സ്വാതന്ത്ര്യദിനത്തിനും ഗാന്ധിജയന്തിക്കും സ്കൂളിലെ അവധി റദ്ദാക്കണം, അറിവ് നേടാനുള്ള ദിനങ്ങളാക്കി മാറ്റണം ; ബാലാവകാശ കമ്മീഷൻ
വിദ്യാഭ്യാസ സ്ഥാപനങ്ങൾക്ക് വിശേഷ ദിവസങ്ങളിൽ നൽകുന്ന പൊതു അവധി റദ്ദാക്കണമെന്ന നിർദേശവുമായി ബാലാവകാശ കമ്മീഷൻ. സ്വാതന്ത്ര്യദിനം, ഗാന്ധിജയന്തി ദിനം, റിപ്പബ്ലിക് ദിനം തുടങ്ങിയ ദിവങ്ങളിൽ നൽകുന്ന പൊതു അവധി റദ്ദാക്കാനും അറിവും വിജ്ഞാനവും സമ്പാദിക്കാനുള്ള ദിനങ്ങളാക്കി മാറ്റാനുമാണ് മനുഷ്യാവകാശ കമ്മീഷന്റെ നിർദേശം. കമ്മീഷൻ ചെയർപേഴ്സൺ കെ വി മനോജ് കുമാർ, അംഗങ്ങളായ കെ കെ ഷാജു, ഡോ. എഫ് വിൽസൺ, എന്നിവരുടെ ഫുൾ ബെഞ്ചാണ് ഇതുമായി ബന്ധപ്പെട്ട നിർദേശം പുറത്തിറക്കിയത്. സ്വാതന്ത്ര ദിനത്തിൽ ഇന്ത്യയുടെ സ്വാതന്ത്ര സമര ചരിത്രവും അതിനു ജീവത്യാഗം ചെയ്തവരെക്കുറിച്ച് പഠിക്കുകയും വേണമെന്ന ഉദ്ദേശത്തോടെയാണ് അവധി റദ്ദാക്കിയതെന്ന് ഉദ്യോഗസ്ഥർ പറഞ്ഞു.
റിപ്പബ്ലിക് ദിനത്തിലും ഭരണഘടനാ ദിനത്തിലും രാജ്യത്തിന്റെ ഭരണഘടനയെക്കുറിച്ചും അതിന്റെ പ്രധാന്യത്തെക്കുറിച്ചും വിദ്യാർത്ഥികൾ പഠിക്കണം. ഗാന്ധി ജയന്തി ദിനത്തിൽ പരിസ്ഥിതി സംരക്ഷണത്തിന്റെയും പരിസര ശുചിത്വത്തിന്റെയും പ്രാധാന്യം ഉൾക്കൊള്ളുന്ന പ്രവർത്തനങ്ങൾ എല്ലാ സ്കൂളുകളിലും സംഘടിപ്പിക്കണമെന്ന് കമ്മീഷൻ നിർദേശം നൽകിയിട്ടുണ്ട്.ഓണം, ക്രിസ്തുമസ്, പെരുന്നാൾ തുടങ്ങിയ ആഘോഷദിവസങ്ങളിൽ പ്രത്യേക പരിപാടികളും പദ്ധതികളും നടപ്പിലാക്കാനും നിർദേശമുണ്ട്. മനുഷ്യർ തമ്മിലുള്ള സഹകരണം, പരസ്പര ബഹുമാനം, ഐക്യം, അഖണ്ഡത, സമത്വം തുടങ്ങിയ മൂല്യങ്ങൾ കുട്ടികളിലേക്ക് പകർന്ന് നൽകാനാണ് ഇത്തരം പരിപാടികൾ സംഘടിപ്പിക്കേണ്ടത് എന്നും ബാലാവകാശ കമ്മീഷൻ വ്യക്തമാക്കി. എല്ലാവർക്കും തുല്യ നീതിയും പരിഗണനയും സംരക്ഷണവും ലഭിക്കുന്ന നവലോകം സൃഷ്ടിക്കാനാകുന്ന ഓണസന്ദേശം കുട്ടികളിലെത്തിക്കണം. ദിനാചരണങ്ങൾ, കലാകായിക മത്സരങ്ങൾ എന്നിവയിൽ കുട്ടികളുടെ നേതൃപരമായ പങ്കാളിത്തം ഉറപ്പാക്കാനും നിർദേശമുണ്ട്.