ചടയമംഗലത്തെ പ്ലസ്ടു വിദ്യാര്‍ത്ഥിനിയുടെ ആത്മഹത്യയില്‍ യുവാവ് അറസ്റ്റില്‍

 

കൊല്ലം: ചടയമംഗലത്ത് പ്ലസ് ടു വിദ്യാര്‍ഥിനി വീട്ടിനുള്ളില്‍ തൂങ്ങിമരിച്ച സംഭവത്തില്‍ യുവാവ് പൊലീസ് പിടിയില്‍. പോരേടം സ്വദേശി  പ്രവീണിനെയാണ് ചടയമംഗലം പോലീസ് അറസ്റ്റ് ചെയ്തത്. ഇക്കഴിഞ്ഞ പതിമൂന്നാം തീയതി വൈകിട്ടാണ് പെണ്‍കുട്ടിയെ വീട്ടിനുള്ളില്‍ തൂങ്ങിമരിച്ചനിലയില്‍ കണ്ടെത്തിയത്. അറസ്റ്റിലായ പ്രവീണ്‍ പെണ്‍കുട്ടിയുമായി രണ്ടു വര്‍ഷമായി സൗഹൃദത്തിലായിരുന്നു. എന്നാല്‍ പിന്നീട് പെണ്‍കുട്ടി ഇതില്‍ നിന്നും പിന്മാറി. എന്നാല്‍ യുവാവ് പെണ്‍കുട്ടിയെ നിരന്തരം ഫോണിലൂടെയും നേരിട്ടും ഭീഷണിപ്പെടുത്തിയിരുന്നു. 

പ്രവീണിന്റെ ശല്യം കൂടിയപ്പോള്‍ പെണ്‍കുട്ടിയുടെ വീട്ടുകാര്‍ യുവാവിനെ വിലക്കി. എന്നാല്‍ വാട്സ്ആപ്പ് സന്ദേശങ്ങള്‍ പുറത്തുവിടുമെന്നു  ഭീഷണിപെടുത്തിയതിനെ തുടര്‍ന്ന്  മാനസിക സമ്മര്‍ദ്ദത്തിലായ  പെണ്‍കുട്ടി ആത്മഹത്യ ചെയ്യുകയായിരുന്നു. സൈബര്‍ സെല്ലിന്റെ സഹായത്തോടെയാണ്  പോലീസ് പ്രതിയിലേക്ക് എത്തിയത്. പ്രവീണിനെ ചടയമംഗലത്തു നിന്നും  ഇന്നലെ രാത്രിയാണ് പോലീസ് പിടികൂടിയത്. യുവാവിനെതിരെ പോക്‌സോ, ആത്മഹത്യാ പ്രേരണക്കുറ്റം തുടങ്ങിയ വകുപ്പുകള്‍  ചുമത്തി. കോടതിയില്‍ ഹാജരാക്കിയ പ്രതിയെ  റിമാന്‍ഡ് ചെയ്തു.