ശബരിമല മകരവിളക്ക് മഹോത്സവത്തോടനുബന്ധിച്ച് ആരോഗ്യ വകുപ്പ് സ്പെഷ്യലിസ്റ്റുകൾ ഉൾപ്പെടെയുള്ള അൻപതോളം ഡോക്ടർമാരുടെയം അനുബന്ധ സ്റ്റാഫുകളുടെയും സേവനം ഒരുക്കിയിട്ടുണ്ട്. സന്നിധാനം, പമ്പ, നീലിമല, അപ്പാച്ചിമേട്, ചരൽമേട്, നിലയ്ക്കൽ ആശുപത്രികളിലായാണ് ഇവരെ വിന്യസിച്ചിരിക്കുന്നത്. അടിയന്തര ഘട്ടത്തിൽ സേവനം ഉറപ്പാക്കുന്നതിനായി ഡോക്ടർമാരുടെ റിസർവ് ലിസ്റ്റും തയ്യാറാക്കിയിട്ടുണ്ട്. എല്ലാ ആശുപത്രികളിലും മരുന്നുകളുടെ ലഭ്യത ഉറപ്പു വരുത്തിയിട്ടുണ്ട്. സാധാരണ മരുന്നുകൾക്ക് പുറമെ ഹൃദയാഘാതത്തിന് ത്രോപോലിസിസ് ചെയ്യുന്ന മരുന്ന്, പാമ്പിൻ വിഷത്തിനുള്ള ആന്റി സ്നേക്ക് വെനം, പേവിഷബാധയ്ക്കുള്ള വാക്സിൻ, ഇമ്മ്യൂണോഗ്ലോബുലിൻ മുതലായവയും ആശുപത്രികളിൽ ലഭ്യമാണ്.

മകരവിളക്ക് വ്യൂ പോയിന്റുകളിൽ ആംബുലൻസും മെഡിക്കൽ സംഘവും സേവനത്തിനുണ്ടാകും. അടിയന്തര സർവീസിനായി നിലവിലുള്ള 27 ആംബുലൻസുകൾക്ക് പുറമേ 19 അധിക ആംബുലൻസുകൾ ഉൾപ്പെടെ 46 ആംബുലൻസുകൾ സജ്ജമാക്കിയിട്ടുണ്ട്. ഇതിൽ  14 ആംബുലൻസുകൾ വിവിധ വ്യു പോയിന്റുകളിലും 5 ആംബുലൻസുകൾ പമ്പയിലും നിലയ്ക്കലുമായി സേവനത്തിനുണ്ടാകും. 

പമ്പ ഹിൽടോപ്പ്, പമ്പ ഹിൽഡൗൺ, യു ടേൺ, ത്രിവേണി പെട്രോൾ പമ്പ്, ത്രിവേണി പാലം, പമ്പ കെ.എസ്.ആർ.ടി.സി ബസ് സ്റ്റാൻഡ്, ചാലക്കയം, അട്ടത്തോട് (പമ്പ-നിലയ്ക്കൽ റോഡ്), കിഴക്കേ അട്ടത്തോട്, പടിഞ്ഞാറേ അട്ടത്തോട്, നെല്ലിമല, പഞ്ഞിപ്പാറ, ആങ്ങമൂഴി, വലിയാനവട്ടം, സന്നിധാനത്ത് പാണ്ടിത്താവളം, ബെയ്ലി പാലം, എച്ച്.ഐ ക്വാർട്ടേഴ്സ് എന്നിവിടങ്ങളിൽ അധിക മെഡിക്കൽ ടീം പ്രവർത്തിക്കും. 

പമ്പ മുതൽ സന്നിധാനം വരെയുള്ള പാതയിൽ 17 അടിയന്തര വൈദ്യസഹായകേന്ദ്രങ്ങൾ (നീലിമല ബോട്ടം, നീലിമല മിഡിൽ, നീലിമല ടോപ്, അപ്പാച്ചിമേട് ബോട്ടം, അപ്പാച്ചിമേട് മിഡിൽ, അപ്പാച്ചിമേട് ടോപ്, ഫോറെസ്റ്റ് ക്യാമ്പ് ഷെഡ്, മരക്കൂട്ടം, ക്യൂ കോംപ്ലക്സ് 2, ക്യൂ കോംപ്ലക്സ് എസ്. എം 1, ശരംകുത്തി, വാവരുനട, സോപാനം, പാണ്ടിത്താവളം, ചരൽമേട് ടോപ്, ചരൽമേട് മിഡിൽ, ചരൽമേട് ബോട്ടം) സജ്ജമാണ്.

സ്ട്രെച്ചർ സർവീസ്, ആംബുലൻസ് സർവീസ് എന്നിവ നിയന്ത്രിക്കുന്നതിനായി 24 മണിക്കൂറും പ്രവർത്തിക്കുന്ന കൺട്രോൾ റൂമും പ്രവർത്തനം തുടങ്ങി. ഇതിന് പുറമെ ജില്ലാ മെഡിക്കൽ ഓഫീസിൽ 72 മണിക്കൂർ കൺട്രോൾ റൂം പ്രവർത്തിക്കുന്നുണ്ട്. (നമ്പർ: 0468 2222642, 0468 2228220) 

തിരുവാഭരണഘോഷയാത്ര സംഘത്തെ സന്നിധാനത്തേയ്ക്കും തിരിച്ചുമുള്ള യാത്രയിലും മെഡിക്കൽ ടീം അനുഗമിക്കും. തിരുവാഭരണ ഘോഷയാത്ര വരുന്നപാതയിലുള്ള ആശുപത്രികൾ ആ സമയം തുറന്ന് പ്രവർത്തിക്കും. (കുളനട 6 മണി വരെ).  മകരവിളക്കിന് മുന്നോടിയായി നിലയ്ക്കൽ, പമ്പ, സന്നിധാനം എന്നിവിടങ്ങളിൽ ഹെൽത്ത് സൂപ്പർവൈസർമാരുടെയും ഹെൽത്ത് ഇൻസ്പെക്ടർമാരുടെയും നേതൃത്വത്തിൽ രോഗ പ്രതിരോധ പ്രവർത്തനങ്ങൾ നടത്തുന്നുണ്ട്.  ഭക്തർക്ക് ശബരിമലയിൽ അടിയന്തര വൈദ്യസഹായത്തിനായി 04735 203232 എന്ന ടോൾ ഫ്രീ നമ്പറിൽ ബന്ധപ്പെടാം.