സ്റ്റേറ്റ് ബാങ്ക് ഓഫ് ഇന്ത്യ (എസ് ബി ഐ) പ്രൊബേഷനറി ഓഫീസർ തസ്തികയിൽറിക്രൂട്ട്മെന്റ് നടത്തുന്നതിന്റെ ഭാഗമായുള്ള ഓൺലൈൻ രജിസ്ട്രേഷൻ നടപടികൾ ഇന്ന് അവസാനിക്കും. ആകെ 541 ഒഴിവുകളാണുള്ളത്.

ഏതെങ്കിലും വിഷയത്തിൽ ബിരുദം/ തത്തുല്യം. അവസാന വർഷ ബിരുദക്കാർക്കും അപേക്ഷിക്കാം. മെഡിക്കൽ/ എഞ്ചിനീയറിങ്/ ചാർട്ടേഡ്/ കോസ്റ്റ് അക്കൗണ്ടന്റ് യോഗ്യതയുള്ളവരെയും പരിഗണിക്കും. 21 വയസ് മുതൽ 30 വയസ് വരെ പ്രായമുള്ളവർക്ക് അപേക്ഷിക്കാം. പ്രായം ഏപ്രിൽ 01, 2025 അടിസ്ഥാനമാക്കി കണക്കാക്കും. സംവരണ വിഭാഗക്കാർക്ക് നിയമാനുസൃത വയസിളവ് ലഭിക്കും.

തെരഞ്ഞെടുക്കപ്പെടുന്നവർക്ക് പ്രതിമാസം 48,480 രൂപമുതൽ 85,920 രൂപവരെ ശമ്പളം ലഭിക്കും. പ്രിലിമിനറി പരീക്ഷ ജൂലൈ/ ആഗസ്റ്റ് മാസങ്ങളിലായി നടക്കും. ഒരു മണിക്കൂർ ദൈർഘ്യമുള്ള ഓൺലൈൻ പ്രിലിമിനറി പരീക്ഷയിൽ ഇംഗ്ലീഷ് ലാംഗ്വേജ്, ക്വാണ്ടിറ്റേറ്റീവ് ആപ്റ്റിറ്റിയൂഡ്, റീസണിങ് എബിലിറ്റി വിഭാഗങ്ങളിൽ നിന്ന് 100 ഒബ്ജക്ടീവ് ചോദ്യങ്ങളുണ്ടാവും. മെയിൻ പരീക്ഷ സെപ്റ്റംബറിൽ നടക്കും. ഒബ്ജക്ടീവ്, ഡിസ്‌ക്രിപ്റ്റീവ് മാതൃകയിലാണ് മെയിൻ പരീക്ഷ നടക്കുക.

എഴുത്ത് പരീക്ഷക്ക് ശേഷം സൈക്കോമെട്രിക് ടെസ്റ്റും, ഗ്രൂപ്പ് എക്സർസൈസും, അഭിമുഖവും നടക്കും. തിരഞ്ഞെടുക്കപ്പെടുന്നവർക്ക് രണ്ട് വർഷത്തെ പ്രൊബേഷണറി കാലയളവുണ്ട്. പ്രൊബേഷണറി ഓഫീസർ തസ്തികയിലേക്ക് ജനറൽ വിഭാഗക്കാർക്ക് 4 തവണയും, ഒബിസി-ഭിന്നശേഷിക്കാർക്ക് 7 തവണയും മാത്രമേ പരീക്ഷ എഴുതാനാവൂ. പട്ടിക വിഭാഗക്കാർക്ക് പരിധിയില്ല. വെബ്സൈറ്റ്: www.bank.sbi/careers, www.sbi.co.in/careers.

അപേക്ഷിക്കാൻ ചെയ്യേണ്ടത്

ഔദ്യോഗിക വെബ്സൈറ്റായ sbi.co.in സന്ദർശിക്കുക.

‘കരിയേഴ്സ്’ ടാബിൽ ക്ലിക്ക് ചെയ്ത് ‘കറന്റ് ഓപ്പണിങ്‌സ്’ എന്നതിലേക്ക് നാവിഗേറ്റ് ചെയ്യുക.

എസ്ബിഐ പിഒ റിക്രൂട്ട്മെന്റ് 2025 ലിങ്ക് കണ്ടെത്തി ‘apply online’ ൽ ക്ലിക്ക് ചെയ്യുക

വാലിഡ് ആയ ഒരു ഇ-മെയിൽ ഐഡിയും മൊബൈൽ നമ്പറും ഉപയോഗിച്ച് രജിസ്റ്റർ ചെയ്യുക.

കൃത്യമായ വിശദാംശങ്ങൾ സഹിതം അപേക്ഷാ ഫോം പൂരിപ്പിക്കുക.

നിർദിഷ്ട ഫോർമാറ്റിൽ ആവശ്യമായ രേഖകൾ അപ്ലോഡ് ചെയ്യുക.

ഫീസ് അടച്ച് ഫോം സമർപ്പിക്കുക