പാലക്കാട്: കൊടുമുണ്ട നാടപറമ്പിലെ വീട്ടിൽ കള്ളൻ മോഷ്ടിച്ചത് മുക്കുപണ്ടങ്ങൾ. പരുതൂർ കൊടുമുണ്ട ഉരുളാൻപടി തീണ്ടാംപാറ വീട്ടിൽ മുജീബ് റഹ്‌മാന്റെ വീട്ടിലാണ് കഴിഞ്ഞദിവസം പുലർച്ചെ കവർച്ച നടന്നത്. അടുക്കള ഭാഗത്തെ ഗ്രില്ലിന്റെ പൂട്ടുപൊളിച്ചാണ് മോഷ്ടാവ് അകത്തുകടന്നത്. ഈസമയം, വീട്ടിൽ ആരുമുണ്ടായിരുന്നില്ല. അലമാരയിൽ സൂക്ഷിച്ചിരുന്ന ആഭരണങ്ങൾ കവർന്നു. ഇതു മുക്കുപണ്ടമാണെന്ന് ഉടമ പറഞ്ഞു. മുജീബ് റഹ്‌മാൻ തൃത്താല പോലീസിൽ പരാതി നൽകി.

അർധരാത്രിയിലെത്തിയ മോഷ്ടാവ് പ്രദേശത്ത് ചുറ്റിക്കറങ്ങുന്നതും വാഹനങ്ങൾ വരുമ്പോൾ ഒളിച്ചുനിൽക്കുന്നതും നിരീക്ഷണക്യാമറയിൽ പതിഞ്ഞിട്ടുണ്ട്. പരാതിയിൽ തൃത്താല പോലീസ് അന്വേഷണം ആരംഭിച്ചു.പരുതൂർ കൊടുമുണ്ടയിലും പരിസരപ്രദേശങ്ങളിലും മോഷ്ടാക്കളുടെ ശല്യം വർധിക്കുന്നതായി പരാതിയുണ്ട്. നാടപറമ്പ് ഹൈസ്‌കൂളിനുസമീപത്തെ വ്യാപാരസ്ഥാപനത്തിലും തൊട്ടടുത്ത വീട്ടിലും മോഷ്ടാവിന്റെ ദൃശ്യങ്ങൾ സിസിടിവിയിൽ പതിഞ്ഞതായി പോലീസ് പറഞ്ഞു. എന്നാൽ, ഇവിടെനിന്നും സാധനങ്ങൾ ഒന്നും നഷ്ടപ്പെട്ടിട്ടില്ലെന്നാണു വിവരം.

ഇതേത്തുടർന്ന് തൃത്താല പോലീസിന്റെ നേതൃത്വത്തിൽ നാടപറമ്പിൽ ജാഗ്രതാസമിതി യോഗം വിളിച്ചുചേർത്തു. മേഖലയിൽ പോലീസ് രാത്രികാല പട്രോളിങ് ശക്തമാക്കണമെന്ന് നാട്ടുകാർ ആവശ്യപ്പെട്ടു. പൊതുജനങ്ങൾ ജാഗ്രത പാലിക്കണമെന്നും സംശയാസ്പദമായ സാഹചര്യങ്ങൾ ശ്രദ്ധയിൽപ്പെട്ടാൽ ഉടൻതന്നെ പോലീസിനെ അറിയിക്കണമെന്നും അധികൃതർ അറിയിച്ചു.