ന്യൂഡൽഹി: ഇന്ത്യയിൽ ഈ വർഷത്തെ കാലവർഷം (മൺസൂൺ) കൃത്യസമയത്ത് തന്നെ എത്തുമെന്ന സൂചനയുമായി കാലാവസ്ഥാ നിരീക്ഷകർ. കാത്തിരിക്കുന്ന തെക്കുപടിഞ്ഞാറൻ മൺസൂണിന്റെ വരവിനെക്കുറിച്ച് ആത്മവിശ്വാസം നൽകുന്ന റിപോർട്ടുകളാണ് പുറത്തുവരുന്നത്. ലഭ്യമായ വിവരങ്ങൾ പ്രകാരം, കേരളത്തിന്റെ തീരത്ത് ജൂൺ ഒന്നോടെ കാലവർഷം എത്തുമെന്നാണ് പ്രതീക്ഷിക്കുന്നത്. നിലവിൽ ദക്ഷിണേന്ത്യയിൽ അനുഭവപ്പെടുന്ന വേനൽമഴയും ഇടിമിന്നലും കൃത്യസമയത്തുള്ള മൺസൂണിന്റെ സൂചനകളായി കാലാവസ്ഥാ നിരീക്ഷകർ കണക്കാക്കുന്നു. 

കാലവർഷത്തിന് മുന്നോടിയായുള്ള ഇടിമിന്നലോടു കൂടിയ മഴയാണ് കേരളത്തിലും തമിഴ്‌നാട്ടിലും ഇപ്പോൾ ലഭിക്കുന്നത്. അന്തരീക്ഷം ഒരു ഋതുവിൽ നിന്ന് മറ്റൊന്നിലേക്ക് മാറുന്നതിന്റെ ഭാഗമായാണ് ഇത്തരം മഴയും മിന്നലും ഉണ്ടാകുന്നത്. അടുത്ത ഏഴ് ദിവസങ്ങളിൽ കേരളം, തമിഴ്‌നാട്, പുതുച്ചേരി എന്നിവിടങ്ങളിൽ മഴ തുടരുമെന്ന് ഇന്ത്യ മെറ്റീരിയോളജിക്കൽ ഡിപ്പാർട്ട്‌മെന്റ് (IMD) അറിയിച്ചിട്ടുണ്ട്. ഭൂമധ്യരേഖയ്ക്ക് സമീപമുള്ള മഴമേഘങ്ങളുടെ സഞ്ചാരം വടക്കോട്ട് നീങ്ങുന്നതോടെ ജൂൺ ആദ്യവാരത്തിൽ തന്നെ കേരളത്തിൽ മഴ എത്താൻ സാധ്യതയുണ്ട്. മെയ് എട്ടിലെ കണക്കനുസരിച്ച്, ഇന്ത്യൻ ഭൂപ്രദേശത്ത് കാലവർഷം ആദ്യം എത്തുന്ന ആൻഡമാൻ നിക്കോബാർ ദ്വീപുകളിൽ ഏകദേശം രണ്ടാഴ്ചയ്ക്കുള്ളിൽ മഴ തുടങ്ങാൻ സാധ്യതയുണ്ട്. ഇത് കേരളത്തിലേക്ക് മൺസൂൺ എത്തുന്നതിന് മുന്നോടിയായുള്ള പ്രധാന ഘട്ടമാണ്. 

മാത്രമല്ല, ഓസ്ട്രേലിയയിലെ കാലാവസ്ഥയിൽ ഇപ്പോൾ ഉണ്ടായിക്കൊണ്ടിരിക്കുന്ന മാറ്റങ്ങളും ഇന്ത്യയിലെ കാലവർഷത്തിന്റെ വരവിനെ സൂചിപ്പിക്കുന്ന ശക്തമായ അടയാളങ്ങളാണ്. ഓസ്‌ട്രേലിയയിലെ വരണ്ട കാലാവസ്ഥ ഇന്ത്യൻ ഉപഭൂഖണ്ഡത്തിലേക്കുള്ള മഴക്കാറ്റുകളുടെ പ്രവാഹത്തിന് വഴിയൊരുക്കുന്നു. ഓസ്‌ട്രേലിയയിലെ മഴക്കാലം അവസാനിക്കുന്നത് ഇന്ത്യയിലെ കാലവർഷം കൃത്യസമയത്ത് എത്തുന്നതിനുള്ള സൂചനയാണ്. ഓസ്‌ട്രേലിയയിലെ കാലാവസ്ഥാ നിരീക്ഷണ കേന്ദ്രം (Bureau of Meteorology) അവിടുത്തെ മഴക്കാലം അവസാനിച്ചതായി പ്രഖ്യാപിച്ചു കഴിഞ്ഞു.