കട്ടക്കലിപ്പില് ക്രിസ്റ്റ്യാനോ റൊണാള്ഡോ, ബാലണ് ഡി ഓറിന്റേയും ഫിഫ ബെസ്റ്റ് അവാര്ഡിന്റേയും വില കളഞ്ഞു, പരാമര്ശം മെസ്സിക്ക് അവാര്ഡ് കിട്ടിയതോടെ
ന്യൂഡല്ഹി: യുവേഫയുടെ ബാലണ് ഡി ഓറിനും ഫിഫയുടെ ദി ബെസ്റ്റ് അവാര്ഡിനും എതിരെ ആഞ്ഞടിച്ച് പോര്ച്ചുഗീസ് ഇതിഹാസ താരം ക്രിസ്റ്റ്യാനോ റൊണാള്ഡോ. അവാര്ഡുകള് അവരുടെ വിശ്വാസ്യത നഷ്ടപ്പെടുത്തുകയാണെന്ന് പോര്ച്ചുഗലിലെ ഒരു സ്പോര്ട്സ് പത്രത്തിന് നല്കിയ അഭിമുഖത്തില് റൊണാള്ഡോ പറഞ്ഞു.
2022/23 സീസണിലെ രണ്ട് അവാര്ഡുകളും അര്ജന്റീനയുടെ ലയണല് മെസ്സിയാണ് നേടിയത്. ഖത്തറിലെ തന്റെ കന്നി ഫിഫ ലോകകപ്പ് വിജയത്തിന് ശേഷം 2022/23 സീസണില് ബാലണ് ഡി ഓര് നേടാനുള്ള ഫേവറിറ്റുകളില് ഒരാളായിരുന്നു മെസ്സി. കിലിയന് എംബാപ്പെയെയും എര്ലിംഗ് ഹാലന്ഡിനെയും തോല്പ്പിച്ച് 2023 ല് പുരുഷ വിഭാഗത്തില് ഫിഫ മികച്ച അവാര്ഡും മെസ്സി സ്വന്തമാക്കി.
ഈ സംഘടനകള് എങ്ങനെ പ്രവര്ത്തിക്കുന്നു എന്നതു ശീലമാക്കിയതിനാല് താന് അവാര്ഡുകള് കാണാറില്ലെന്ന് ക്രിസ്റ്റ്യാനോ പറഞ്ഞു. ഈ വര്ഷത്തെ മികച്ച ഗോള് സ്കോറര് ഉള്പ്പെടെ ഒന്നിലധികം പുരസ്കാരങ്ങള് നേടിയ ദുബായിലെ ഗ്ലോബ് സോക്കര് അവാര്ഡ് ദാന ചടങ്ങിന് ശേഷമാണ് ക്രിസ്റ്റ്യാനോയുടെ പ്രതികരണം. വസ്തുതകളെ അടിസ്ഥാനമാക്കിയല്ല അവാര്ഡുകള് നല്കുന്നതെന്ന് പറഞ്ഞ ക്രിസ്റ്റ്യാനോ ഇത് പ്രത്യേകിച്ച് ഒരു കളിക്കാരനെതിരെയും അല്ലെന്നും മെസ്സി അവാര്ഡിനര്ഹനല്ല എന്നല്ല താന് അര്ത്ഥമാക്കിയതെന്നും പറയുകയുണ്ടായി.
ഈ അവാര്ഡുകള് വിശ്വാസ്യത നഷ്ടപ്പെടുത്തുന്നുവെന്ന് ഞാന് കരുതുന്നു. സീസണ് മുഴുവന് നമ്മള് വിശകലനം ചെയ്യണം. മെസ്സിയോ ഹാലാന്ഡോ എംബാപ്പെയോ പോലും അതിന് അര്ഹനല്ലെന്ന് പറയാനാവില്ല. ഞാന് ഇനി ഈ അവാര്ഡുകളില് വിശ്വസില്ല. ഗ്ലോബ് സോക്കറില് ഞാന് ജയിച്ചതുകൊണ്ടല്ല, എന്നാല് ഇവ വസ്തുതകളാണ്, അക്കങ്ങള് ഉണ്ട്, അക്കങ്ങള് വഞ്ചിക്കില്ല. അവര്ക്ക് ഈ ട്രോഫി എന്നില് നിന്ന് എടുക്കാന് കഴിയില്ല, ഇത് ഒരു യാഥാര്ത്ഥ്യമാണ്, അതിനാല് ഇത് എന്നെ കൂടുതല് സന്തോഷിപ്പിക്കുന്നു, കാരണം അക്കങ്ങള് വസ്തുതകളാണെന്നും റൊണാള്ഡോ പറഞ്ഞു.
നിലവില് സൗദി പ്രോ ലീഗില് അല് നസറിന് വേണ്ടിയാണ് റൊണാള്ഡോ കളിക്കുന്നത്. 19 മത്സരങ്ങള് കളിച്ച അല് ഹിലാലിനേക്കാള് ഏഴ് പോയിന്റ് പിന്നില് നിലവില് ലീഗ് ടേബിളില് രണ്ടാം സ്ഥാനത്താണ് അല് നസര്.