വണ്ടിപ്പെരിയാർ: മദ്യപിച്ച് അമിതവേഗതയിൽ ബസ് ഓടിച്ച കെ.എസ്.ആർ.ടി.സി ഡ്രൈവർ പോലീസിന്റെ പിടിയിലായി. കുമളിയിൽ നിന്ന് കോട്ടയത്തേക്ക് പുറപ്പെട്ട ബസിലെ ഡ്രൈവർ വിനീഷ് കുമാറിനെയാണ് വണ്ടിപ്പെരിയാർ പോലീസ് അറസ്റ്റ് ചെയ്തത്. ഡ്രൈവറുടെ ഉത്തരവാദിത്തമില്ലാത്ത പെരുമാറ്റം കാരണം ബസിലുണ്ടായിരുന്ന 45-ഓളം യാത്രക്കാരുടെ ജീവനാണ് തലനാരിഴയ്ക്ക് രക്ഷപ്പെട്ടത്.

യാത്ര ആരംഭിച്ചതുമുതൽ ബസിന്റെ നിയന്ത്രണം നഷ്ടപ്പെടുന്ന രീതിയിലായിരുന്നു ഡ്രൈവർ വാഹനം ഓടിച്ചിരുന്നത്. ചോറ്റുപാറയിലും നെല്ലിമലയിലും വെച്ച് എതിർദിശയിൽ വന്ന മറ്റ് വാഹനങ്ങളിൽ ഇടിക്കുന്ന രീതിയിലാണ് ബസ് കടന്നുപോയത്. അമിതവേഗതയും വാഹനം വെട്ടിക്കുന്നതും കണ്ട് ഭയന്ന യാത്രക്കാർ കാര്യമന്വേഷിച്ചെങ്കിലും തനിക്ക് കുഴപ്പമൊന്നുമില്ലെന്ന മറുപടിയാണ് ഡ്രൈവർ നൽകിയത്.

എന്നാൽ വണ്ടിപ്പെരിയാറിൽ വെച്ച് വീണ്ടും ബസിന്റെ നിയന്ത്രണം നഷ്ടപ്പെട്ടതോടെ മുൻഭാഗത്തിരുന്ന യാത്രക്കാർ ശക്തമായി ഇടപെടുകയും ബസ് വഴിയരികിൽ നിർത്താൻ ഡ്രൈവറെ നിർബന്ധിതനാക്കുകയുമായിരുന്നു. തുടർന്ന് യാത്രക്കാർ ചേർന്ന് ബസിന്റെ താക്കോൽ ഊരിമാറ്റി നാട്ടുകാരുടെ സഹായത്തോടെ പോലീസിൽ വിവരമറിയിക്കുകയായിരുന്നു. സ്ഥലത്തെത്തിയ വണ്ടിപ്പെരിയാർ പോലീസ് ഡ്രൈവറെ കസ്റ്റഡിയിലെടുത്ത് വൈദ്യപരിശോധനയ്ക്ക് വിധേയനാക്കിയപ്പോഴാണ് ഇയാൾ അമിതമായി മദ്യപിച്ചിരുന്നതായി സ്ഥിരീകരിച്ചത്. തുടർന്ന് കുമളി ഡിപ്പോയിൽ നിന്ന് പുതിയ ഡ്രൈവറെ എത്തിച്ചാണ് യാത്രക്കാരുമായി ബസ് കോട്ടയത്തേക്ക് യാത്ര തുടർന്നത്.