പുതിയ പുസ്തകവുമായി ദേശാഭിമാനി മുന്‍ ന്യൂസ് എഡിറ്റര്‍ കെ ആര്‍ അയജന്‍. 'പറയാന്‍ ബാക്കിവെച്ചത്' എന്നാണ് പുസ്തകത്തിന്റെ പേര്. അജയന്‍ തന്നെയാണ് പുതിയ പുസ്തകം പുറത്തിറങ്ങുന്ന വിവരം ഫേസ്ബുക്കിലൂടെ അറിയിച്ചത്. പുസ്തകത്തിന്റെ കവറും ഫേസ്ബുക്കില്‍ അജയന്‍ പങ്കുവെച്ചിട്ടുണ്ട്. 'ഐ ആം എ കമ്യൂണിസ്റ്റ്' എന്ന് അവസാനിക്കുന്ന കുറിപ്പും ഫേസ്ബുക്കില്‍ പങ്കുവെച്ച പോസ്റ്ററില്‍ ഉണ്ട്. ആരോഹണം ഹിമാലയം, ചിനാറില്‍ ഇളം മഞ്ഞ വെയില്‍, പാര്‍വതി വാലി, സ്പിത്തി, ഉല്ലാസ ബുദ്ധന്‍, കേദാര്‍ ഗൗള, പത്രോസ് രക്ഷതു, സ്വര്‍ഗ്ഗാരോഹിണി, ഓര്‍മ്മക്കുടന്ന തുടങ്ങിയ പുസ്തകങ്ങള്‍ അജയന്‍ രചിച്ചിട്ടുണ്ട്.

അടുത്തിടെയായിരുന്നു ദേശാഭിമാനിയില്‍ നിന്ന് കെ ആര്‍ അജയന്‍ രാജിവെച്ചത്. 'കള്ളന്‍ വിജയന്‍' എന്ന ലേഖനം വിവാദമായതോടെയായിരുന്നു അജയന്റെ രാജി. രാജിവെയ്ക്കുകയോ അല്ലെങ്കില്‍ അവധിയെടുക്കുകയോ വേണമെന്ന് അജയനോട് ചീഫ് എഡിറ്റര്‍ പുത്തലത്ത് ദിനേശന്‍ നിര്‍ദേശിക്കുകയായിരുന്നു. അച്ചടക്ക നടപടിയെന്ന നിലയില്‍ അജയനെ വാരാന്തപ്പതിപ്പിന്റെ ചുമതയില്‍ നിന്ന് ആദ്യം മാറ്റിയിരുന്നു. ഇതിന് പിന്നാലെയായിരുന്നു രാജിവെയ്ക്കുകയോ അവധിയെടുക്കുകയോ വേണമെന്ന് നിര്‍ദേശിച്ചത്.