തിരുവനന്തപുരം: കേരള പത്രപ്രവര്‍ത്തക യൂണിയൻ (കെയുഡബ്ല്യുജെ) മുൻ സംസ്ഥാന ജനറല്‍ സെക്രട്ടറി എസ് ജയശങ്കര്‍ (75) അന്തരിച്ചു. തിരുവനന്തപുരം ജഗതിയിലെ സഹോദരിയുടെ വീട്ടില്‍ വെച്ചായിരുന്നു അന്ത്യം.

കേരള കൗമുദി പത്രാധിപ സമിതി അംഗമായിരുന്നു എസ്. ജയശങ്കർ. ആദ്യകാല തിരുവനന്തപുരം മേയർമാരിലൊരാളായ സത്യകാമൻ നായരുടെ മകനാണ്. ജഗതിയിലെ ഉള്ളൂർ സ്മാരകം സെക്രട്ടറിയായിരുന്നു.

കേരള കൗമുദിയില്‍ തിരുവനന്തപുരം, കണ്ണൂർ ബ്യൂറോകളിലായി ദീർഘകാലം മാധ്യമപ്രവർത്തകനായിരുന്നു.  1998 – 99, 2001- 2005 കാലത്താണ് അദ്ദേഹം യൂണിയൻ്റെ ജനറല്‍ സെക്രട്ടറിയായി പ്രവർത്തിച്ചത്. സംസ്കാരം ഇന്ന് വൈകിട്ട് നാലിന് ശാന്തികവാടത്തില്‍ നടക്കും. അവിവാഹിതനാണ്.