പയ്യന്നൂരില്‍ മന്ത്രി ഒജെ ജനീഷിന്റെ വാഹനം തടഞ്ഞ സംഭവത്തില്‍ 10 ഡിവൈഎഫ്‌ഐ പ്രവര്‍ത്തകര്‍ക്കെതിരെ കേസെടുത്ത് പൊലീസ്. ഭീകരാന്തരീക്ഷം സൃഷ്ടിച്ച് മന്ത്രിയുടെ യാത്ര തടസ്സപ്പെടുത്തിയെന്ന് കേസെടുത്തത്. ഒജെ ജെനീഷിന്റെ ഔദ്യോഗിക വാഹനത്തിനു നേരെ കണ്ണൂരിലും കാസര്‍കോട്ടും വഴിനീളെ ഡിവൈഎഫ്‌ഐ നടത്തിയ പ്രതിഷേധത്തില്‍ വ്യാപക അക്രമമാണുണ്ടായത്. തളിപ്പറമ്പിലും പയ്യന്നൂരിലും അടക്കം അഞ്ചിടത്ത് ഡിവൈഎഫ്‌ഐ സംഘം വാഹനം തടഞ്ഞ് ആക്രമിച്ചു. കല്ലുകള്‍ കൊണ്ട് ഇടിച്ചു. ആക്രമണത്തില്‍ വാഹനത്തിന് കേടുപാട് സംഭവിച്ചു. മന്ത്രിയുടെ വാഹനം തടഞ്ഞതില്‍ 10 ഡിവൈഎഫ്‌ഐ പ്രവര്‍ത്തകര്‍ക്കെതിരെ കേസെടുത്തു.

പിന്നീട് രാത്രിയോടെ തൃക്കരിപ്പൂരില്‍ ഒരു പൊതുപരിപാടിയില്‍ എത്തിയ ജെനീഷിനെ ഡിവൈഎഫ്‌ഐ പ്രവര്‍ത്തകര്‍ തടഞ്ഞു. വാഹനം പിന്നീട് പൊലീസ് ഏറെ പണിപ്പെട്ടാണ് പരിപാടി നടക്കുന്നയിടത്തേക്ക് കടത്തിവിട്ടത്. ആര്‍പ്പ് വിളികളോടെ ജെനീഷിനെ യൂത്ത് കോണ്‍ഗ്രസുകാര്‍ അകത്തേക്ക് കൊണ്ട് പോയി. പിന്നീട് മന്ത്രി പുറത്തിറങ്ങിയപ്പോഴും പ്രതിഷേധമുണ്ടായി, വാഹനത്തിന് നേരെ ഡിവൈഎഫ്‌ഐ പ്രവര്‍ത്തകര്‍ മുട്ടയെറിഞ്ഞു. കനത്ത പൊലീസ് കാവലിലാണ് ജെനീഷിനെ പുറത്തേക്ക് കൊണ്ട് പോയത്.