ബേക്കൽ : ബേക്കലിൽറാപ്പർ വേടന്റെ സംഗീത പരിപാടിക്കിടെ തിക്കും തിരക്കും കാരണം കുട്ടികൾ ഉൾപ്പെടെ നിരവധിപ്പേർക്ക് പരുക്കേറ്റു. ബേക്കൽ ബീച്ച് ഫെസ്റ്റിനിടെ ഇന്നലെ രാത്രിയാണ് സംഭവം. കുട്ടികൾ ഉൾപ്പടെ നിരവധി പേർക്ക് പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചു.
ബേക്കൽ പാർക്കിനോട് ചേർന്നുള്ള സ്ഥലത്തായിരുന്നു പരിപാടി സംഘടിപ്പിച്ചത്. നിശ്ചയിച്ചതിൽ നിന്നും ഏറെ വൈകിയായിരുന്നു വേടൻ പരിപാടിക്ക് എത്തിയത്. 

ഇതിനികം നിരവധി പേർ പരിപാടി കാണുന്നതിനായി സ്ഥലത്ത് എത്തിയിരുന്നു. ആദ്യം കുട്ടികൾക്കാണ് ദേഹാസ്വാസ്ഥ്യമുണ്ടായത്. ഇവരെ ആശുപത്രിയിൽ പ്രവേശിപ്പിച്ചതിന് പിന്നാലെയാണ് മുതിർന്ന ആളുകൾക്ക് ദേഹാസ്വാസ്ഥ്യം അനുഭവപ്പെട്ടത്. തൊട്ടുപിന്നാലെ പലരും കുഴഞ്ഞുവീഴുകയായിരുന്നു. ഇവരെയും ആശുപത്രിയിൽ പ്രവേശിപ്പിച്ചു.

ഇതിനിടെ പരിപാടി കാണാൻ എത്തിയ യുവാവിനെ ട്രെയിൻ തട്ടി. പൊയിനാച്ചി സ്വദേശി ശിവാനന്ദനെയാണ് ട്രെയിൻ തട്ടിയത്. പരിപാടി സംഘടിപ്പിച്ചതിന് തൊട്ടടുത്തായിരുന്നു സംഭവം. റെയിൽപാളം മുറിച്ചുകടക്കുന്നതിനിടെ ട്രെയിൻ തട്ടുകയായിരുന്നു. ഉടൻ തന്നെ ഇദ്ദേഹത്തെ ആശുപത്രിയിൽ പ്രവേശിപ്പിച്ചെങ്കിലും മരിച്ചു. ഇതിന് പിന്നാലെ പരിപാടി താത്ക്കാലികമായി നിർത്തിവെച്ചിരുന്നു.