ജയ്പൂർ:  നീറ്റ് യുജി റദ്ദാക്കുന്നതിലേക്ക് നയിച്ച ചോദ്യപ്പേപ്പർ ചോർച്ചയുടെ ഉറവിടം കണ്ടെത്തി. മഹാരാഷ്ട്രയിലെ നാസിക്കിലുള്ള സുരക്ഷാ പ്രസ്സിൽ നിന്നാണ് ചോദ്യപ്പേപ്പർ ചോർന്നതെന്ന് അന്വേഷണ സംഘം കണ്ടെത്തി.

രാജസ്ഥാനിലെ സീക്കാർ കേന്ദ്രീകരിച്ച് പ്രവർത്തിക്കുന്ന മാഫിയയാണ് ഇതിന് പിന്നിലെന്നാണ് സൂചന. നാസിക്കിലെ പ്രസ്സിൽ ചോദ്യപ്പേപ്പർ അച്ചടിക്കുന്ന ഘട്ടത്തിൽ തന്നെ ഒരു ഉദ്യോഗസ്ഥന്റെ സഹായത്തോടെ ഇത് ചോർത്തുകയായിരുന്നുവെന്നാണ് പ്രാഥമിക അന്വേഷണത്തിൽ വ്യക്തമാകുന്നത്.

ചോർത്തിയ ചോദ്യങ്ങൾ ഡിജിറ്റൽ രൂപത്തിലാക്കി സീക്കാറിലെ ഒരു സ്വകാര്യ കോച്ചിംഗ് സെന്റർ ഉടമയ്ക്ക് കൈമാറി. പരീക്ഷയ്ക്ക് മണിക്കൂറുകൾക്ക് മുൻപ് ലക്ഷക്കണക്കിന് രൂപയ്ക്കാണ് ഓരോ ചോദ്യപ്പേപ്പറും വിറ്റഴിച്ചത്. സംഭവവുമായി ബന്ധപ്പെട്ട് രാജസ്ഥാൻ പൊലീസ് അഞ്ച് പേരെ കൂടി കസ്റ്റഡിയിലെടുത്തു.

സീക്കാറിലെ ചില പ്രമുഖ വ്യക്തികൾക്കും ഈ തട്ടിപ്പിൽ പങ്കുണ്ടെന്ന് സംശയിക്കുന്നു. സിബിഐ അന്വേഷണം ആരംഭിക്കുന്നതിന് മുന്നോടിയായി സംസ്ഥാന പൊലീസ് ശേഖരിച്ച വിവരങ്ങൾ കൈമാറിയിട്ടുണ്ട്.