തിരുവനന്തപുരം: ആറ്റിങ്ങലില്‍ കാറും ബൈക്കും കൂട്ടിയിടിച്ച്‌ വിദ്യാർഥി മരിച്ചു. നാവായിക്കുളം ചിറ്റായിക്കോട് കല്ലൂർകുഴി പുത്തൻവീട്ടില്‍ മുരളീധരൻ പിള്ളയുടെ മകൻ ഗോകുല്‍ (19) ആണ് മരിച്ചത്.

ആറ്റിങ്ങല്‍ പോളിടെക്നിക് ഒന്നാം വർഷ ഓട്ടോമൊബൈല്‍ വിദ്യാർഥിയാണ് ഗോകുല്‍. ഗോകുലും അതുലും സഹപാഠികളാണ്. കോളജില്‍ നടന്ന ഫ്രഷേഴ്സ് ഡേയില്‍ പങ്കെടുത്ത് പുറത്തേക്ക് പോയ സമയമാണ് അപകടം നടന്നതെന്നാണ് വിവരം. വ്യാഴാഴ്ച 11ന് വലിയകുന്ന് ആശുപത്രിക്ക് സമീപമായിരുന്നു അപകടം.

സുഹൃത്ത് അതുലിനൊപ്പം സഞ്ചരിക്കുമ്ബോഴായിരുന്നു അപകടം. ആറ്റിങ്ങല്‍ മൂന്ന്മുക്ക് ഭാഗത്തുനിന്നും വെഞ്ഞാറമൂട് ഭാഗത്തേക്ക് പോയ ഇവരുടെ ബൈക്ക് വളവില്‍ എതിരെ വന്ന കാറില്‍ ഇടിക്കുകയായിരുന്നു.

അപകടത്തിന് പിന്നാലെ സമീപത്തുണ്ടായിരുന്നവർ ആശുപത്രിയിലെത്തിച്ചെങ്കിലും ഗോകുലിന്റെ ജീവൻ രക്ഷിക്കാനായില്ല. ഗോകുലിന്റെ കൂടെയുണ്ടായിരുന്ന നാവായിക്കുളം സ്വദേശി അതുലിനും ഗുരുതരമായി പരിക്കേറ്റു.

ഇയാളെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. അമിത വേഗതയും ഹെല്‍മെറ്റ് ധരിക്കാതിരുന്നതും അപകടത്തിന്റെ തീവ്രത കൂട്ടിയെന്ന് പോലീസ് പറഞ്ഞു