തിരുവനന്തപുരം: സംസ്ഥാനത്ത് വരുന്ന നവംബർ മാസം മുതൽ വീണ്ടും വൈദ്യുതി നിയന്ത്രണങ്ങൾ (ലോഡ്‌ഷെഡിങ്) ഏർപ്പെടുത്തിയേക്കുമെന്ന് സൂചന. ഹിമാചൽ പ്രദേശിൽ നിന്ന് പീക്ക് അവർ (ഉയർന്ന ഉപയോഗമുള്ള സമയം) ആവശ്യങ്ങൾക്കായുള്ള വൈദ്യുതി വാങ്ങുന്ന കാര്യത്തിൽ അന്തിമ തീരുമാനമാകാത്തതാണ് പ്രതിസന്ധിക്ക് പ്രധാന കാരണം. നിയന്ത്രണങ്ങൾ ഏർപ്പെടുത്തുന്നത് സംബന്ധിച്ച് കെഎസ്ഇബി സർക്കാരിന്റെ അനുമതി തേടിയിട്ടുണ്ട്.

പീക്ക് അവറുകളിലെ ഉപയോഗത്തിനായി 846 മെഗാവാട്ട് മുതൽ 1280 മെഗാവാട്ട് വരെ വൈദ്യുതി നൽകാൻ ഹിമാചൽ പ്രദേശ് തയാറാണെന്ന് അറിയിച്ചിട്ടുണ്ടെങ്കിലും യൂണിറ്റിന് 14.50 രൂപയാണ് അവർ ആവശ്യപ്പെടുന്നത്. എന്നാൽ തുക യൂണിറ്റിന് 12.50 രൂപയായി കുറയ്ക്കാനാണ് കെഎസ്ഇബി ശ്രമിക്കുന്നത്. വൈദ്യുതി വാങ്ങുന്നതുമായി ബന്ധപ്പെട്ട് മുഖ്യമന്ത്രിയും വൈദ്യുതി മന്ത്രിയും തമ്മിൽ ചർച്ചകൾ നടത്തിയെങ്കിലും അന്തിമ തീരുമാനത്തിൽ എത്താറായിട്ടില്ല.

സർക്കാരിന്റെ അനുമതി ലഭിച്ച ശേഷമേ കെഎസ്ഇബിക്ക് ഇനി റെഗുലേറ്ററി കമ്മീഷനെ സമീപിക്കാൻ സാധിക്കൂ. പീക്ക് അവർ വൈദ്യുതിക്കായി കെഎസ്ഇബി നേരത്തെ ടെൻഡറുകൾ വിളിച്ചിരുന്നെങ്കിലും കുറഞ്ഞ വിലയ്ക്ക് വൈദ്യുതി നൽകാൻ കരാറുകാർ ആരും മുന്നോട്ടുവരാതിരുന്നത് പ്രതിസന്ധി രൂക്ഷമാക്കി. സർക്കാർ തലത്തിൽ അടിയന്തര തീരുമാനമുണ്ടായില്ലെങ്കിൽ നവംബർ മുതൽ സംസ്ഥാനത്ത് വീണ്ടും വൈദ്യുതി നിയന്ത്രണം ഏർപ്പെടുത്തേണ്ടി വരും.