തീരുമാനങ്ങളെല്ലാം എടുക്കുന്നത് സതീശനും ലീഗ് നേതാക്കളും ചേര്‍ന്ന്, പാര്‍ട്ടിയോ മുന്നണിയോ ഒന്നും അറിയുന്നില്ല, യുഡിഎഫിലും കോണ്‍ഗ്രസിലും തമ്മിലടി മൂര്‍ച്ഛിക്കുന്നു
യുഡിഎഫ് സര്‍ക്കാര്‍ അധികാരത്തിലേറി നാലുമാസം പിന്നിട്ടപ്പോഴേക്കും മുന്നണിയിലും കോണ്‍ഗ്രസിലും അസാധാരണമായ ആഭ്യന്തര പ്രതിസന്ധി ഉരുത്തിരിയുന്നു.
യുഡിഎഫ് കണ്‍വീനറും മുതിര്‍ന്ന കോണ്‍ഗ്രസ് എംപിയുമായ അടൂര്‍ പ്രകാശ് തിരുവനന്തപുരത്ത് നടത്തിയ വാര്‍ത്താസമ്മേളനത്തിലൂടെ മുഖ്യമന്ത്രി വി.ഡി. സതീശന്റെ ഏകപക്ഷീയമായ ഭരണശൈലിക്കെതിരെ പരസ്യമായി അതൃപ്തി രേഖപ്പെടുത്തിയതോടെയാണ് പ്രശ്‌നം പുറത്തുവന്നത്.
തിരുവനന്തപുരം: യുഡിഎഫ് സര്‍ക്കാര്‍ അധികാരത്തിലേറി നാലുമാസം പിന്നിട്ടപ്പോഴേക്കും മുന്നണിയിലും കോണ്‍ഗ്രസിലും അസാധാരണമായ ആഭ്യന്തര പ്രതിസന്ധി ഉരുത്തിരിയുന്നു. യുഡിഎഫ് കണ്‍വീനറും മുതിര്‍ന്ന കോണ്‍ഗ്രസ് എംപിയുമായ അടൂര്‍ പ്രകാശ് തിരുവനന്തപുരത്ത് നടത്തിയ വാര്‍ത്താസമ്മേളനത്തിലൂടെ മുഖ്യമന്ത്രി വി.ഡി. സതീശന്റെ ഏകപക്ഷീയമായ ഭരണശൈലിക്കെതിരെ പരസ്യമായി അതൃപ്തി രേഖപ്പെടുത്തിയതോടെയാണ് പ്രശ്‌നം പുറത്തുവന്നത്.
ഭരണതലത്തിലെ പ്രധാന തീരുമാനങ്ങള്‍ മുഖ്യമന്ത്രിയും ലീഗ് നേതാക്കളും മാത്രം ആലോചിച്ച് നടപ്പാക്കുകയാണെന്നാണ് കോണ്‍ഗ്രസ് നേതാക്കളില്‍ ഒരു വിഭാഗത്തിന്റെ പരാതി. യുഡിഎഫ് യോഗങ്ങള്‍ പോലും സമീപകാലത്ത് നടക്കുന്നില്ല. മുന്നണി ചെയര്‍മാനായ മുഖ്യമന്ത്രി തന്നെ യോഗം വിളിക്കേണ്ടതാണെങ്കിലും അതിന് മുന്‍കൈയെടുക്കുന്നില്ലെന്ന് അടൂര്‍ പ്രകാശ് പറഞ്ഞു. തീരുമാനങ്ങളെക്കുറിച്ച് താന്‍ അറിയുന്നത് മാധ്യമങ്ങളിലൂടെ മാത്രമാണെന്നും, മുന്നണി കണ്‍വീനര്‍ എന്ന നിലയില്‍ ചോദ്യങ്ങള്‍ക്ക് മറുപടി പറയാന്‍ കഴിയാത്ത സ്ഥിതിയിലാണെന്നും അദ്ദേഹം പരാതിപ്പെട്ടു.
മുസ്ലീം ലീഗ് നേതാവ് എം.കെ. മുനീറിനെ ഭരണപരിഷ്‌കാര കമ്മീഷന്‍ അധ്യക്ഷനായും ഫോര്‍വേഡ് ബ്ലോക്ക് നേതാവ് ജി. ദേവരാജനെ ഡല്‍ഹിയിലെ കേരള സര്‍ക്കാരിന്റെ പ്രത്യേക പ്രതിനിധിയായും ക്യാബിനറ്റ് പദവിയോടെ നിയമിച്ച തീരുമാനങ്ങളാണ് പ്രധാന വിമര്‍ശനവിഷയം. ഇവ രണ്ടും യുഡിഎഫില്‍ ചര്‍ച്ച ചെയ്യുകയോ അറിയിക്കുകയോ ചെയ്തിട്ടില്ലെന്ന് അടൂര്‍ പ്രകാശ് പറഞ്ഞു. ഇരുവരും അര്‍ഹരാണ്. അവരെ വിമര്‍ശിക്കാനല്ല പറയുന്നത്. പക്ഷേ മുന്നണിയില്‍ ചര്‍ച്ച ചെയ്യേണ്ട കാര്യങ്ങളാണ്, എന്നായിരുന്നു അദ്ദേഹത്തിന്റെ നിലപാട്.
സാംസ്‌കാരിക രംഗത്തെ നിയമനങ്ങളിലും സമാനമായ അവഗണനയാണ്. ബോര്‍ഡുകളിലും കോര്‍പ്പറേഷനുകളിലും മുന്‍ എല്‍ഡിഎഫ് നിയമിതരെ ഇപ്പോഴും നിലനിര്‍ത്തുന്നതിലും അതൃപ്തിയുണ്ട്.
അടൂര്‍ പ്രകാശിന്റെ തുറന്നുപറച്ചില്‍ കോണ്‍ഗ്രസിനകത്തെ തമ്മിലടിയുടെ പ്രതിഫലനമായാണ് വിലയിരുത്തപ്പെടുന്നത്. മുഖ്യമന്ത്രിക്കെതിരെ ഒരു വിഭാഗം നേതാക്കള്‍ക്കിടയില്‍ പടയൊരുക്കം നടക്കുന്നുണ്ടെന്ന് സൂചനകളുണ്ട്.
കെ.സി. വേണുഗോപാല്‍ ഗ്രൂപ്പ് ഉള്‍പ്പെടെയുള്ളവര്‍ സതീശന്റെ ഏകപക്ഷീയ ശൈലിയില്‍ അസംതൃപ്തരാണെന്നും, കാബിനറ്റ് പദവികള്‍ പങ്കാളികള്‍ക്ക് മാത്രമായി നല്‍കുന്നതില്‍ പാര്‍ട്ടിക്കുള്ളില്‍ അതൃപ്തിയുണ്ടെന്നും റിപ്പോര്‍ട്ടുകള്‍ വരുന്നു. മന്ത്രി രമേശ് ചെന്നിത്തല ഉള്‍പ്പെടെയുള്ളവര്‍ ദൂരം പാലിക്കുന്നതായും വിലയിരുത്തലുകളുണ്ട്. ലീഗിന്റെ പിന്തുണയോടെ സതീശന്‍ മുഖ്യമന്ത്രിയായതിന്റെ പശ്ചാത്തലത്തില്‍, ഇപ്പോഴത്തെ നിയമനങ്ങള്‍ ആ പിന്തുണയ്ക്കുള്ള പ്രത്യുപകാരമായി കാണുന്നവരുമുണ്ട്.
വ്യക്തിപരമായ ആക്രമണമല്ലെന്നും, മുന്നണി കണ്‍വീനര്‍ എന്ന ഉത്തരവാദിത്തത്തിന്റെ ഭാഗമായാണെന്നും അടൂര്‍ പ്രകാശ് വ്യക്തമാക്കിയെങ്കിലും, സതീശനുമായുള്ള ബന്ധം ദുര്‍ബലമായതായി അദ്ദേഹം സൂചിപ്പിച്ചു. സര്‍ക്കാര്‍ നാലുമാസം പിന്നിട്ടിട്ടും യുഡിഎഫ് യോഗങ്ങളുടെ അഭാവവും ഏകോപനക്കുറവും തുടരുകയാണെങ്കില്‍, മുന്നണിയിലെ വിള്ളലുകള്‍ കൂടുതല്‍ കടുക്കുമെന്ന് രാഷ്ട്രീയ നിരീക്ഷകര്‍ ചൂണ്ടിക്കാട്ടുന്നു.