പ്രിന്സിപ്പലിന് നേരെ കരി ഓയില് ഒഴിച്ച സംഭവം; കെ എസ് യു പ്രവര്ത്തകര് അറസ്റ്റില്
കെഎസ്യു സംസ്ഥാന ജനറല് സെക്രട്ടറി അല് അമീന്, മിവ ജോളി എന്നിവര് ഉള്പ്പടെ പത്തിലേറെ പേരാണ് അറസ്റ്റിലായത്.
കൊച്ചി: ആലുവ യുസി കോളജ് പ്രിന്സിപ്പല് ഡോ. മിനി ആലീസിനു നേരെ കരി ഓയില് ഒഴിച്ച സംഭവത്തിൽ കെഎസ് യു പ്രവര്ത്തകര് അറസ്റ്റിൽ. കെഎസ്യു സംസ്ഥാന ജനറല് സെക്രട്ടറി അല് അമീന്, മിവ ജോളി എന്നിവര് ഉള്പ്പടെ പത്തിലേറെ പേരാണ് അറസ്റ്റിലായത്. കോളജില് നിന്ന് പുറത്താക്കിയ വിദ്യാര്ഥികളെ തിരിച്ചെടുക്കണമെന്നാവശ്യപ്പെട്ടായിരുന്നു പ്രതിഷേധം. പ്രതിഷേധത്തില് പൊലീസുകാരിക്കും പരിക്കേറ്റിരുന്നു.
യൂണിയന്റെ നേതൃത്വത്തില് കോളജില് ഗസല് നൈറ്റ് സംഘടിപ്പിച്ചിരുന്നു. കോളജ് നിര്ദേശം ലംഘിച്ച് രാത്രി ഏറെ വൈകി പരിപാടി സംഘടിപ്പിച്ചതിനെ തുടര്ന്ന് കെഎസ് യു പ്രവര്ത്തകരായ ഹരികൃഷ്ണന്, അജ്മല്, ബാദുഷ എന്നിവരെ മാനേജ്മെന്റ് സസ്പെന്ഡ് ചെയ്തിരുന്നു. തുടര്ന്ന് വ്യാഴം മുതല് കെഎസ് യു അനിശ്ചിതകാലസമരം പ്രഖ്യാപിച്ചു. ഇതോടെ ക്ലാസുകള് ഓണ്ലൈനിലേക്ക് മാറ്റിയതായി വിദ്യാര്ഥികളെയും രക്ഷിതാക്കളെയും മാനേജ്മെന്റ് അറിയിച്ചിരുന്നു.ഇതിന് പിന്നാലെ പ്രതിഷേധം ശക്തമാക്കിയ കെഎസ് യു പ്രവര്ത്തകര് പ്രിന്സിപ്പലിന് നേരെ കരിഓയില് ഒഴിക്കുകയയായിരുന്നു.