കോട്ടയം: ജലനിധി കുടിവെള്ള പദ്ധതിയിലെ അഴിമതി ആരോപണത്തിൽ പ്രതിപക്ഷ നേതാവ് പിണറായി വിജയനെതിരെ വിവാദ പരാമർശവുമായി പൂഞ്ഞാർ എം.എൽ.എ എം.ജെ. സെബാസ്റ്റ്യൻ. പാലായിൽ നടന്ന ഒരു പൊതുപരിപാടിക്കിടെയായിരുന്നു എം.എൽ.എയുടെ പരാമർശം. കഴിഞ്ഞ സർക്കാരിന്റെ കാലത്ത് ജലനിധി പ്രൊജക്ടിന്റെ ഭാഗമായി വലിയ അഴിമതിയാണ് നടന്നതെന്നും, താൻ നിയമസഭയിൽ അംഗമായിരുന്നെങ്കിൽ പിണറായി വിജയനെ അടിക്കുമായിരുന്നു എന്നുമാണ് അദ്ദേഹം പറഞ്ഞത്.

"ഇത് തികച്ചും നിലനിൽപ്പിന്റെ പോരാട്ടമാണെന്ന് പറയാൻ ഞാൻ ആഗ്രഹിക്കുകയാണ്. കാരണം എനിക്ക് ഇന്നും മനസിലാകുന്നില്ല, വൻ അഴിമതിയാണ് ജലനിധി പ്രൊജക്ടിന്റെ ഭാഗമായി നടന്നത്. ഞാൻ പെട്ടെന്ന് എല്ലാ കാര്യങ്ങളും പഠിക്കുന്നയാളാണ്. ഇക്കഴിഞ്ഞ സർക്കാരിന്റെ കാലത്ത് നിങ്ങളാരെങ്കിലും നിയമസഭയിൽ ഒരംഗമായിട്ട് ഇരിക്കുകയാണെങ്കിൽ, അവിടെ ഇരിക്കുന്ന പിണറായി വിജയനെ എഴുന്നേറ്റ് അടിച്ചേനെ? 44,000 കോടി വരുന്നതാണ് ജലനിധി പ്രൊജക്ട്. 420 പ്രൊജക്ടുകളാണ് അതിൽ ഉള്ളത്. അതിൽ വലുത് പാലാ- പൂഞ്ഞാർ ഉൾപ്പെടുന്ന 13 പഞ്ചായത്തുകളിലെ പ്രൊജക്ടുകളാണ്. എന്നാൽ അത് ഇന്നും പൂർത്തീകരിക്കാതെ കിടക്കുന്നത് കഴിഞ്ഞ സർക്കാരിന്റെ അനാസ്ഥയാണ്."