ഭക്തരും വിനോദസഞ്ചാരികളുമാണ് എത്തിച്ചേരുന്നത്. നിലവിൽ ദീർഘദൂര യാത്രക്കാർക്ക് ഇവിടങ്ങളിലേക്ക് എളുപ്പത്തിൽ എത്തിച്ചേരാൻ മതിയായ അതിവേഗ യാത്രാ സൗകര്യങ്ങളില്ല. അതിവേഗ റെയിൽ തളിപ്പറമ്പിൽ എത്തുന്നതോടെ ദക്ഷിണ കേരളത്തിൽ നിന്നുള്ളവർക്ക് ഉൾപ്പെടെയുള്ള തീർത്ഥാടനം കൂടുതൽ സുഗമമാകും.

മലയോര മേഖലയുടെ യാത്രാക്ലേശത്തിന് പരിഹാരം നിലവിൽ തളിപ്പറമ്പും അതിന്റെ പരിസരത്തുള്ള മലയോര മേഖലകളിൽ താമസിക്കുന്നവരും ട്രെയിൻ മാർഗ്ഗം യാത്ര ചെയ്യാൻ കിലോമീറ്ററുകൾ സഞ്ചരിച്ച് കണ്ണൂർ റെയിൽവേ സ്റ്റേഷനെയാണ് ആശ്രയിക്കുന്നത്. മണിക്കൂറുകളോളം നീളുന്ന ഈ റോഡ് യാത്ര പലപ്പോഴും വലിയ ബുദ്ധിമുട്ടാണ് സൃഷ്ടിക്കുന്നത്. പുതിയ അതിവേഗ റെയിൽവേ സ്റ്റേഷൻ തളിപ്പറമ്പിൽ യാഥാർത്ഥ്യമായാൽ ആലക്കോട്, ചെറുപുഴ തുടങ്ങിയ മലയോര മേഖലകളിലുള്ളവർക്ക് ചുരുങ്ങിയ സമയം കൊണ്ട് സ്റ്റേഷനിലെത്താം.

തിരുവനന്തപുരം, കൊച്ചി തുടങ്ങിയ പ്രധാന നഗരങ്ങളിലേക്കുള്ള യാത്രാസമയം പകുതിയായി കുറയും. ഐ.ടി, ബിസിനസ്സ് മേഖലകളിലെ പ്രൊഫഷണലുകൾക്ക് തങ്ങളുടെ യാത്രകൾ കൂടുതൽ കാര്യക്ഷമമാക്കാൻ സാധിക്കും.

സ്റ്റേഷനുകൾ തമ്മിലുള്ള ശരാശരി അകലം കൃത്യമായി പാലിക്കാൻ സാധിക്കുമെന്നതിനാൽ സാങ്കേതികമായി തളിപ്പറമ്പിലേക്ക് പാത നീട്ടുന്നത് എളുപ്പമാണ്. വികസനത്തിൽ എപ്പോഴും പിന്നാക്കം പോകുന്ന വടക്കൻ മലബാറിനോടുള്ള അവഗണന ഒഴിവാക്കാനും, ടൂറിസം-സാമ്പത്തിക മേഖലകൾക്ക് ഉണർവേകാനും ഈ പദ്ധതി അത്യന്താപേക്ഷിതമാണ്.

ആയതിനാൽ, ജനപ്രതിനിധികളും പൊതുജനങ്ങളും ഉന്നയിക്കുന്ന ഈ ന്യായമായ ആവശ്യം പുതിയ സർക്കാരിന്റെ പ്രാരംഭ പദ്ധതി രൂപരേഖയിൽ തന്നെ ഉൾപ്പെടുത്തണമെന്ന ആവശ്യമാണ് ഇപ്പോൾ ശക്തമാകുന്നത്.