പാലക്കാട്: അപായച്ചങ്ങല വലിച്ചു ട്രെയിൻ നിർത്തിച്ചതിന് റിട്ട. റെയിൽവേ സൂപ്രണ്ടിനു ആർപിഎഫ് കേസിൽ സമൻസ്. കോഴിക്കോട് നാദാപുരം വലിയപുരയിൽ വിജയനാണ് സമൻസ് ലഭിച്ചത്.

ബുധനാഴ്ച ഷൊർണൂർ റെയിൽവേ കോടതിയിൽ ഹാജരാകാനാണ് നിർദ്ദേശം. മതിയായ കാരണങ്ങളില്ലാതെ ചെയിൻ വലിച്ചാൽ 1000 രൂപ പിഴ അടയ്ക്കണമെന്നാണു വ്യവസ്ഥ. പിഴ ഒടുക്കാൻ തയാറാകാഞ്ഞതിനെ തുടർന്നാണ് സമൻസ് അയച്ചിരിക്കുന്നത്. 

ജൂൺ 15ന് എറണാകുളം – കണ്ണൂർ ഇന്റർസിറ്റി എക്സ്പ്രസിൽ ആലുവയിൽ നിന്നു കയറാൻ ഡി1 കോച്ചിൽ റിസർവ് ചെയ്ത വിജയനും ഭാര്യയും മകളും ഡിസ്പ്ലേ ബോർഡിൽ പറഞ്ഞ സ്ഥലത്താണു കാത്തുനിന്നത്.

പക്ഷേ ട്രെയിൻ ഈ ഭാഗത്തല്ല നിർത്തിയത്. വിജയൻ ട്രെയിനിൽ കയറുകയും ചെയ്തിരുന്നു. ഒരു മിനിറ്റിനു ശേഷം ട്രെയിൻ മുന്നോട്ടു നീങ്ങി. എന്നാൽ ഭാര്യയ്ക്കും മകൾക്കും കയറാനായില്ല. ഇതോടെയാണ് ചെയിൻ വലിച്ചു ട്രെയിൻ നിർത്തിച്ചത്.

ഡിസ്പ്ലേ ബോർഡിൽ പറഞ്ഞതിൽ നിന്നു വ്യത്യസ്തമായാണു ട്രെയിൻ നിർത്തിയതെന്നു വിജയൻ പറയുന്നു. മാത്രമല്ല രണ്ട് മിനിറ്റ് സ്റ്റോപ്പുള്ള ട്രെയിൻ ഒരു മിനിറ്റ് മാത്രമാണു സ്റ്റേഷനിൽ നിർത്തിയതെന്നും ഇതിന്റെ തെളിവുകൾ അന്നുതന്നെ നാഷനൽ ട്രെയിൻ എൻക്വയറി സിസ്റ്റത്തിൽ (എൻടിഇഎസ്) നിന്നു ശേഖരിച്ചിട്ടുണ്ടെന്നും വിജയൻ വ്യക്തമാക്കി.